මාධ්‍යවේදී ප්‍රගීත් එක්නැළිගොඩ අතුරුදහන් කරලා දශකයක් ගෙවී ගොස් හමාරය.
මේ දස අවුරුද්ද පුරාම ඔහුගේ බිරිඳ සන්ධ්‍යා එක්නැළිගොඩ තමන්ගේ දරුවෝ දෙන්නත් සමග ප්‍රගීත්ට වෙච්ච දේ හොයන්න උත්සාහ දරයි.
ප්‍රගීත් නැතුව ප්‍රගීත්ට වෙච්ච දෙයක් දන්නෙ නැතුව ලෝකය අඳුරේ නොතබා ආලෝකයක් සොයා යාමට අරගල කළ සන්ධ්‍යාගේ අවුරුදු දහය ගැන 'සිලෝන් නිව්ස්'කළ විමසීමක දී ඇය මෙසේ පැවසුවාය.
“මට විවේකයක් නැතිව හැම මොහොතෙම කොහොමද අරගලය ඉදිරියට ගෙනියන්නේ, කොහොමද ප්‍රගීත් අතුරුදහන්වීම අතුරුදහන් නොවී තියෙන්න මොනදේද මම කරන්න ඕනේ, මොන හැඩයද ඒ අරගලයට දෙන්න ඕනේ කියන එක දිවා රෑ හැම මොහොතෙම හිතමින් ගෙවුන අවුරුදු දහයක්....
ප්‍රගීත් අන්තිම වතාවට ගෙදරින් පිටත් වුනේ 2010 ජනවාරි 24 දා.
ප්‍රගීත් වගේ අතුරුදහන් වෙච්ච පුද්ගලයන් උගස් කරලා බලය ගත්ත පහුගිය යහපාලන ආණ්ඩුවත් බලය ගත්තට පස්සේ හිටියේ ඒ ගැන උනන්දුව අතුරුදහන් කරලා වාගේ.
ප්‍රගීත් පැහැර ගැනීම සම්බන්ධයෙන් අත් අඩංගුවට ගත්තු හමුදා බුද්ධි අංශ පිරිසක් අධි චෝදනා ගොණු වෙලා උසාවියේ.''
''ප්‍රගීත් වගේ අතුරුදහන් වෙච්ච පුද්ගලයන් උගස් කරලා බලය ගත්ත පහුගිය යහපාලන ආණ්ඩුවත්
බලය ගත්තට පස්සේ හිටියේ ඒ ගැන උනන්දුව අතුරුදහන් කරලා වාගේ.''
සන්ධ්‍යා එක්නැළිගොඩ නම් ඒ දිරිය ගැහැණිය 2020 අගෝස්තු 02 දා සහ 03දා ප්‍රගීත් එක්නැළිගොඩ පැහැර ගැනීම පිළිබඳ ත්‍රීපුද්ගල විශේෂ මහාධිකරණ නඩුවෙහි සාක්ෂි දුන්නාය. ඒ, ප්‍රගීත්ගේ අතුරුදහන් වීම සම්බන්ධයෙන් ශ්‍රී ලංකා ජනරජය විසින් ගොනු කරන ලද නඩුවේ පළමු සාක්ෂිකාරිය ලෙසය.
ජගත් සම්මානලාභී මානව හිමිකම් ක්‍රියාධාරිනී සන්ධ්‍යා එක්නැලිගොඩ, අගෝස්තු 02 බදාදා සාක්ෂි ලබා දීමෙන් අනතුරුව මාධ්‍ය හමුවේ පැවසුයේ, සිය සැමියා වෙනුවෙන් යුක්තිය පතා දස වසරකට අධික කාලයක් තිස්සේ සිදු කරන අරගලයේ සැනසුම්දායකම දිනය එදින බවයි.
මාධ්‍යවේදී ප්‍රගීත් එක්නැලිගොඩ අතුරුදහන් කර දින 3873ක් ගත වෙද්දී, ඔහුගේ අතුරුදහන් වීම සම්බන්ධයෙන් ශ්‍රී ලංකා ජනරජය විසින් ගොනු කරන ලද නඩුවේ පළමු සාක්ෂිකරු ලෙස අගෝස්තු 2 බදාදා තමා සාක්ෂි ලබා දුන් බව ඇය වැඩි දුරටත් පැවසුවාය.
''සිය සැමියා වෙනුවෙන් යුක්තිය පතා දස වසරකට අධික කාලයක් තිස්සේ සිදු කරන අරගලයේ සැනසුම්දායකම දිනය සාක්ෂි ලබා දුන් දවස වූ බවයි ජගත් සම්මානලාභී මානව හිමිකම් ක්‍රියාධාරිනී සන්ධ්‍යා එක්නැලිගොඩ පවසන්නේ.''
