නව කැබිනට් මණ්ඩලය අද (අගෝස්තු 12) මහනුවර ශ්‍රී දළදා මාලිගය අබියස දී දිවුරුම් දීමට නියමිත අතර එහිදී
ශ්‍රී ලංකා නිදහස් පක්ෂයේ නායක, හිටපු ජනාධිපති මෛත්‍රීපාල සිරිසේනට ඇමති ධුරයක් හිමි නොවනු ඇතැයි වාර්තාවේ.
හිටපු ජනාධිපති මෛත්‍රිපාල සහ අගමැති මහින්ද රාජපක්ෂ අතර අරලියගහ මන්දිරයේ ඊයේ (11 වැනිදා) පැවැති උත්සවයකදී ද ඇමැති ධුර පිළිබඳව සුළු වේලාවක් කතා බහකද නිරත වී ඇත.
නව ඇමැති මණ්ඩලය පත්කිරීමේදී ශ්‍රී ලංකා නිදහස් පක්ෂයට ඇමැතිධුර 3ක් හිමි වෙයි. රාජ්‍ය ඇමැති ධුර දෙකක් හිමි වන බවද කියයි.
කැබිනට් ඇමැතිධුර තුනට හිටපු ජනාධිපති මෛත්‍රිපාල සිරිසේන, නිමල් සිරිපාලද සිල්වා සහ දයාසිරි ජයසේකර පත් කරන ලෙස දන්වා ශ්‍රී ලංකා නිදහස් පක්ෂය ඊයේ (11 ) ශ්‍රී ලංකා පොදුජන පෙරමුණට ලිපියක්ද යොමු කර ඇතැයි වාර්තාවේ.
කෙසේ වෙතත් රාජ්‍ය ඇමැතිධුර දෙකට දයාසිරි ජයසේකර හා රංජිත් සියඹලාපිටිය පත් කිරීමට නියමිතව ඇත.
නව කැබිනට් මණ්ඩලයේ සංයුතිය :
ජනාධිපති ගෝඨාභය රාජපක්ෂ විසින් තම නව කැබිනට් මණ්ඩලයේ සංයුතිය අති විශේෂ ගැසට් පත්‍රයක් මගින් ප්‍රකාශ කිරීම යම් තාක් දුරකට ක්‍රමවත්ව සිය පාලනය ගෙනයාමට සූදානම් යයි ඉඟිකිරීමක් බව දේශපාලන විශ්ලේෂකයෝ පවසති.
සිය 'සෞභාග්‍යයේ දැක්ම' ප්‍රතිපත්ති ප්‍රකාශය ඉදිරියට ගෙනයෑම සඳහා 28 දෙනෙකුගෙන් යුත් අමාත්‍ය මණ්ඩලයක් සහ 40 දෙනෙකුගෙන් යුත් රාජ්‍ය අමාතවරුන් පිරිසකුත් පත්කිරීමට යෝජිත බව ජනාධිපතිවරයා නිකුත් කළ ගැසට් නිවේදනයේ දැක්වේ.
නියෝජ්‍ය අමාත්‍යවරුන් සම්බන්ධයෙන් එම ගැසට් නිවේදනයේ කිසිවක් සඳහන් නොවේ.
රජයේ ප්‍රවෘත්ති දෙපාර්තමේන්තුව පවසන්නේ ජනාධිපතිවරයා සහ අගමැතිවරයා දරන අමාත්‍යාංශ ද කැබිනට් අමාත්‍ය පදවි 28 ට ඇතුළත් වන බවය.
'ගුණාත්මක සේවාවක් ඉටුකිරීම'
ග්‍රාමීය ජන ජීවිතය හා කෘෂි ආර්ථිකය සවිබල ගැන්වීම සහ සමස්ථ සමාජ හා ආර්ථික සංවර්ධනයට දායක වීමට අමාත්‍යාංශ ලේකම් වරුන්ට බලය ලබාදෙන බවත් ගැසට් නිවේදනයේ දැක්වේ.
නව කැබිනට් මණ්ඩලයේ සංයුතිය පිළිබඳව 'බීබීසී සිංහල' සේවය සමඟ අදහස් දක්වමින් කොළඹ විශ්වවිද්‍යාලයේ ජාත්‍යන්තර සබඳතා අංශයේ කථිකාචාර්ය මැණික් වක්කුඹුර කියා සිටියේ, විෂය ක්ෂේත්‍රය ප්‍රකාශ කිරීමේදී එහි ප්‍රමාණාත්මක වටිනාකම මෙන්ම එමගින් ගුණාත්මක සේවාවක් ඉටු කිරීමේ හැකියාවත් ඉතාමත් වැදගත් වන බවය.
