රාජ්‍ය සේවයේ ඉහල නිලධාරීන් පත්කිරීම්, උසස්කිරීම් හා විනය කටයුතු සම්බන්ධව බලධාරියා වන ප්‍රධාන ආයතනයට
ජනාධිපතිගේ සමීපතමයකු ඇතුළු පෞද්ගලික ව්‍යාපාරිකයන් පත් කිරීම සම්බන්ධයෙන් වෘත්තීය සමිති සංවිධානයක විරෝධය පළ වී තිබේ.
ජනාධිපතිවරයා වෙත ලිපියක් යොමු කරමින් ජාතික වෘත්තීය සමිති මධ්‍යස්ථානය පෙන්වා දෙන්නේ රාජ්‍ය සේවය පිළිබඳව කිසිදු අත්දැකීමක් නැති රාජ්‍ය නිලධාරීන් සමග රාජකාරිමය කිසිදු කාර්යයක නියලී නැති පෞද්ගලික ව්‍යාපාරික කටයුතු වල නියුතු නුසුදුසු පුද්ගලයන් රාජ්‍ය සේවා කොමිෂන් සභාවට පත්කිරීම රාජ්‍ය සේවයට එල්ල කරන ලද බරපතල අතුල් පහරක් බවයි.
දිලිත් ජයවීර හා ඩයන් ගෝමස්
රාජ්‍ය සේවා කොමිෂන් සභාවේ සාමාජිකයන් ලෙස ජෝර්ජ් ස්ටුවර්ට්ස් සමූහ ව්‍යාපාරයේ සභාපති දිලිත් ජයවීර හා දැනට නෙස්ලේ පීඑල්සී සමාගමේ අධ්‍යක්ෂ මණ්ඩල සාමාජිකයකු වන ඩයන් ගෝමස් ජනාධිපතිවරයා විසින් පත් කරනු ලැබීම වෘත්තීය සමිති විරෝධයට හේතුවී තිබේ.
ජනාධිපතිට “නොතේරීම”
“ආණ්ඩුවේ කොන්ත්‍රාත් ටෙන්ඩර් හරහා තමන්ගේ ව්‍යාපාරික ආයතන වලට ලබාගන්නා ආණ්ඩුව සමග සෘජුවම ව්‍යාපාරික කටයුතු වල නියුතු අයකු” ලෙස දිලිත් ජයවීර හදුන්වා දෙන ජාතික වෘත්තීය සමිති මධ්‍යස්ථානයේ සභාපති කේ.ඩී ලාල් කාන්ත සිය ලිපිය මගින් අවධාරණය කර ඇත්තේ, රජයේ අමාත්‍යාංශ හා දෙපාර්තමේන්තු ප්‍රධානීන් ඇතුළු රාජ්‍ය සේවයේ ඉහල වගකීම් දරණ නිලධාරීන්ගේ පත්කිරීම්, මාරුකිරීම් හා උසස්වීම මෙන්ම විනය කටයුතු සම්බන්ධයෙන් ද වගකීම් දරණ රාජ්‍ය සේවා කොමිසමේ නියෝජිතයෙකු විසින් ඉදිරිපත් කර ඇති ටෙන්ඩර් පත්‍රීකා සම්බන්ධයෙන් සාධාරණ තීන්දු ගැනීමේ අයිතිය මෙමගින් අහෝසිකර ඇති බව ජනාධිපතිට නොතේරීම “පුදුම සහගත” බවයි.
"දිලිත් ජයවීර මහතාම පවසන පරිදි ඔහු ඔබ සමග සමීප සබඳතා පවත්වන අතිජාත මිත්‍රයෙකි. එම සබඳතාවය රාජ්‍ය නිලධාරීන්ට තමන්ගේ කටයුතු නීති ගරුකව යුක්ති සහගතව කරගෙන යෑමට ඇතිකරන බාධාව සුළුපටු නොවේ."
