පාස්කු ප්රහාරය පිලිබඳ විමර්ශන රජය, රජයේ ඇතුළාන්තයෙන් පරීක්ෂණයට භාජනය විය යුතු අභියෝගයක් බව පවසන ජනාධිපති අනුර කුමාර දිසානායක, කෙතරම් දුෂ්කර වුවද මේ සම්බන්ධයෙන් සාධාරණය ඉටුවිය යුතු බවද අවධාරණය කර සිටියි.
ජනාධිපතිවරයා මේ බව සඳහන් කළේ මැල්කම් කාදිනල් රංජිත් කොළඹ අගරදගුරු තුමන්ගේ පූජක දිවියට වසර 50ක් පිරීම නිමිත්තෙන් කොළඹ අගරදගුරු පදවිය විසින් ඊයේ (07) පස්වරුවේ කොළඹ අගරදගුරු නිවසේ සංවිධානය කරන ලද උපහාර උත්සවය අමතමිනි.
කාලයේ වැලිතලාවෙන් යටපත්වීමට ඉඩ නොතබා පාස්කු ප්රහාරයේ වින්දිතයින්ට සාධාරණය ඉටු කිරීමට ගත හැකි සෑම පියවරක්ම ගන්නා බව ජනාධිපතිවරයා මෙහිදී සඳහන් කළේය.
''කාදිනල් උන් වහන්සේ අද වන විට කැකෑරෙන වේදනාවක සිටින බව අප දන්නවා. වින්දිතයන්ට ඉටු විය යුතු සාධාරණය පිළිබඳ උන් වහන්සේ නිරන්තරයෙන් කතා කරනවා. උන් වහන්සේ අප වෙත එම වින්දිතයන්ට සාධාරණය ඉටු කිරීම සඳහා නිරන්තරයෙන් කතිකාවත් කරනවා. ඒ පිළිබඳ කාලයේ වැලිතලා වෙන් යට නොවී සාධාරණයක් ඉටු කිරීමට කටයුතු කරන බව උන් වහන්සේට මා සහතික වෙනවා. එය අභියෝගාත්මක වෙන්න පුළුවන්. රජය රජයෙන් පරිබාහිරවත්, රජය රජය පිළිබඳවත් විමර්ශනය මේ සඳහා යොමු කර තිබෙනවා. අද රජය විසින් රජය ඇතුළාන්තය පිළිබඳ විමර්ශනයක් සිදු කරනවා. උන් වහන්සේ මේ පිළිබඳව දරන ප්රයත්නය පිළිබඳ අප අගයනවා.''
පිරිහුණු සමාජයට කාදිනල් තුමන්ගේ චරිතය පරමාදර්ශයක්
පිරිහී ගිය සමාජයට යළි මනුෂ්යත්වයේ ජීවය සහ අධ්යාත්මික ගුණය කැටුව ඒමේදී මැල්කම් කාදිනල් රංජිත් හිමිගේ චරිතය පරමාදර්ශයක් බව ජනාධිපති අනුර කුමාර දිසානායක මෙහිදී පැවසීය.
සමාජයේ යහ පැවැත්ම සහ අධ්යාත්මය ගොඩනැඟීමට වෙහෙසකර ව්යායාමයක නිරත වන මැල්කම් කාදිනල් රංජිත් අගරදගුරු තුමන් විශාල මෙහෙයක් ඉටු කරන රාජ්යතාන්ත්රිකයකු, බයිබලය ඉතා හොඳින් විවරණය කරමින් කරුණු ඉදිරිපත් කළ හැකි ධර්ම ගවේෂකයකු, සමාජය අවදි කළ හැකි ශක්තිමත් පෞරුෂයක් හිමි කථිකයකු වන අතරම, එම භූමිකාවලින්ද ඔබ්බට ගිය සැබෑ මානව හිතවාදියකුද වන බව ජනාධිපතිවරයා පැවසීය.
මහනාහිමිවරුන්, ආගමික නායකයන්, අගමැතිනි ආචාර්ය හරිනි අමරසූරිය, විපක්ෂ නායක සජිත් ප්රේමදාස ඇතුළු ආරාධිතයෝ රැසක් මේ අවස්ථාවට සහභාගි වී සිටියහ.
