ඉදිරි ජනාධිපතිවරණයේ පොහොට්ටුවේ අපේක්ෂකයා වන ගෝඨාබය රාජපක්ෂ, තම මංගල රැලියේදී පවසන්නේ තමා ජනාධිපති ලෙස තේරී පත් වුව හොත් සිරගත කරන ලද සියලු හමුදා භටයන් එදිනම නිදහස් කරන බවයි.
මේ හමුදා භටයන් "අභූත" චෝදනා මත සිරගත කර ඇතැයි පොහොට්ටුවේ ජනාධිපති ධුර අපේක්ෂකයාගේ තර්කයයි.
රැඳවුම් භාරයේ සිටින මේ හමුදා භටයන් ගැන ගෝඨාබය රාජපක්ෂ නොකී දේ මෙලෙසය.
පොලීසිය විසින් අත්අඩංගුවට ගත සෙබළුන් 42 අතර දැනට 7 දෙනෙකු තවමත් සිරභාරයේ සිටින අතර, අන් සියලු දෙනා ඇප මත නිදහස් කොට ඇත. තවද ඒ අතර තම රාජකාරීවල නිරත වීමේදී සිදු වූ වැරදි සම්බන්ධයෙන් අත්අඩංගුවට ගත් එක් නිලධාරියකු වත් නොසිටියි.
දැනට සැක පිට අධිකරණය ඉදිරිපත් කර ඇත්තේ මාධ්‍යවේදීන් ඝාතනය කිරීම, මාධ්‍යවේදීන්ට ප්‍රහාර එල්ල කිරීම, මාධ්‍යවේදීන් පැහැර ගෙන යෑම සහ කප්පම් සඳහා තරුණයන් පැහැර ගැනීමේ චෝදනාවලට සම්බන්ධ සෙබළුන් අතළොස්සක් පමණි. මෙවැනි අපරාධවලට සම්බන්ධ වීම සොල්දාදුවගේ නිල රාජකාරීන් නොවන අතර, ඒවා සැබවින්ම දේශපාලන වුවමනා හෝ අණ දීම් මත සිදු වූ අපරාධ බව මැනවින් පැහැදිලි වේ.
පොරොන්දුව නැවතත් විමසා බලමු:
එහෙත් මේ කරුණුද මොහොතක් පසෙක තබා, අනුරාධපුරයේදී ගෝඨාබය රාජපක්ෂ දුන් පොරොන්දුව නැවතත් විමසා බලමු.
පොහොට්ටුවේ ජනාධිපති ධුර අපේක්ෂකයා ප්‍රතිඥා දුන්නේ, තමා නොවැම්බර් 17 දින අත්අඩංගුවේ සිටින සෑම හමුදා භටයකුම "නිදොස් කොට නිදහස්" කරනු ඇති බවයි.
ජනාධිපති බලතල යටතේ ජනාධිපති සමාවක් දිය හැක්කේ අධිකරණ ක්‍රියාමාර්ගයක් මඟින් වරදකරු වී දණ්ඩනයක් ලැබූ පසුවය. එසේ නැතිව පවත්වාගෙන යනු ලබන විමර්ශනයක සැකකරුවන්, අධිකරණයක් විසින් රැඳවුම් භාරේ තබා ඇති විටකදී, ඔවුන් නිදහස් කිරීමට කිසිදු බලයක් ජනාධිපතිවරයකුට නැත.
ගෝඨාබය රාජපක්ෂ පවසන ආකාරයට නොවැම්බර් 17 දින අලුයම මේ සෙබළුන් නිදහස් කරන්නේ නම්, එසේ කිරීමට ලංකාවේ වත්මන් නීතිමය රාමුව තුළ කිසිදු අවකාශයක් නැති අතර, එසේ කළ හොත් එය විධායකය විසින් අධිකරණ පද්ධතියට සහ නීතිය බලාත්මක කිරීමට බැඳී සිටින ආයතන එල්ල කරන ඍජු බලපෑමකි.
නීතියේ ආධිපත්‍යය යනු කිසිවකු නීතියට ඉහළින් නොසිටීමයි.