මෙලෙස කෙලෙසී යන්නේ කොමිසමේ ස්වාධීනත්වය පමණක් නොව සමස්ත රාජ්‍ය සේවයේම ස්වාධීනත්වය බව ජනාධිපතිවරයාට අවධාරණය කරන වෘත්තිය සමිති නායකයා තවදුරටත් පෙන්වා දෙන්නේ අහෝසිවී යන්නේ රටත් ජනතාවත් වෙනුවෙන් රාජ්‍ය නිලධාරීන්ට නිවැරදිව හා විනිවිදභාවයකින් යුතුව කටයුතු කිරීමට ඇති අවකාශය බවයි. "මෙයින් ගොඩනැගෙන තත්වය ඔබගේ දැක්ම ලෙස ප්‍රසිද්ධියට පත්කළ “සෞභාග්‍යයේ දැක්ම” තුල ඇති විනය ගරුක රටක් ගොඩනැගීමට දායක වන්නේ කෙලෙසද යන්න ප්‍රහේලිකාවකි," යි අගමැතිවරයාටත් පිටපත් සහිතව ජනාධිපතිවරයාට ජාතික වෘත්තිය සමිති මධ්‍යස්ථානය යොමු කළ ලිපියේ තව දුරටත් සදහන්ය.
බලතල තමන්ට අවැසි ආකාරයට සකසා ගනිමින් කටයුතු කිරීම අපේ රටේ ප්‍රජාතන්ත්‍රවාදයට එල්ල කරන ලද මරු පහරක් ලෙසින් පෙන්වා දෙන හිටපු පාර්ලිමේන්තු මන්ත්‍රීවරයකුද වන කේ.ඩී ලාල් කාන්ත රාජ්‍ය සේවය යනු යම්කිසි පාලකයකුගේ පෞද්ගලික අභිමතයන්ට අනුව කටයුතු කළ යුතු සේවාවක් නොවන බව ජනාධිපතිට පෙන්වා දී තිබේ.
බලතල තමන්ට අවැසි ආකාරයට සකසා ගනිමින් කටයුතු කිරීම අපේ රටේ ප්‍රජාතන්ත්‍රවාදයට එල්ල කරන ලද මරු පහරක් ලෙසින් පෙන්වා දෙන හිටපු පාර්ලිමේන්තු මන්ත්‍රීවරයකුද වන කේ.ඩී ලාල් කාන්ත රාජ්‍ය සේවය යනු යම්කිසි පාලකයකුගේ පෞද්ගලික අභිමතයන්ට අනුව කටයුතු කළ යුතු සේවාවක් නොවන බව ජනාධිපතිට පෙන්වා දී තිබේ.
එහි වගකීම හා වගවීම පවතින්නේ රාජ්‍යට මිස කාලයෙන් කාලයට පත්වන ආණ්ඩු වලට හෝ පාලකයන්ට නොවන බවයි ඔහු තව දුරටත් පවසන්නේ.
"එය ඔබ වටහාගත් බවක් මෙම පත්කිරීම් තුලින් ගම්‍යමාන නොවේ. එසේම මේ හරහා විද්‍යමාන වන තවත් කරුණක් වන්නේ රාජ්‍ය සේවා කොමිසම සම්බන්ධයෙන් හා එයට පත්කළ යුතු නියෝජිතයන් සම්බන්ධයෙන් ඔබගේ ඇති අවබෝධයේ ප්‍රමාණයයි. "
කරුණු මෙසේ හෙයින් මේ පිළිබඳව අගතිමානි නොවී රාජ්‍ය සේවා කොමිෂන් සභාවට එයට ගැලපෙන සුදුසු පුද්ගලයන් පත්කිරීමට කටයුතු කරන ලෙසත් රාජ්‍ය නිලධාරීන්ට කරනු ලබන දේශපාලන බලහත්කාරී මැදිහත් වීම නතර කිරීමට කටයුතු කරන ලෙසත් සමස්ත රාජ්‍ය සේවය වෙනුවෙන් ජාතික වෘත්තිය සමිති මධ්‍යස්ථානය ඉල්ලා තිබේ.
රාජ්‍ය සේවා කොමිෂන් සභාවේ නව සභාපති ලෙස විනිසුරු ජගත් බාලපටබැඳි ද, සෙසු සාමාජිකයන් ලෙස ඉන්‍ද්‍රානි සුගතදාස, ලීලසේන ලියනගම, වෛද්‍ය ටී. ආර්. සී. රුබේරු, ඩයන් ගෝමස්, ඩබ්ලිව්. එම්. පියදාස, දිලිත් ජයවීර, හේමා ධර්මවර්ධන හා නිමල් කරුණාසිරි පත් කිරීමට ජනාධිපති කටයුතු කර තිබේ.
