සමරිසිභාවය නැතහොත් සමලිංගිකත්වය දණ්ඩනීය වරදක් ලෙස මෙතෙක් සැලකන ලද
වගන්ති දණ්ඩ නීති සංග්‍රහයෙන් ඉවත් කිරීම සඳහා දණ්ඩනීති සංග්‍රහ සංශෝධන පනත් කෙටුම්පතක් පෞද්ගලික මන්ත්‍රී යෝජනාවක් ලෙස පාර්ලිමේන්තුවට ඉදිරිපත් කිරීමට පාර්ලිමේන්තු මන්ත්‍රී ප්‍රේම්නාත් සී දොළවත්ත මන්ත්‍රීවරයා විසින් කටයුතු කර තිබේ.
කෘතහස්ත දේශපාලඥයකු වූ දිවංගත මංගල සමරවීරයන්ගේ වර්ෂපූර්ණ ගුණානුස්මරනය යෙදී ඇති හෙට (24) දිනයේ එම කෙටුම්පත ඔහු විසින් පාර්ලිමේන්තුවේ කථානායකවරයාට භාරදීමට නියමිතය.
සියලු ආකාරයේ වෙනස්කොට සැලකීම් ඉවත් කිරීමටත් පුද්ගලයකුගෙ ලිංගික දිශානතිය ඔහුගේ කැමැත්ත පරිදි පවත්වාගෙන යාමට ඇති අයිතිවාසිකම් ආරක්ෂා කිරීමටත් දීර්ඝ කාලයක් තිස්සෙ හඬ නැගූ මංගල සමරවීරගේ නාමයට උපහාරයක් පිණිස මෙම කෙටුම්පත හෙට දිනයේදීම පාර්ලිමේන්තුවට භාරදීමට කටයුතු කරන බව දොළවත්ත මන්ත්‍රීවරයා පැවසිය.
මෙම පනත් කෙටුම්පත සැකසීම සඳහා Institute of Politics ආයතනයත් එහි විධායක අධ්‍යක්ෂ සංජීව විමලගුණරත්න සහ නීතිවේදී අකලංක හෙට්ටිආරච්චි තමාට ලබාදුන් සහය පිළිබඳව කෘතවේදී වන බව ප්‍රකාශ කල මන්ත්‍රීවරයා, මෙයට පෙර තමන් විසින් පළාත් පාලනය තුළ තරුණ නියෝජනය තහවුරු කිරීම සඳහා නාමයෝජනාවන්හි 25% ක කෝටාවක් සහතික කිරීමට ද පෞද්ගලික මන්ත්‍රී කෙටුම්පතක් ඉදිරිපත් කරන ලද බවත් ඒ සඳහා ද Institute of Politics ආයතනයත් සංජීව විමලගුණරත්න සහ අකලංක හෙට්ටිආරච්චි දැක්වූ සහය අගය කරන බවත් වැඩිදුරටත් ප්‍රකාශ කළේය.
ශ්‍රී ලංකාවේ දණ්ඩ නීති සංග්‍රහයේ 365 වැනි වගන්තිය "ස්වභාවධර්මයට එකඟ නොවන ලෙස සිදු කෙරෙන ලිංගික සංසර්ගය" අපරාධයක් ලෙස සලකන අතර ඒ සඳහා වසර දහයක් දක්වා සිරදඬුවමක් නියම කළ හැකිය.
මෙම වසර 135 ක් පැරණි බ්‍රිතාන්‍ය යටත්විජිත නීතිය සමලිංගික ක්‍රියාවන් අපරාධයක් බවට පත් කිරීම පොත්වල පවතී; කෙසේ වෙතත්, මෙම නීතිය භාවිතා නොකරන අතර නිද්‍රා නීතියක් ලෙස ශ්‍රී ලංකාව තුළත් පවතින බවට නීතිපතිවරයා එක්සත් ජාතීන්ගේ මානව හිමිකම් කවුන්සිලයට පවසා ඇත.
එහෙත් සමලිංගික හැසිරීම් පිළිබඳ සාක්ෂි සැපයීමේ උත්සාහයක් ලෙස ශ්‍රී ලංකා බලධාරීන් 2017 සිට අවම වශයෙන් පුද්ගලයින් හත් දෙනෙකුට බලහත්කාරයෙන් ගුදමාර්ගය පරීක්‍ෂා කිරීම සහ බලහත්කාරයෙන් යෝනි පරීක්‍ෂා කිරීම ඇතුළත් ශාරීරික පරීක්ෂණවලට ලක් කර ඇති බව හියුමන් රයිට්ස් වොච් සහ ඊක්වල් ග්‍රවුන්ඩ් 2020 වසරේදී ප්‍රකාශ කළේය.
ඉන්දියාවේ ශ්‍රේෂ්ඨාධිකරණය 2018 දී ඓතිහාසික තීන්දුවක් ගනිමින් 377 අහෝසි කරන ලද අතර, එය, අනෙකුත් පැරණි යටත් විජිතයන් ද ඉන්දියාව අනුගමනය කරමින් 377 අහෝසි කරනු අතැයි සමාජ ක්‍රියාකාරීන් තුළ බලාපොරොත්තු ඇති කළේ ය.
මෑත වසරවලදී, ආසියාවේ අනෙකුත් රටවල් ද සමලිංගික විවාහ නීතිගත කිරීමට පියවර ගෙන තිබේ.
2019 වසරේදී තායිවානය සමලිංගික විවාහ නීතිගත කළ පළමු රට බවට පත් වූ අතර, තායිලන්ත රජය පසුගිය ජුනි මාසයේදී සමලිංගික කණ්ඩායම්වලට අවසර දෙන නීති කෙටුම්පත් සඳහා සිය අනුමැතිය ද ලබා දුන්නේ ය.
(මුලාශ්‍ර - BBC සිංහල සේවය)
සබැඳි පුවත් :
The LEADER Whatsapp Group එකට එකතුවෙන්න.