දශකයක් පුරා සැමියා සොයමින් යන අරගලයේදී ගරහන පිරිමි රොත්තක් සමඟ පොර බදන්න සිදුවු බව ඇය පවසන්නීය.
“මට සටන් කරන්න වෙලා තිබුනේ මට විරුද්ධව පෙළ ගැහෙන පුරුෂ පාර්ශවයක් සිටින රටක. ඒක තමයි ලොකුම අභියෝගය. මාධ්‍යම පාවිච්චි කරලා මඩ ගහන, හිරිහැර කරන රටක තමා මගේ සටන කරගෙන යන්න තිබුණේ.” එම අභියෝග මැඩගෙන ඉදිරියට යන ඇය සිනාවක් පාමින් කියා සිටියාය.
ප්‍රගීත් ගේ අතුරුදහන් වීමෙන් පසුව ඇයට තම දරු දෙදෙනාට මව මෙන්ම පියා ද වීමටද සිදුවිය.
එහෙත් තාත්තා කෙනෙකුගේ භුමිකාව තමන්ට ඉටු කළ නොහැකි වුවද යම් තාක් දුරකට ඔවුන්ට පියා නැති අඩුව පුරවාලිය හැකි වු බවට ඇය විශ්වාසය පළ කළාය.
'වසරේ දිරිය කාන්තාව': සන්ධ්‍යාට ඇමෙරිකාවෙන් සම්මානයක්
තම සැමියා සොයමින් යන ධෛර්ය සම්පන්න ගමනේදී සන්ධ්‍යා එක්නැළිගොඩ ලොව ඉහලම සම්මානය පත්‍ර විය.
ශ්‍රී ලංකාවේ යුද්ධයෙන් ද ඊට පෙර කැරලි වලින්ද අතුරුදහන් දහස් සංඛ්‍යාත ජනකායකගේ ඥාති සමුහයාගේ සංකේතයක් බවට පත්වූ කාන්තාවක් ලෙසින් සන්ධ්‍යා එක්නැලිගොඩ එක්සත් ජනපද ජගත් දිරිය කත සම්මානයෙන් 2017 වසරේදී පුද ලද්දීය.
සම්මානය සඳහා ඇය තෝරාගැනීමට හේතු පාදක වූයේ අතුරුදහන් සිය සැමියා ප්‍රගීත් එක්නැලිගොඩ සම්බන්ධ සත්‍යය හෙළි කරගැනීමට බාධා පෑ බලධාරීන්ගේ අවහිර නොතකා අසූ වතාවකට වඩා උසාවි ගානේ යමින් සන්ධ්‍යා විදහා දැක්වූ ධෛර්යය බව යයි ඇමරිකා එක්සත් ජනපද සහකාර රාජ්‍ය ලේකම් තෝමස් ඒ ෂැනොන් විසින් ප්‍රකාශ කරන ලදී.
තම අරගලය ප්‍රගීත් වෙනුවෙන් යුක්තිය ඉටු කිරීමට සිමා නොවී ජාති ආගම් වලින් තොරව හඬක් නැති සියලු ශ්‍රි ලාංකිකයන් වෙනුවෙන් කරන සටනක් බව සන්ධ්‍යා 'සිලෝන් නිව්ස්' වෙත අවධාරණයෙන් කියා සිටියේ ය.
“යුක්තිය සහ සාධාරණත්වය දිනාගත යුතු දෙයක් එක කවුරුවත් බන්දේසියක තියලා දෙන්නේ නෑ. එක හරි අමාරුයි එත් අපි දිනාගත යුතුයි. එක කවදාද කොහොමද කියන්න බෑ . එත් ඒක අනිවාර්යයෙන්ම මේ රටේ ඉටු වෙනවා.” දස වසරක් තිස්සේ නොසැලී සටන් වඳින සන්ධ්‍යා එක්නැළිගොඩ ජයග්‍රහණයේ බලාපොරොත්තු දෑස දල්වමින් කියා සිටියාය.
(රොෂාන් චතුරංග -ceylonnews.lk)
සබැඳි පුවත් :
එක්නැලිගොඩ අතුරුදහන් කරවීම ගැන සාක්කියට සන්ධ්‍යා මුල්වරට මහාධිකරණයේ
ප්‍රගීත් එක්නැලිගොඩ: පස් වසක් නිහඬ තිස් වසක අරගලකාරී ජීවිතයක්