නීතිය ඉදිරියේ සැම දෙන සමානයි
හමුදා නිලධාරීන් ඇතුළු කිසියම් පුද්ගලයකු පැහැරගැනීම හෝ මිනීමැරීම වැනි අපරාධ සිදු කරන්නේ නම් ඔවුන්ට විරුද්ධව නීතියට අනුව කටයුතු කළ යුතුය. මේවා සාමාන්‍ය පුරවැසියන්ට එරෙහි අපරාධ ය.
ගෝඨාබයගේ විනයගරුක සමාජයේ, මේ පුද්ගලයෝ විශේෂ ස්ථානයක් භුක්ති විඳීමට යන්නෝද? විනයගරුක සමාජයක විශේෂ පුද්ගලයන්ට සාපරාධී වැරදි කළ හැකිද?
2005 සිට සන්නද්ධ හමුදාවල ගෞරවය සහතික කළ බව ගෝඨාබය පවසයි.
කෙසේ වෙතත්, 2015දී පැමිණි රජයට (නීතිය ඉදිරියේ සියලු දෙනා එක හා සමාන බව පෙන්වීමෙන් සහ සාපරාධී වැරදි සිදු කිරීම සඳහා ඔවුන්ගේ නිල ඇඳුම ආවරණයක් ලෙස භාවිතා කළ අයට නීතියට අනුව කටයුතු කරනු ඇති බව පෙන්වීමෙන්) සමස්තයක් ලෙස ඒ සන්නද්ධ හමුදාවල ගෞරවය නැවත ස්ථාපිත කිරීමට හැකි විය.
අපේ ත්‍රිවිධ හමුදාවට එක්සත් ජාතීන්ගේ සාම ආරක්ෂා කිරීමෙ හමුදාව සඳහා ආරාධනා කරන ලදි. ඔවුන්ට මේ සඳහා හොඳ වේතනයක් ලැබේ.
2015ට පෙර ත්‍රිවිධ හමුදාවේ ගෞරවනීය සාමාජිකයන් ලෙස පාරවල් අතුගා දැමීමට හා එළවුළු අලෙවි කිරීමට එවකට ආරක්ෂක ලේකම් ගෝඨාබය රාජපක්ෂ නියෝග කළබව කිසිවිටෙකත් අමතක නොකළ යුතුය. ඔවුන්ගේ ගෞරවය විනාශ කිරීමට ක්‍රියා කළේ ඔහුය.
මහින්ද රාජපක්ෂට එරෙහිව තරග කළ පමණින් රාජපක්ෂ සමයේ යුද්ධය නිමා කළ යුද හමුදාපති සරත් ෆොන්සේකා සිරගත කළ ආකාරය, හිටපු හමුදාපති මහේෂ් සේනානායක ජනපති සටනට පිවිසීමත් සමග මැනවින් සිහිපත් වේ.
සරත් ෆොන්සේකා පමණක් නොව, මැතිවරණ ව්‍යාපාරයේදී සරත් ෆොන්සේකාට උදවු කළ සියලු හිටපු සොල්දාදුවෝ අත්අඩංගුවට ගෙන දේශපාලනිකව හිරිහැර කරනු ලැබූහ.
මහජන ඡන්දයකින් තෝරා පත් වීමට අපේක්ෂා කරන ගෝඨාබය රාජපක්ෂ තම ඡන්ද ව්‍යාපාරයට මුල පුරන්නේ නීතිය තමාට නතු කරගැනීමට ප්‍රතිඥාවක් දෙමිනි.
ජනතාවගේ ඡන්දයෙන් රටේ උසස්ම නිලයට පත් වී, බලයට පැමිණීමට අපේක්ෂා කරන ගෝඨාබය, තම මංගල රැලියේදී මෙවැනි අනීතික පොරොන්දුවක් දීමෙන් රටේ නීතිගරුක පුරවැසියන් කම්පා කිරීමට සමත් වී ඇති අතර, ඒ ප්‍රකාශය රටේ අනාගතය අඳුරු ආගාධයකට ඇදගෙන යන බවට පැහැදිලි, භයානක අනතුරු ඇඟවීමකි.
(සිළුමිණ - විහඟ වීරසේකර)
