මේ තරුණ අන්දරේලා රට කෙරුවොත් යේමනයත් මීට වැඩිය හොඳයි කියාවි - (කුසල් පෙරේරා)

රටේ අර්බුද සඳහා විසඳුම් ලබා දෙන්න පරණ පරම්පරාවට නොහැකි යැයි තරුණයින් දැන් පාලන බලයට අයිතිවාසිකම් කියන්න පාරට බැහැලා “අරගලය”

ගැන උදම් අණනවා. පරණ පරම්පරාවේ ඇතැම් බංකොලොත් නායක නායිකාවන් තමන්ව නැවත “market” කර ගන්න “අරගලය” අලුත් විලාසිතාවක් ලෙසින් යොදා ගන්න බලනවා. මේ අලුත් පරණ දෙගොල්ලොම වහා මැතිවරණයක් ඉල්ලනවා.

මැතිවරණ ඉල්ලන පිරිස අතර ජ.ජ.බත් ඉන්නවා. ඒ අය අතර මැතිවරණ දේශපාලනයට ගොඩ බහින්න සූදානම්වන “උගත් තරුණ” නායකයින් කිහිප දෙනෙක්ද ඉන්නවා. මේ අය සමාජයේ පෙනී සිටින්නේ රටේ ප්‍රශ්න සියල්ල විසඳා ගැනීමට පවතින පාර්ලිමේන්තුවේ 225 ම ඉවත් කරලා අලුතින් “උගත් තරුණ” මන්ත්‍රීවරුන් 225 ක් පත්කර ගත යුතුයි කියලා. “System change” සඳහා අරගලය කළ මේ අයගේ බංකොලොත්කම නිරුවත් වන්නේ පාර්ලිමේන්තුවේ දැන් ඉන්න 225 වෙනුවට අලුතින් උගත් තරුණ 225 ක් පත්කර ගැනීමට කරන “පුද්ගලයින් change කිරීමේ” කතාවෙනුයි. ඊළග මැතිවරණයේදී තරුණන් 225 ක් පාර්ලිමේන්තුවට පත්කර ගන්න එක තමයි මේ උගත් තරුණයින් දන්න “System change” එක. 

ඒ තරුණ අයගෙන් එක තරුණ නායකයෙක් එයාගේ ‘ට්විට’ ගිණුමෙහි තමන් ගැන ලියාගෙන තියෙන්නේ “දේශපාලකයෙක්, වෛද්‍යවරයෙක්, කතුවරයෙක් සහ පරිසරවේදියෙක්. පැතුම් ශ්‍රී ලංකාවේ “System change” එකක් ගැන කතා කරන නව පරපුරේ දේශපාලකයින්ගේ පුරෝගාමිකයෙක්” කියලා. මේ පැතුම් තමයි #GotaGoHome ගාලුමුවදොර විරෝධයට අප්‍රේල් අගදි ගොඩ බැහැලා, ලොකු සිංහ කොඩියක් වනමින් කිව්වේ “මම දැන් කියන්නේ නැහැ 225 ම එළවන්න කියලා. දැන් මම කියන්නේ ඒ 225 අවශ්‍යයි අපට ව්‍යවස්ථානුකූලව “System change” එකකට යන්න. “System change” එක ව්‍යවස්ථානුකූල නොවුනොත් රට අරාජික වෙනවා. රට අරාජික කරන්න අපට අවශ්‍ය නැහැ” කියලා. අරගලයේ “මහා මොලකරු” හැටියට පෙනී සිටින පැතුම් ක(ර්)න කියන්නේ එයාටයි.