දේශීය වශයෙන් තම විෂය පථය ක්‍රියාත්මක වීමෙන් ජනතා අභිවෘධිය උදෙසා කටයුතු කිරීම මෙන්ම ජාත්‍යන්තර සබඳතා මූලාශ්‍රයක් ලෙස දේශීය අමාත්‍යාංශ ක්‍රියාත්මක වීමේදී විදේශ කටයුතු අමාත්‍යාංශයේ ක්‍රියාකාරිත්වය පමණක් නොව අනෙකුත් අමාත්‍යාංශයන් හි, එනම්, ආයොජන ප්‍රවර්ධන, වෙළෙඳ, සංචාරක, කාන්තා, කම්කරු, සෞඛ්‍ය, ක්‍රීඩා සහ වෙනත් අමාත්‍යාංශයන්ට "රටේ දැක්ම" ජාත්‍යන්තරයට ගෙන යා හැකි අයුරින් සකස් විය යුතු බවත් කථිකාචාර්යවරිය සඳහන් කළාය.
මෙහිදී එම අමාත්‍යාංශයේ නායකත්වයේ හැකියාව, ප්‍රතිපත්ති ගරුක බව, මානව සම්පත් කළමනාකාරණ හැකියාව, කාර්යක්‍ෂමතාවය, ප්‍රතිපත්තිවල ස්ථාවරත්වය වැනි කරුනු ඉතාමත් වැදගත් වන බවත් කථිකාචාර්ය මැණික් වක්කුඹුර පෙන්වා දුන්නාය.
දිස්ත්‍රික් ලේකම් කාර්යාල සහ ප්‍රාදේශීය ලේකම් කාර්යාල ආරක්ෂක අමාත්‍යංශය යටතට
ගෝඨාභය රාජපක්ෂ ජනාධිපති පදවියට පත්වීමෙන් පසුව පිහිටවන ලද පළමුවන කැබිනට් මණ්ඩලයට ආරක්ෂක අමාත්‍යවරයෙකු පත් නොකළ නමුත් පළමු වරට ආරක්ෂක අමාත්‍යංශයක් නම්කිරීම තුළින් ඒ සඳහා අමාත්‍යවරයෙකු පත්කිරීමට ඉඩ ඇති බවට ඉඟි කොට තිබේ.
නැවතත් පොලිසිය ආරක්ෂක අමාත්‍යංශය යටතට පත්කොට ඇති අතර අභ්‍යන්තර ආරක්ෂක, ස්වදේශ කටයුතු හා ආපදා කලමනාකරණ නමින් රාජ්‍ය අමාත්‍යංශයක් පිහිටුවා තිබේ.
ඒ අනුව, සියලුම දිස්ත්‍රික් ලේකම් කාර්යාල සහ ප්‍රාදේශීය ලේකම් කාර්යාල අරක්ෂක අමාත්‍යංශය යටතට පවරා තිබේ. මීට පෙර දිස්ත්‍රික් ලේකම් කාර්යාල සහ ප්‍රාදේශීය ලේකම් කාර්යාල පැවතියේ පළාත් පාලන ආයතන අමාත්‍යාංශය යටතේය.
''සියලුම දිස්ත්‍රික් ලේකම් කාර්යාල සහ ප්‍රාදේශීය ලේකම් කාර්යාල අරක්ෂක අමාත්‍යංශය යටතට පවරා තිබේ. මීට පෙර දිස්ත්‍රික් ලේකම් කාර්යාල සහ ප්‍රාදේශීය ලේකම් කාර්යාල පැවතියේ පළාත් පාලන ආයතන අමාත්‍යාංශය යටතේය.''
මුදල් අමාත්‍යාංශය නැවතත් අගමැති මහින්ද රාජපක්ෂ යටතට නැවතත් පත්කිරීමට නියමිත අතර මුදල් අමාත්‍යංශය යටතේ රාජ්‍ය ඇමතිවරුන් දෙදෙනෙකු පත්කෙරෙනු ඇත.
අධිකරණ අමාත්‍ය පදවිය අලි සබ්‍රිට :
ශ්‍රී ලංකා පොදු ජන පෙරමුණේ ජාතික ලැයිස්තුවෙන් පත් කළ මන්ත්‍රී, ජනාධිපති ගෝඨාභය රාජපක්ෂගේ හිතවතෙකු වන ජනාධිපති නීතීඥ අලි සබ්‍රි අධිකරණ අමාත්‍ය පදවියට පත්කිරීමට ඉඩ ඇතැයි මාධ්‍ය වාර්තාවල දැක්වෙන අතර, ඒ පිළිබඳව මුලින්ම අනාවැකිය පළ කලේ ජනාධිපතිවරයා ගේ සමීපතමයකු වන ව්‍යාපාරික දිලිත් ජයවීර තම මුහුණුපොතේ සටහනක් තබමිනි.
දිලිත් ජයවීර පවසන්නේ අලි සබ්‍රි "ජාතිකවාදය පිළිගන්නා අතරම, මුස්ලිම් ජනතාවත් ජාතිකවාදී ව්‍යාපාරයට ගෙන ඒමට අනාගතයේ නායකත්වය දරාවි. inclusive nationalism මතවාදයත් එක්ක ඔහු අධිකරණ ඇමති ධූරය ලබා ගත්තොත් මේ රටට යහපතක් සිදු වේවි," යනුවෙනි.
