ජාතික ජන බලවේගයේ ලෙස පවත්වන ප්‍රථම මැයි දිනය සඳහා ස්ථාන හතරක් තෝරාගෙන තිබෙන බව ජාතික ජන බලවේගයේ විධායක සභික ආචාර්ය හරිනි අමරසූරිය පවසයි.
ලංකාවේ දේශපාලන ඉතිහාසයේ තීරණාත්මක වන මේ වසර තුළ රටට අවශ්‍ය, රටේ පුරවැසියන් ඉල්ලන ඒ පරිවර්තනීය යුගය ආරම්භ කරන සලකුණ තියන්න මේ මැයි දින රැලි හතර තුළින් බලාපොරොත්තු වෙන බවයි ඇය පවසන්නේ.
ඒ සම්බන්ධයෙන් මන්ත්‍රීවරිය තවදුරටත් මෙසේද පැවසුවාය.
“මේ අවුරුද්දේ මැයි රැලිය රටේ සියලුම වැඩ කරන ජනතාව එකතු කරගෙන ඒ පරිවර්තනයට සූදානම් කියලා ප්‍රකාශ කරන මොහොතක් වෙයි කියන බලාපොරොත්තුව අප තුළ තිබෙනවා. මේ මැයි දිනය වැඩකරන කාන්තාවන්ට සුවිශේෂී එකක් වෙන්න නියමිතයි. මෙතෙක් ඉතිහාසයේ නොදුටු, පළමුවැනි වතාවට දේශපාලනිකව කාන්තාවන් සවිබල වෙලා, තමන්ගේ බලය පෙන්වන්න සූදානමින් ඉන්නවා අපි දැක්කා. මේක කාන්තාවන්ට දේශපාලනිකව නායකත්වය ගන්නත්, සංවිධානය වෙන්නත්, මැදිහත් වෙන්නත් හැකියාවක් තිබෙන බව රටටත් ලෝකයටත් පෙන්වපු කාලයක්.
අපේ කාන්තාවන් සියලුම ආර්ථික ක්ෂේත්‍රවල නියෝජනය වෙනවා. අපේ රටේ ගැහැනුන් මේ රටේ ආර්ථිකයේ කොඳු නාරටියේ ප්‍රමුඛස්ථානයක් ගන්නවා. විදේශගත රැකියා ක්ෂේත්‍රයේ, තේ වගා ක්ෂේත්‍රයේ, නිදහස් වෙළඳ කලාපයේ, සෞඛ්‍ය ක්ෂේත්‍රයේ, අධ්‍යාපන ක්ෂේත්‍රය ඇතුළු සෑම ක්ෂේත්‍රයකම ප්‍රමුඛ කාර්යභාරයක් ගැහැනුන් විසින් නියෝජනය වෙනවා. ඊට අමතරව මේ රටේ පවුල, දරුවන්, වැඩිහිටියන් රැකබලා ගැනීම සඳහා ගෙවල් තුළත්, ප්‍රජාව තුළත් ගැහැනුන් විශාල කාර්යභාරයක් කරනවා. ඒ සුරැකුම් වැඩවලට ආණ්ඩුවලින් පහසුවක්, කිසිම ගරුත්වයක්, සුදුසු තැනක් දී නැහැ. ඇය සූරාකෑමට ලක්වෙන ප්‍රධාන චරිතය බවට පත්වෙලා තිබෙනවා. ඒ සූරාකෑම තුළින් මේ දූෂිත ආර්ථිකය පවත්වාගෙන ගොස් තිබෙනවා.
බදු වැඩිවෙන විට, බඩු මිල වැඩිවෙන විට ගැහැනියගේ ජීවිතය ඉතාමත් සංකීර්ණ වෙනවා වගේම අමාරු වෙනවා. තම නිවස තුළ, වැඩ කරන ආයතනය තුළ, ප්‍රජාව තුළ මේ සෑම තැනකදීම ගැහැනියට විශාල අර්බුදවලට මුහුණ පෑමට සිදුවෙලා තිබෙනවා. ඒ වගේම ඒ තිබෙන තත්වයන් සියල්ලම කළමනාකරණය කරගෙන පවුල රැකගන්න ඇය විශාල සටනක යෙදෙමින් ඉන්නවා. ඒ නිසාම 2024 මැයි දිනය ගැහැනු අපට සුවිශේෂී මැයි දිනයක් වෙන්න නියමිතයි. අපි සියලුම ගැහැනුන්ට ආරාධනා කරනවා, මෙතෙක් ගෙන ආ පිබිදීම, තමන්ගේ බලය පෙන්වන්න මේ මැයි දිනය අවස්ථාවක් කර ගනීවි යැයි අපි විශ්වාස කරනවා. මේ රට වෙනස් කරන ප්‍රධාන බලවේගයක් හැටියට ගැහැනු අපි මැයි දිනයේදී එකතු වෙමු” යයි ද ඇය සඳහන් කළාය.
(A5 News)