එයාගේ අරගලයේ “System change” කතාවට යන්න කලින් “අරගලය” ගැන මේ ටික ඉතාම කෙටියෙන් කියන්නත් ඕනේ. දැන් හැමෝම “අරගලය” කියන වීදි සටන් වලට ගාලු මුවදොර පිටියේ අප්‍රේල් 09 දා ආරම්භ කෙරුණු #GotaGoHome විරෝධතාවය අයිති නැහැ. ගාලු මුවදොර #GotaGoHome විරෝධය අපේ දේශපාලන සංස්කෘතියෙහි සැළසුම් කෙරුණු විරෝධතාවයක් නෙවෙයි. අපේ රටේ සිංහල-බෞද්ධ සංස්කෘතියෙහි විරෝධතා සැළසුම් කෙරෙන්නෙත් ඒවට ලේබල් ඇලවෙන්නෙත් සිංහලෙන්. ඒ නිසා සමාජ මාධ්‍ය ජාල හරහා ඉංග්‍රීසියෙන් #GotaGoHome කියලා විරෝධතාව සැළසුම් කෙරුණේ පැහැදිලිවම මේ රටෙන් පිට වෙනත් තැනකයි. එහි හැම ලේබලයක්ම වගේ, #GotaGoGama, #MainaGoHome වගේ ඉංග්‍රීසියෙන් හැදුනෙත් ඒ මැදිහත්වීම් සමගයි. එහි තිබුණේ විරෝධයට තොග ගැසුණු තරුණයින්ගේ අපේක්ෂාවන්ම නොවෙයි. #GotaGoHome එළියට ගෙනාවේ වෙනත් න්‍යාය පත්‍රයකට අනුවයි. දේශපාලන පක්ෂ හා නායක හිමිකාරිත්වයක් නැතැයි කීවේද එවැනි හිමිකාරිත්වයක් ගාලු මුවදොර තහවුරු වූවානම්, #GotaGoHome විරෝධතාවයේ අයිතිකරුවන් බලාපොරොත්තු වූ අරමුණු ඉටුකර ගැනීමට නොහැකිවේ යැයි තිබූ සැකයයි.

ඒ අනුව මැයි 09 වන දින #GotaGoHome විරෝධයෙන් ඉතා ප්‍රචණ්ඩකාරී ලෙස අගමැති මහින්ද රාජපක්ෂ ඉවත් කෙරුණු පසු, #GotaGoHome විරෝධය සැළසුම් කළ වුන්ගේ රාජකාරි අවසන් කෙරුණා. ඉන්පසු දින දෙක තුනේ ඔවුන්ගේ අවසන් තේරීම කෙරෙන අතරතුර ඔවුන් ගාලු මුවදොර පිටියෙන් වැඩි ගෝසාවක් නැතිව ඉවත් වුනා. ඒ හිඩැසට පය ගැසුවේ පෙරටුගාමීන්. ඔවුන් හා තරගයට ජ.වි.පෙද ආවා. ඔවුන් #GotaGoHome විරෝධය ගාලු මුවදොර පිටියෙන් එළියට ගන්න ලේබලයත් වහා වෙනස් කෙරුවා. ඔවුන් අපේ සිංහල-බෞද්ධ දේශපාලන සංස්කෘතියට ගැලපෙන ලෙස එහි ලේබලය “ජන අරගලය” කියා වෙනස් කෙරුවා. “අරගලය” කියන ජනප්‍රිය ලේබලය භාවිතාවට ආවේ ඒ දෙවන ප්‍රචණ්ඩ විරෝධතා සමගින් මිස #GotaGoHome විරෝධයෙන් නෙවෙයි.  

දැන් නැවත “System change” ගැන කතා කෙරුවොත් #GotaGoHome විරෝධයෙන් කෙරුණේ නවලිබරල් පුද්ගල හා සංවිධානවල ගෝලීය හවුලක් ලෙස සැළකෙන “මොන්ට් පෙලරින් සමාජයේ” ලාංකීය සාමාජිකයින් දෙතුන් දෙනාගෙන් ප්‍රධාන සාමාජිකයා වන, තනි ජාතික ලැයිස්තු මන්ත්‍රී එ.ජා.ප නායක රනිල් වික්‍රමසිංහව ජනාධිපති ලෙස පත්කර ගෙන, පොහොට්ටුවේ නායකයින් චීන ආධාරවල කොටු වෙන්නට තිබූ ඉඩ වසා දැමීමයි. රට ගොඩ දැමීමට කියලා ජාත්‍යන්තර මූල්‍ය අරමුදල සමග ගනුදෙනුව ජනාධිපති වික්‍රමසිංහට බාර දෙන එකයි. එයාගේ සහායට “මොන්ට් පෙලරින් සමාජයේ” ශ්‍රී ලාංකීය මතධාරීන් කණ්ඩායමක්ද දැන් අවුරුදු 40 ට වැඩි අසාර්ථක විවෘත වෙළඳපල ආර්ථිකය ගොඩදමන අලුත් සූත්‍ර හදන්න පටන් අරගෙන තියෙනවා.

