කෙරෝනා වෛරස් ව්‍යාප්තිය ලෝකය පුරා දිනෙන් දින වැඩි වෙමින් පවතින බැවින් එම තත්වය සැහැල්ලුවෙන් සැලකීමට නොහැකි බව
පෙන්වා දෙන හිටපු අගමැතිවරයා, සෞඛ්‍ය අංශ විසින් පෙන්වා දී ඇති පරිදි අප්‍රේල් 04 සහ 11 අතර කාලය තුලදී මෙම වෛරසය ශ්‍රී ලංකාවේ උපරිමයට ලඟා විය හැකි බව අවධාරණය කරයි.
එම තත්වයට මුහුණ දීම සදහා වහාම ක්‍රියාත්මක වන පරිදි රජයේ සහ පෞද්ගලික සෞඛ්‍ය සේවා ඒකාබද්ධ සැලැස්මක් සකස් කොට සෞඛ්‍ය සේවා අධ්‍යක්ෂ ජනරාල්වරයාගේ අධීක්ෂණය සහ සම්බන්ධිකරණය යටතේ ක්‍රියාවට නැංවිය යුතු බව එක්සත් ජාතික පක්ෂයේ නායක හා හිටපු අග්‍රාමාත්‍ය රනිල් වික්‍රමසිංහ පවසයි.
එක්සත් ජාතික පක්ෂයේ නායකයා මේ බව අවධාරණය කර ඇත්තේ පාර්ලිමේන්තුව නියෝජනය කළ පක්ෂ නායකයන් හා නියෝජිතයන්ගේ ප්‍රධානත්වයෙන් පසුගියදා අරලිය ගහ මන්දිරයේ පැවැති සර්ව පාක්ෂික හමුවේදී තමන් විසින් සිදු කළ යෝජනා සම්බන්ධයෙන් 2020 මාර්තු මස 27 වන දින සමාජ මාධ්‍ය ඔස්සේ විශේෂ වීඩියෝ ප්‍රකාශයක් කරමිනි.
අවුරුදු සමයේ අවදානම !
හිටපු අගමැතිවරයා නැවත වරක් රජයට දැනුම් දී ඇත්තේ සිංහල හා දෙමළ අලුත් අවුරුද්ද, පාස්කු හා රාමසාන් උත්සව සම්බන්ධයෙන් ක්‍රියාත්මක කරන සෞඛ්‍යාරක්ෂිත වැඩ පිළිවෙල සම්බන්ධයෙන් දැන් සිටම ජනතාව දැනුවත් කළ යුතු බවයි.
පුද්ගලික රෝහල් වෙතින් නොමිලයේ පරීක්ෂණ සේවා ලබා ගැනීමේ ක්‍රමවේදයක් සකසා එහි වියදම රජය මගින් දැරීමේ ක්‍රමවේදයක් යෝජනා කරන හිටපු අගමැතිවරයා පෙන්වා දෙන්නේ ඒ පිළිබදව පොදු වැඩ පිළිවෙලක් සැකසීමට වහාම අදාල සියළු පාර්ශව සමග සාච්ඡා කළ යුතු බවයි.
පරීක්ෂණ කටයුතු සදහා අවශ්‍ය ප්‍රමිතිගත උපකරණ ගෙන්වීම සදහා රාජ්‍ය හා පෞද්ගලික සෞඛ්‍ය අංශ දිරිමත් කරන ලෙස රජයෙන් ඉල්ලා සිටින රනිල් වික්‍රමසිංහ, තව දුරටත් යෝජනා කර ඇත්තේ මුඛ ආවරණ සහ ශ්වසනාධාරක ගෙන්වා ගැනීම හා ලංකාවේ නිශ්පාදනය කිරීම ගැන කඩිනම් පියවර ගත යුතු බවයි.
අධිසත්කාර ඇදන් ප්‍රමාණයද ඉහළ දැමීමට කටයුතු කරන ලෙස ද හිටපු අගමැතිවරයා සිය විශේෂ නිවේදනය මගින් අණ්ඩුවෙන් ඉල්ලා සිටී.
ඉන්දියාව ගැන කල්පනාවෙන් :
ඉන්දියාවේ කෙරෝනා වෛරස් ආසාදිතයන් ගණන මේ වන විට 700 ට අධික බැවින් ඒ රටේ තත්වය ගැන ශ්‍රී ලංකාව විශේෂ අවධානයක් යොමු කළ යුතු බව එක්සත් ජාතික පක්ෂයේ නායක හා හිටපු අග්‍රාමාත්‍ය රනිල් වික්‍රමසිංහ පවසයි.
එමනිසා දෙරටේ ධීවරයන් සාගරයේදී සමීපව කටයුතු කිරීම වලක්වාලීම සඳහා පියවර ගන්නා ලෙස ඔහු ආණ්ඩුවෙන් ඉල්ලා සිටී.
ලෝක ඉතිහාසයේ පළමු වරට ඔලිම්පික් උළෙල කල් දැමීමට තීරණය කර තිබෙන බැවින් ඒ වෙනුවෙන් ගෙන්වන ලද සෞඛ්‍ය උපකරණ ගණනාවක් ජපානය සතු බව පෙන්වා දෙන එක්සත් ජාතික පක්ෂයේ නායකයා අවධාරණය කරන්නේ ඒවායින් කිසියම් ප්‍රමාණයක් මේ අවස්ථාවේ ශ්‍රී ලංකාවට ලබා ගත හැකිදැයි විමසා බැලිය යුතු බවයි.
ඒ සම්බන්ධයෙන් තමන් මේ වන විටත් ශ්‍රී ලංකාවේ ජපන් තානාපතිවරයාට දන්වා ඇති බව එජාප නායක නිවේදනයේ තව දුරටත් සදහන්ය.
#######################################################
හරිදේ හරිහැටි දැනගෙන ක්‍රියාත්මකවන්න
නිහඬ පතූරුවන්නන්(silent spreaders)
ලොව පුරා නව කොරෝනා වෛරස ආසාදිතයන් සංඛ්‍යාව වැඩිවෙමින් පවති. අද (මාර්තු 26දා) මෙරට වේලාවෙන් උදේ 8.00 වනවිට ආසාදිත වී ඇති බව තහවුරු කෙරුණු සංඛ්‍යාව 468,523කි.
(මූලය: Johns Hopkins Resource Center).
මේ අනුව, ලොව කොයි රටක වුණත් නිල හෝ නිල නොවන විවිධ මූලයන්ගෙන් හා මාර්ගවලින් දැක්වෙන්නේ වෛරසය ආසාදිත වී ඇති බව “දන්නා” සංඛ්‍යාවයි.ඒත් අප වැඩිදෙනා තේරුම් ගෙන ඇති ආකාරයට වෛරසයේ රෝග ලක්ෂණ පෙන්නුම් කිරීමට සති දෙකක් දක්වා කාලයක් ගතවෙයි.
මෙයින් අදහස් වෙන්නේ, රෝග ලක්ෂණ දක්වන්නේ නැති එහෙත් දැනුවත්ව හෝ නොදැනුවත්ව රෝගය අනුන්ට බෝකරමින් ඉන්නට ඉඩ තිබෙන පිරිසයි.
වෙන වචන වලින් කියතහොත් මේ තමයි
‘නිහඬ පතූරුවන්නන්' (silent spreaders).(ලෝක සෞඛ්‍ය සංවිධානයේ වෙබ් අඩවිය ආශ්‍රයෙන් තතු කණ්ඩායම)
