69 ලස්සේ නොවැම්බර්වරුන් තේරුම්ගැනීම - අජිත් පැරකුම් ජයසිංහ 

ජනාධිපති ගෝඨාභය රාජපක්ෂ කොළඹ වරායේ නැගෙනහිර පර්යන්තය සම්බන්ධයෙන් ඉන්දියාව සමග තිබෙන සම්මුතිය

අනුව කටයුතු කිරීමට උත්සාහ කළේය. වරාය ඇමති රෝහිත අබේගුණවර්ධන ඇතුළු ඔහුගේ හිතවත් ඇමතිවරු එයට සහයෝගය දැක්වූහ.

 

මේ අතර, වරාය වෘත්තීය සමිති විසින් කලක සිට කරගෙන යන නැගෙනහිර පර්යන්තයේ අයිතිය වරාය අධිකාරියට ඉල්ලා සිටීමේ අරගලය යළි පැනනැගිණි. 

 

ජනතා විමුක්ති පෙරමුණේ වෘත්තීය සමිති, පෙරටුගාමී සමාජවාදී පක්ෂය, ආණ්ඩු හිතවාදී භික්ෂු පිරිස් හා සිරස රූපවාහිනිය මෙම අරගලයට මැදිහත් විය.

 

ආණ්ඩුව ජාතික සම්පත් විකුණන බවට මහජන මතයක් නිර්මාණය කරන ලදී. 

 

ආණ්ඩුවේ අසාර්ථකත්වය හමුවේ ඉච්ඡා භංගත්වයට පත්වී සිටින බලවේග ආණ්ඩුවට විරෝධය පළකිරීම සඳහා මෙම අවස්ථාව පාවිච්චි කළහ.

 

 

 

 

මෙය අතිශය අවදානම් සහගත තීරණයකි. ඉන්දියාව තවමත් මෙයට විධිමත් අන්දමින් ප්‍රතිචාර දක්වා නැත. 

 

ගිවිසුම අනුව කටයුතු කරන ලෙස දැනුම්දීම පමණක් සිදු වී තිබේ. 

 

මෙම සිද්ධියෙන් පසු ඉන්දියාව තමන් විසින් දෙන ලද ණයක් ආපසු ඉල්ලා සිටි බව හා චීනය ශ්‍රී ලංකාවට අතිවිශාල ණයක් පිරිනැමීමට සූදානම් බවට ප්‍රබන්ධ නිර්මාණය කරමින් තිබේ.

 

ඉන්දියාව ශ්‍රී ලංකාවේ ආණ්ඩුව මුහුණදෙමින් සිටින තත්වය තේරුම් නොගෙන කටයුතු කරනු ඇතැයි සිතිය නොහැකිය. කෙසේ වෙතත්, ලංකාවේ ආණ්ඩුවට ද මෙය අතිශය ගැටලු සහගත තත්වයකි.

 

 

 

 

ඉහත කාටුනයෙන් අප උත්සාහ කරන්නේ 69 ලක්ෂයේ බලවේගය යනු කුමක්දැයි පැහැදිලි කිරීමටයි. ඔවුන්ට අනන්‍ය ආර්ථික දැක්මක් නැත. ඇත්තේ 1970-77 සමයේ කූටප්‍රාප්තියට පැමිණි ජාතික සමාජවාදී ආර්ථික දැක්මයි. 

 

දැන් එය කරතබාගෙන යන්නේ ජවිපෙ හා පෙසපයි.

 

 

තමන් විසින් ගොඩනගන ලද බලවේගයට නායකත්වය දීම දැන් රාජපක්ෂ බලවේගයටම ගැටලුවක් වී තිබේ.

 

 එහි නායකත්වය කා අතට හුවමාරු වේද? තරගකරුවන් බොහෝය. ආණ්ඩුව ඇතුළේම විමල් වීරවංශ නායකත්වය දෙන බලවේගය නිදසුනකි.

 

දේශපාලන විශ්ලේෂක