ඒ අතර මේ පැතුම් ක(ර්)න ජා.මූ.අරමුදල සමග නවලිබරල් ආර්ථිකයෙන් රට දියුණු කරන ආකාරය වරක් රනිල් වික්‍රමසිංහටත් වඩා නිරුවත් නවලිබරල්වාදියෙකු විදියට යූ-ටියුබ් කතාවක් කෙරුවා. ඔහු ඒ කතාවෙන් කියන්නේ, යහපාලන ආණ්ඩුව 2016 දී ජා.මූ. අරමුදල සමග ඇති කරගත් වැඩසටහන ඉදිරියේ ආර්ථික අර්බුදයක් එන බව දැනගෙන ඊට විසඳුම් සඳහා කල් තියා ඇති කරගත් වැඩසටහනක් කියලා. ආර්ථික කලමනාකරණය නිවැරදිව කරන්නේ එහෙමලු. ඒ වුනත් පාස්කු ඉරිදා බෝම්බ ගහලා, මෛත්‍රී සහ මහින්ද දවස් 52 ක ආණ්ඩු හදලා, 2019 නොවැම්බර ජනාධිපතිවරණයට ලෑස්ති වෙන්න තිබුණ නිසා ඒ වැඩසටහන හරියට ක්‍රියාත්මක කරගන්න බැරි උනාලු.

ශ්‍රී ලංකාවේ “System change” ගැන කතා කරන නව පරපුරේ දේශපාලකයින්ගේ පුරෝගාමියා පැතුම් ක(ර්)න ඒ කියන විදියට පාස්කු බෝම්බ, මෛත්‍රී - මහින්ද කුමන්ත්‍රණ වැනි කඩාකප්පල්කාරී බාහිර සිදුවීම් නොවුනා නම් ජා.මූ. අරමුදල සමග අගමැති වික්‍රමසිංහගේ යහපාලන ආණ්ඩුවට ආර්ථික අර්බුදය වළකා ගන්න තිබුණා. එයා කියන විදියට වික්‍රමසිංහගේ යහපාලන ආණ්ඩුවට “System” එකේ අවුලක් තිබිලා නැහැ. පැතුම් ක(ර්)න කියන විදියට “System” අවුල කියන්නේ, ගෝඨාභය ජනාධිපති වුන එකයි.  

ජනාධිපති ගෝඨාභය ගියාට පස්සෙත් “System” අවුල ඉතිරි වෙලා. දැන් ඒක විසඳන්න පාර්ලිමේන්තුවම අලුත් කරන්න කතා කරනවා. නමුත් පාර්ලිමේන්තුවට උගත් තරුණ අය තෝරා යැවුවට හරියන්නෙත් නැහැ කියලා පැතුම් ක(ර්)න දැන් කියනවා. ඒ නිසා පාර්ලිමේන්තුවට යැවිය යුතු මන්ත්‍රීවරුන්, ඇමතිවරුන් සහ ජනාධිපති ගැන පැතුම් ක(ර්)න ඊයේ පෙරේදා ඔහුගේ ට්විට ගිණුමේ තැබූ නියම “බුබලිනා” සටහනකින් කියනවා, පාර්ලිමේන්තු මන්ත්‍රීවරයෙකු අවම තරමින් ප්‍රධාන කොම්පැණියක සාමාන්‍යාධිකාරි මට්ටමේ කෙනෙකු විය යුතු අතර, ඇමතිවරයෙකු ප්‍රධාන විධායක නිලධාරී මට්ටමේ අයෙකු විය යුතුයි කියලා. ජනාධිපති සාර්ථක “දේශපාලන ව්‍යවසායකයෙකු” විය යුතුයි ලු.

ලංකාවේ අර්බුද සඳහා විසඳුම් හදන්න අවුරුදු දෙකක් පූර්ණකාලීනව එංගලන්තයේ ඉගෙන ගත්තා යැයි කියන පැතුම් ක(ර්)න කියන විදියට මලික්ලා, රවීලා, දයාලා, ධම්මිකලා, ජොන්ස්ටන්ලා, හරීන්ලා, ගනේෂන්ලා, දිගම්බරම්ලා, ගොඩහේවලා, වෙල්ගමලා (ඉඩම්හිමි ව්‍යාපාරික), කබීර්ලා (ව්‍යාපාරික උපදේශක), කෙහෙලියලා (සංචාරක ව්‍යාපාරික), ලොහාන්ලා (කලමනාකරණ අධ්‍යක්ෂ), මයන්තලා (සමාගම් අධ්‍යක්ෂ) ඇතුලු මේ පාර්ලිමේන්තුවේ ඉන්න ඒ වගේ 225 කින් තමයි අලුත් පාර්ලිමේන්තුව පුරවන්න ඕනේ. ඒ අය අතුරෙන් මලික්ලා, රවීලා, දයාලා, ධම්මිකලා වගේ ලොකු කොම්පැනිකාරයින්ගෙන් තමයි ඇමති මණ්ඩලය හදන්නත් ඕනේ.

