අයිතිවාසිකම් දිනාගැනීමට අරගලයේ යෙදුනු සිරකරුවන් පිරිසක් මර්දනය සඳහා බලධාරීන් දැඩි මර්දනයක් දියත් කරනු ඇති බවට බිය පලවී තිබේ.
එය වැලැක්වීම සඳහා එක්සත් ජාතීන්ගේ සංවිධානය ඇතුළු ජාත්‍යන්තර සංවිධානවල මැදිහත් වීම ඉල්ලීමට දේශීය සංවිධානයක් ඉදිරිපත් වී සිටී.
මරණීය දණ්ඩනය අත්හිටුවීම ඇතුළු සිර දඬුවම් ලිහිල් කිරීම වෙනුවෙන් ඉල්ලීම් මාලාවක් ඉදිරිපත් කරමින් මාසයකට වැඩි කාලයක් වැලිකඩ හිරගෙදර වහලය මත විරෝධතා පැවැත්වූවන් සති අන්තයේදී කැරලි මර්දන පොලිසිය හා අමතර බන්ධනාගාර නිලධාරීන් 200ක් පමණ යොදවා බිමට බස්සවා තිබුණි.
බන්ධනාගාර මාධ්‍ය ප්‍රකාශක, චන්දන ඒකනායක මාධ්‍යවේදීන් සමග පවසා තිබුනේ “පහරක්වත් නොගසා, කරුණු පහදා දී” විරෝධතාව නිම කිරීමට පියවර ගත් බවයි.
කෙසේ වෙතත්, විරෝධතාකාර රැඳවියන් බිමට බැස්ස පසු වතුර පොදක් වත් දී නොමැති බවට චෝදනා කරන සිරකාර හිමිකම් ක්‍රියාධාරීහු, මර්දනය තවත් දැඩි වනු ඇති බවට බිය පල කරමින් දේශීය හා ජාත්‍යන්තර මානව හිමිකම් සංවිධානවලට වහාම මැදිහත් වන ලෙස ආයාචනා කර තිබේ.
“බන්ධනාගාරය අභ්‍යන්තරයේ රැඳවියන්ගෙන් අපට ලැබෙන තොරතුරු අනුව ආණ්ඩුව පමණට වඩා ප්‍රචණ්ඩත්වය යොදවා වැලිකඩ බන්ධනාගාරය නැවතත් ලේ විලක් බවට පත් කෙරෙනු ඇතැයි බිය පල වෙයි,” යනුවෙන් සිරකරු අයිතිවාසිකම් සුරැකීමේ කමිටුව (CPRP) ශ්‍රී ලංකා මානව හිමිකම් කොමිසම, ජාත්‍යන්තර රතු කුරුස සංවිධානය සහ එක්සත් ජාතීන්ගේ සංවිධානයට ලියන ලද ලිපියක දැක්වේ.
“මේ සන්දර්භය යටතේ, සිරකරුවන්ගේ ජීවිත රැක ගැනීම සඳහාත්, විරෝධතාවයේ නිරත වූවන් සහ ඔවුන්ට සහාය දැක්වුවන්ගෙන් පලිගැනීම වැලක්වීමටත් වහාම මැදිහත්වන ලෙස අපි ඔබට ආයාචනය කර සිටිමු. දිගු කාලීන වශයෙන් ගත් කල, (විරෝධතා මගින් අවධාරණය කරන ලද) සිරකරුවන් විසින් දීර්ඝ කාලයක් තිස්සේ මුහුණ දී සිටින ප්‍රශ්න විරෝධතා නැවත්වීම අරමුණු කොට ගත් හිස් පොරොන්දු වලට සීමා නොවී, කාල රාමුවක් සහිතව, ඔබේ සංවිධාන වල අධීක්ෂණය යටතේ වූ පාරදෘශ්‍ය සැලසුමක් මගින් විසඳා ලීමට මැදිහත් වන මෙන් උදක්ම ඉල්ලා සිටිමු.”
පසුගිය අවුරුද්දේ විරෝධතා පැවැත්වූ සිරකරුවන්ට වෙඩිතබා, පහරදී, වධහිංසා පැමිණවූ බවද සිරකරු අයිතිවාසිකම් සුරැකීමේ කමිටුවේ සභාපති නීතිඥ සේනක පෙරේරා අත්සන් තබා ඇති ලිපියෙන් සිහිපත් කර දී තිබේ.
THE LEADER TV
ස" ට තරු පේන්න විමලා ලියූ ලියුම | මොණරවිලගේ ලියමන
ස" ට මොළේ ඇත්තෙම නැද්ද ? | මොණරවිලගේ ලියමන
37
