ප්රවීණ, සම්මානිත බොලිවුඩ් රංගන ශිල්පී දිලිප් කුමාර් අද (7) උදෑසන දිවියෙන් සමුගෙන තිබෙනවා.
98 හැවිරිදි වියේ පසුවූ ඔහු අවසන් හුස්ම හෙලන මොහොතේ මුම්බායි හින්දුජා රෝහලේ ප්රතිකාර ලබමින් සිටි බවට ඉන්දීය මාධ්ය වාර්තා කරයි.
අධි රුධිර පීඩනය සහ ස්වසන අපහසුතා නිසා දිලිප් කුමාර් රෝහල් ගත කර තිබුනේ මීට සතියකට පමණ පෙර ය.
දශක 6ක් දිගු සිනමා දිවිය ඔහු ආරම්භ කරන්නේ 1944 දී 'ජවාර් භාතා' චිත්රපටයේ රංගනයත් සමඟ ය. එතැන් පටන් 1998 තෙක් සිනමාපට 65කට වැඩි ප්රමාණයක් සඳහා ඔහු රංගනයෙන් එක් වී තිබුණි.
දේව්දාස්' චිත්රපටයේ
'අන්දාස්' (1942), 'ආන්' (1952), 'දාග්' (1952), 'දේව්දාස්' (1955), 'අසාද්' (1955), 'නයා දර්' (1957), 'මධුමති (1958) 'මෝගල් ඊ අසාම්' (1960), කොහීනුර් (1960), 'ගංගා ජමුනා' (1961), ලීඩර් (1964), 'රාම් ඕ ශ්යාම්' (1967) යන සිනමාපටවල දිලිප් කුමාර්ගේ රංගනය ඒ අතරින් කැපී පෙනුනි.
මධුමති චිත්රපටයේ
පළමු ෆිල්ම් ෆෙයාර් සම්මාන උළෙලේ හොඳම නළුවා ලෙස සම්මානයට පාත්ර වූයේ දිලිප් කුමාර්ය. ඒ දාග් සිනමාපටයේ රංගනය වෙනුවෙනි.
ෆිල්ම්ෆෙයා සම්මාන උලෙළ 1968
ඉන්පසු දේව්දාස්, අසාද්, නයා දර්, කොහීනුර්, ලීඩර්, රාම් ඕ ශ්යාම්, ශක්ති යන සිනමාපටවල රංගනය වෙනුවෙන් හොඳම නළුවාට හිමි ෆිල්ම්ෆෙයා සම්මාන ඔහු දිනා ඇත.
චිත්රපට නිෂ්පාදකවරයකු ලෙස ද කටයුතු කළ ඔහු 1991 වසරේ පද්ම භූෂන්, 2015 දී පද්ම විභූෂණ සම්මානවලින් ද පිදුම් ලැබුවේය.
දිලිප් කුමාර්ගේ වියෝව සැලැවීමත් සමඟ ඉන්දීය අගමැති නරේන්ද්ර මෝදි, බොලිවුඩ් රංගන ශිල්පින්, ශිල්පිනියන් රැසක් සමාජ මාධ්ය ඔස්සේ සිය ශෝකය පළ කර තිබේ.