නමුත් දේශපාලන ව්‍යවසායකයෙකු කියන්නේ මොනවා කරන කෙනෙකුටද? ඒ ප්‍රශ්නය සාමාන්‍ය ඡන්දදායකයෙකුගෙන් ඇහුවොත් ඡන්දදායකයා අනෙක් පැත්තට අහයි “ඔය කියන්නේ දේශපාලන හයියෙන් බිස්නස් කරන එකද?” කියලා. එහෙමනං ඉතිං “රාජපක්ෂලා තමයි ඉතාම සාර්ථක” කියලත් කියයි.

මෙහෙම “බුබලිනා*” වර්ගයේ දේශපාලන කතා කියන “දේශපාලකයෙක්, වෛද්‍යවරයෙක්, කතුවරයෙක් සහ පරිසරවේදියෙක්” යැයි කියා ගන්නා පැතුම් ක(ර්)න දැන් කියනවා අරගලයේ ඊළග පියවර ආරම්භ කිරීමේ අවස්ථාව ඇවිල්ලයි තියෙන්නේ කියලා. පාරට බැසිය යුතුයි, පාර්ලිමේන්තුව වැටලිය යුතුයි නොකියා ක(ර්)න කියනවා තමන්ගේ ගමේ, ග්‍රාම සේවා වසමේ අසල්වැසි කිහිප දෙනකු වශයෙන් ලංකාවේ හැම ගමකම ජනතාව එකතු උනොත් ඒක පුංචි දිය කඩිති දිය පාරවල්, ඇලවල්, දොලවල් එකතු වෙන මහා ජන ගංගාවක් වෙනවා කියලා. එහෙම ජන බලයකට මැතිවරණයකින් අලුත් පාර්ලිමේන්තුවක් පත්කර ගන්න පුළුවන් කියලා.

ඒ අලුත් පාර්ලිමේන්තුවට මන්ත්‍රීවරුන් පත්කර ගන්න මැතිවරණයට තරග කරන්නට පැතුම් ක(ර්)නට තියෙන සුදුසුකම මොකද්ද? එයා කියන විදියට මන්ත්‍රීවරයෙකු වෙන්න “අවම තරමින් ප්‍රධාන කොම්පැණියක සාමාන්‍යාධිකාරි මට්ටමේ කෙනෙකු විය යුතුයි”. පැතුම් ක(ර්)න මොන කොම්පැනියෙද සාමාන්‍යාධිකාරි මට්ටමේ තනතුරක වැඩ කරලා තියෙන්නේ? එයා ගැන එහෙම කතාවක් නැති නිසා එයාම කියන විදියට එයා අපේ රටට අනවශ්‍ය, අපේ රටට “නුසුදුසු” දේශපාලකයෙක්.

පැතුම් ක(ර්)න අපේ රටේ දේශපාලනයට වැද්ද නොගත යුතු අනවශ්‍ය චරිතයක් වෙන්නේ එයාගේ “බුබලිනා” කතා වලට අමතරව, එයා වර්ගවාදි මානසික රෝගියෙකුද වන නිසයි. 2019 මැයි මාසයේ එයාගේ ට්විට ගිණුමෙහි එයා වෛද්‍ය ශාෆිට එරෙහිව සිංහලෙන් සහ ඉංග්‍රීසියෙන් තැබූ අන්ත මුස්ලිම් විරෝධි සටහන් වලින් වඩාත්ම කුරිරු සටහන තැබුණේ ඉංග්‍රීසියෙන්. එහි සාමාන්‍ය සිංහල පරිවර්තනය මෙහෙමයි. “මෙය සියලු කුරිරු ක්‍රියාවන්ගෙන් උපරිම කුරුරි ක්‍රියාවයි. එවගේම එය අපේ දේශයේ සැබෑ ජන සංහාරයක්. ඒ අවදානම ගැන මුලු ලෝකයේම අවධානය වහා යොමු කළ යුතුයි. ලෝකයේ කොහේවත් සෞඛ්‍ය සේවා ආයතනවල මුස්ලිම් වෛද්‍යවරුන්ට තැනක් නොතිබිය යුතුයි. මේ ගැන ඇසීමෙන්ම මම වෛද්‍ය වෘත්තිකයෙකු හැටියට තිගැස්සී සිටියා”