කෙසේ වුවත් ඔහු අධිකරණ අමාත්‍ය පදවියට පත්කිරීම පිළිබඳව ඇතැම් පිරිසක් විරෝධය පළකරමින් සිටිති.
ජී එල් පීරිස් අධ්‍යාපන අමාත්‍ය පදවියට:
මහාචාර්ය ජී එල් පීරිස් අධ්‍යාපන අමාත්‍ය පදවියට පත්කිරීමට ඉඩ තිබෙන බවට දේශපාලන විචාරකයන් ප්‍රකාශකරන අතර එම අමාත්‍යංශයට රාජ්‍ය අමාත්‍යවරුන් සිව් දෙනෙකු පත් කිරීමට නියමිතයි.
කාන්තා හා ළමා සංවර්ධන, පෙර පාසැල් හා ප්‍රාථමික අධ්‍යාපන, පාසැල් යටිතල පහසුකම් හා අධ්‍යාපන සේවා ලෙස කාන්තාවන් සහ ළමුන් වෙනුවෙන් වෙනමම රාජ්‍ය අමාත්‍යාංශයක් පිහිටුවීමත් දහම් පාසැල්, භික්ෂු අධ්‍යාපන, පිරිවෙන් හා බෞද්ධ විශ්ව විද්‍යාල සඳහා වෙනම රාජ්‍ය අමාත්‍යාංශයක් පිහිටුවීම විශේෂත්වයකි.
සෞඛ්‍ය අමාත්‍යංශය යටතේ රාජ්‍ය අමාත්‍යංශ දෙකක් පිහිටුවීමට නියමිතය.
අමාත්‍යාංශ වෙන් කෙරෙන ආකාරය
නාමල් රාජපක්ෂ මන්ත්‍රීවරයාට ද අමාත්‍ය පදවියක් හිමිවනු ඇතැයි විශ්වාස කෙරෙන නමුත් තමන්ට අමාත්‍ය පදවියක් ලබා දීමට පෙර 2018 දී සිය පියාට උපකාර කළ පුද්ගලයින්ට අමාත්‍යාංශ ලබාදිය යුතුයැයි ඔහු මාධ්‍ය හමුවේ පැවසීය.
මහින්ද රාජපක්ෂ 2015 පරාජයට පත්වීමෙන් පසු ඔහු වෙනුවෙන් පෙනී සිටි ඒකාබද්ධ විපක්ෂයේ මන්ත්‍රීවරුන් 53 දෙනා වෙනුවෙන් පෙනී සිටීමට මන්ත්‍රී නාමල් රාජපක්ෂ තීරණය කොට ඇත.
ඒ අනුව නාමල් රාජපක්ෂට කැබිනට් ඇමැතිකමක් ලබා දෙන ලෙසට යෝජනා රැසක් ඉදිරිපත්ව තිබුණද හෙතෙම එම තනතුර බාරගන්නේ අදාළ 53 දෙනා වෙනුවෙන් සාධාරණය ඉෂ්ට වීමෙන් පසුව පමණක් බවද දැනගන්නට තිබේ.
මීට අමතරව මෙවර මැතිවරණ ප්‍රතිපලවලට අනුව අදාළ 53 දෙනා නියෝජනය කළ කදවුරේ සිටි පද්ම උදය ශාන්ත සහ නිරෝෂන් ප්‍රේමරත්න යන මහත්වරුන් පරාජයට පත්ව තිබීම නිසා ඒ දෙදෙනා වෙනුවෙන් පෙනී සිටීමටද ඒ දෙදෙනාට සාධාරණය ඉෂ්ට කිරීමටද නාමල් රාජපක්ෂ තීන්දු කොට ඇත.
පිල්ලෙයාන්ට හා ප්‍රේමලාල්ටත් ඇමති ධුර :
මිනීමැරුම් චෝදනා යටතේ දැනට රක්ෂිත බන්ධනාගාරගත කොට සිටින පිල්ලෙයාන් හෙවත් සිවනේසතුරෙයි චන්ද්‍රකාන්තන් සහ මරණ දඬුවමට ලක්ව එයට අභියාචනයක් ඉදිරිපත් කර ඇති ප්‍රේමලාල් ජයසේකරට ද අමාත්‍ය පදවි හිමිවනු ඇතැයි විශ්වාස කෙරේ.
සිය පියාගේ අභාවයෙන් පසුව ප්‍රථම වරට පාර්ලිමේන්තුවට තේරී පත් වූ හිටපු අමාත්‍ය ආරුමුගම් තොණ්ඩමන් ගේ පුත් ජීවන් තොණ්ඩමන් ට ද ඇමති ධුරයක් හිමිවනු ඇතැයි අපේක්ෂිතය.
(උපුටා ගැනීම් - BBC සිංහල සේවය)
