වේගයෙන් පැතිරෙන ලැව්ගින්නෙන් බේරී පලා යාමට ඉක්මන් වෙද්දී ඔහුට වසර 1996, 2000 සහ 2004 ඔලිම්පික් ක්‍රීඩා උළෙලන්හි දිනා ගත් පදක්කම් 10 අත්හැර යාමට සිදුවුනා.
“ඒ පදක්කම්වල වටිනාකම ඩොලර්වලින් කියන්න බැරි තරම්. ඒ ඔලිම්පික් පදක්කම්වලින් නියෝජනය වන මතකයන්...ඒවා මට අයෙ කවදාවත් නැවත ලබා ගන්න බැහැ. ඒ කිසිම දෙයක් කිසිම දවසක මට ආයෙ ලැබෙන්නේ නැහැ. මේ සියල්ල සිදුවුනේ ඉතාම වේගයෙන්. මට හිතෙන්නේ මිනිත්තු තුනක් ඇතුළත. මගේ බඩු එකතු කරගෙන පිටවෙන්න මට තිබුනේ මිනිත්තු තුනක් විතරයි” හෝල් පවසනවා.
එහෙත් මේ පිහිනුම් ශූරයාගේ පදක්කම් නැතිවීමේ පුවත ජාත්‍යන්තර ඔලිම්පික් කමිටුවට (IOC) සැලවීමත් සමග ඔහුට පදක්කම් ආකෘති ලබා දෙන බවට කමිටුව ප්‍රකාශ කර තිබෙනවා.
“ලොස් ඇන්ජලීස් ජනතාව සමග පූර්ණ සහයෝගිතාවෙන් සිටින අපි වෙහෙස නොදැනී කටයුතු කරන ගිනිනිවන භටයන් හා ආරක්ෂක හමුදාවන්ගේ කාර්යභාරය ඉතාම අගය කරනවා” යනුවෙන් IOC සභාපති Thomas Bach නිවේදනයක් නිකුත් කරමින් කියා සිටිනවා. “මේ අවස්ථාවේ සම්පූර්ණ අවධානය යොමුවිය යුත්තේ ගින්නට එරෙහිව කරන සටනට හා ජනතාව සහ දේපල ආරක්ෂා කිරීමට. ශ්‍රේෂ්ඨ ඔලිම්පික් ක්‍රීඩකයෙකු වන ගැරී හෝල් (කණිෂ්ඨ)ගේ පදක්කම් ගින්නේදී නැති වී ඇති බවත් අපට දැනගන්නට ලැබී තිබෙනවා. ඒවායේ ආකෘති IOCය ඔහුට ලබා දෙනවා.”
අමෙරිකා එක්සත් ජනපදය වෙනුවෙන් ඔලිම්පික් ක්‍රීඩා උළෙල තුනක තරග කරමින් හෝල් රන් පදක්කම් 5ක්, රිදී පදක්කම් 3ක් සහ ලෝකඩ පදක්කම් 2ක් දිනා ගත්තා.
මීටර් 50 නිදහස්ආර පිහිනුම් ඉසව්වේ දෙවතාවක ඔලිම්පික් ශූරයෙකු වන ඔහු සිය ක්‍රීඩා දිවිය තුළ අමෙරිකාව සහාය පිහිනුම් තරග පහක ජයග්‍රහණ කරා ගෙන ගියා.
හානියට පත් ප්‍රදේශය නැවත විවෘත කළ විට තමා ෂවලයක් රැගෙන මීට ශතක දෙකකට පෙර කැලිෆෝනියානුවන් ක්‍රියා කළ පරිදි රත්තරං සොයා එහි යන බව ගැරී හෝල් (කණිෂ්ඨ) පවසනවා.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com