මෙය කියවූ විට මේ පැතුම් ක(ර්)න බුබලිනා කතා කියනවා පමණක් නෙවෙයි ඇත්තටම බුබලිනෙක් කියලා මට හිතුනා. ඒ නිසා මීට සතියකට හමාරකට කලින් අපි කිහිප දෙනෙක් මේ උන්මත්තක වර්ගවාදී කතා සම්බන්ධයෙන් මේ යෝධ වර්ගවාදියාව සමාජ මාධ්‍ය ජාලවල නිරුවත් කෙරුවා. ඊට දෙදිනකට හරි තෙදිනකට පස්සේ එයා ඒ ගැන දිග හෑල්ලක් දොඩවා සියල්ලන්ගෙන් සමාව ගන්නවා යැයි විඩියෝ පටයක් නිකුත්කර තියෙනවා. ඒකෙන් එයා කරන්නේ එදා ඒ සන්දර්භය තුල දේශප්‍රේමී හැමෝටම ඇති වූ කම්පනය සමග එයාටද එහෙම ආවේගයක් ඇති වුනා කියලා එයාගේ මුස්ලිම් විරෝධය සාධාරණයකර ගන්න උත්සාහ කිරීමක් විතරයි.

පැතුම් ක(ර්)න වෛද්‍යවරයෙකු නම් එයා දැන සිටිය යුතුයි ශල්‍යාගාරයක සෙසු වෘත්තිකයින් සිටියදී වෛද්‍ය ශාෆිට විතරක් නෙවෙයි කාටවත් අනෙක් සියලු දෙනාට හොරෙන් කාන්තාවන්ගේ ෆැලොපියන් නාලිකා මිරිකන්න බැරි වග. ඒ වගේම මේ මෝඩ වෛද්‍යවරයා දැන සිටිය යුතුයි අන්ත ජාතිවාදි පත්තරවල අතේ රෝල් කෙරෙන උද්වේගකර ප්‍රවෘත්ති වෙනුවෙන් ලෝකෙටම ඇහෙන්න උම්බෑ නොකිය යුතුයි කියලා.

ඒ සියල්ලටම වඩා මට එයා තරුණ දේශපාලනයේ ඉන්න බාල වර්ගයේ අන්දරේ කෙනෙකු වෙන්නේ එයාට සමාව ගැනීමට අවුරුදු 03 කුත් මාස 06 ක් ගත වීමම නෙවෙයි. එතරම් කාලයක් ගතවෙලා එයා සමාව ගන්නේ එයාගේ ජාතිවාදී රෙදි ගැලෙව්ව නිසයි. නමුත් එයා බාලම වර්ගයේ අන්දරේ කෙනෙකු වෙන්නේ අනෙක් අය මෝඩයින් කියලා හිතාගෙන අත හරින එයාගේ ගඳ ගහන බොරුව නිසයි. එයා කියනවා ඒ ට්විට සටහනෙන් පස්සේ ඒක වැරදිය කියලා තේරුම් ගත්ත නිසා එයා කොවිඩ්-19 කාලයේ මුස්ලිම් මෘත දේහ භූමදාන තහනමට විරුද්ධව පෙනී සිටියා කියලා. නමුත් එයාගේ ට්විට ගිණුමෙහි එවැනි කිසිම සටහනක් තබා නැහැ. මුස්ලිම් මෘත දේහ භූමදාන තහනම බරපතල ලෙස සමාජයේ කතා බහ වුන කාලයේ එයාගේ විරෝධය සටහන්වන කිසිම ප්‍රකාශයක් සොයා ගන්නටත් නැහැ. ඒ නිසා ඉතාම පැහැදිලිව ඒ කියන්නේ අමුලික කෙබරයක්.  

අවසන් වශයෙන් මේ පැතුම් ක(ර්)න ගැන කියන්න තියෙන්නේ එයා ගැලපෙන්නේ අනාගත පාර්ලිමේන්තුවකට නෙවෙයි. එයා ඉතාම කදිමට ගැලපෙන්නේ වීරවංශලා, ගම්මන්පිළලා වගේ මේ වත්මන් පාර්ලිමේන්තුවට කියලයි.

“බුබලිනා*” (Bubalina) යන්නෙහි අර්ථය අන්තර්ජාලයේ ඇත.

“මොන්ට් පෙලරින් සමාජය” (Mont Pelerin Society) විස්තර සඳහා මෙතනින් ගොඩවන්න -

Foreign Think Tanks influence Sri Lanka: Mont Pelerin Society – ADVOCATA – Institute of Policy Studies


(කුසල් පෙරේරා)
ප්‍රවීන දේශපාලන විචාරක හා ජ්‍යෙෂ්ඨ මාධ්‍යවේදී
This email address is being protected from spambots. You need JavaScript enabled to view it.


(උපුටා ගැනීම - කුසල් පෙරේරාගේ ෆේස්බුක් ගිණුමෙන් )
2022 නොවැම්බර් 29