එල්ටීටීඊ සාමාජිකයින්ට පමණක් නොව චෝදනා ලබා සිටින ආරක්ෂක අංශ සාමාජිකයින්ටත් ජනාධිපති සමාව ලබාදී පසුගිය පරිච්ඡේදය අවසන් කරමු
යයි ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී නාමල් රාජපක්ෂ යෝජනා කර සිටියි.
'' මහ බැංකු බෝම්බයෙන් 91 ජීවිත නැතිකරපු එල්ටීටීඊ ත්‍රස්තවාදියකුට ජනාධිපති සමාව ලබා දුන් ආකාරයටම චෝදනා ලබාසිටින රණවිරුවන්ටත් ජනාධිපති සමාව දිය යුතුයි.'' යයි මන්ත්‍රීවරයා පැවසිය.
ඔහු එබව සඳහන් කර සිටියේ, නඩු කටයුත්තක් සඳහා ඊයේ (24) අධිකරණයට පැමිණ යමින් සිටියදී මාධ්‍යවේදියකු කළ ප්‍රශ්න කිරීමකට පිළිතුරු දෙමිනි.
ඒ සම්බන්ධයෙන් ඔහු තවදුරටත් මෙසේ සඳහන් කළේය.
'' මම දැක්කා අතිගරු ජනාධිපතිතුමන් එල්.ටී.ටී.ඊ ත්‍රස්තවාදීන්ට ජනාධිපති සමාව ලබාදෙනවා. විශේෂයෙන්ම මහ බැංකුවට බෝම්බ ගහලා 91 ජීවිත බිලිගත්තු, 200කට වඩා තුවාල වෙච්ව් වැරදිකරු වෙලා අවුරුදු 200ක් හිරේට නියම උනු එල්ටීටීඊ සාමාජිකයාටත් ජනාධිපති සමාව ලබාදී තිබෙනවා.
මමත් ඔය එල්ටීටීඊ සැකකරුවන් එක්ක මැගසින් බන්ධනාගාරයේ හිටියා. ඒ මම රක්ෂිත බන්ධනාගාර ගත වෙලා ඉන්නකොට.
ක්‍රමානුකූලව ඒ අයට ජනාධිපති සමාව දීලා හෝ මේ අවුරුදු 15ක් 20ක් රිමාන්ඩ් බන්ධනාගාරෙ ඉන්න අයව නිදහස් කරන එකේ ගැටළුවක් නෑ. අනිත් පැත්තෙන් රණවිරුවොත් යම් චෝදනාවන්ට ලක් වෙලා වැරදිකරුවන් වෙලා තියෙනවා. ජනාධිපතිවරයා මේ අයටත් ජනාධිපති සමාව දෙනවානම් ඒක තමයි මේ වෙලාවෙ වියයුත්තෙ කියලා මම විශ්වාස කරනවා.
'' මොකද මේ පරිච්ඡේදය අපි වහන්න ඕනෙ. ඒක වහනවනම් එල්ටීටීඊ ත්‍රස්තවාදීනට පමණක් සීමාවෙලා බෑ. රණවිරුවන්ටත් චෝදනාවක් තියෙනවානම් ඒ රණවිරුවන්ටත් ජනාධිපති සමාවදීලා මේ පරිච්ඡේදය අවසන් කරන්න ඕනෙ කියන එක මගේ විශ්වාසය.''
