ජනතා විරෝධය මැද ඉවත්ව නොයන ජනාධිපති ගෝඨාභය රාජපක්‍ෂට ඇති මහජන කැමැත්ත
දැන ගැනීමට පළාත් සභා මැතිවරණය පවත්වන ලෙස ඉල්ලීමක් ඉදිරිපත්ව තිබේ.
දෙමළ ප්‍රගතිශීලි සන්ධානයේ නායකයන් මෙරට ඉන්දීය මහ කොමසාරිස් ගෝපාල් බක්ලේ හමුවී කියා සිටියේ පළාත් සභා මැතිවරණය හැකි ඉක්මනින් පැවැත්වීමට රාජපක්‍ෂ ආණ්ඩුවට බලපෑම් කරන ලෙසයි.
ශ්‍රී ලංකාවේ පළමු පළාත් සභා මැතිවරණය පැවැත්වුනේද ඉන්දීය මැදිහත් වීමකිනි.
කොළඹ පිහිටි ඉන්දීය මහ කොමසාරිස්වරයාගේ නිල නිවසේදී ජුනි 29 වැනිදා පැවති සාකච්ජාවේදී උතුරු නැගෙනහිර ඇතුළු පළාත් සභා නවයම එක්වර මැතිවරණය පැවැත්වීමේ අවශ්‍යතාවය පෙන්වා දුන් කඳුකර දෙමළ නායකයෝ ඉල්ලා සිටියේ අවශ්‍ය මුදල් ලංකා ආණ්ඩුවේ භාණ්ඩාගාරයට නොමැති නම් ඉන්දියාව හා සෙසු ජාත්‍යන්තර ප්‍රජාව එක්ව අරමුදල් ලබා දිය යුතු බවයි.
''මේ පවතින ආණ්ඩුව ගැන ජාත්‍යන්තර ප්‍රජාවට විශ්වාසයක් නැහැ. ජාතික මට්ටමේ ජන්දයක් තියලා ජනතාවගේ කැමැත්ත දැනගන්න ජනාධිපති ගෝඨාභය රාජපක්‍ෂ සුදානම් නැහැ. පළාත් සභා නවයේ ජන්දය කොහොම හරි තිබ්බොත් ඒ මගින් ජනතාවගේ කැමැත්ත දැන ගන්න පුළුවන්. ජනතාවගේ කැමැත්ත තියෙනවා නම් ජනාධිපතිට දිගටම ඉන්න පුළුවන් නැත්නම් ඉවත් වෙලා යන්න වෙනවා,'' යැයි දෙමළ ප්‍රගතිශීලි සන්ධානයේ නායක පාර්ලිමේන්තු මන්ත්‍රී මනෝ ගනේෂන් මෙහිදී ප්‍රකාශ කොට තිබේ.
ආර්ථික අර්බුදයෙන් ගොඩ ඒමට ලංකාවේ ජනතාව වෙනුවෙන් ඉන්දියාව ලබා දෙන සහනාධාර වැඩසටහන් ගැන ස්තුතිය පළ කළ කඳුකර නායකයෝ ඉන්දීය මහ කොමසාරිස්වරයාගෙන් ඉල්ලා සිටියේ දිගටම සහන ලබා දෙන ලෙසයි.
මනෝ ගනේෂන්ට අමතරව පලනි දිගම්බරම්, වේලුසාමි රාධාක්‍රිෂ්ණන් සහ මයිල්වාගනම් උදය කුමාර් ඇතුළු දෙමළ ප්‍රගතිශීලි සන්ධානයේ නායකයන් එක්ව සිටී මෙම හමුවේදී පවතින ආර්ථික හා දේශපාලන අර්බුදයෙන් මිදීමට කඳුකර දෙමළ ජනයාට අවශ්‍ය කෙරෙන වැඩසටහන් ගැන ද අවධානය යොමු වී තිබේ.
The LEADER Whatsapp Group එකට එකතුවෙන්න.
