කොරෝනාවලින් පසු ලෝකය කුමනාකාර වේද? කොරෝනා නිසා ඇතිවිය හැකි නව ලෝක තත්ත්වය කුමක් ද? යනු

මේ මොහොතේ ලොව පුරා උගතුන්ගේ අවධානයට සහ පරීක්ෂාවට ලක් වී ඇති ප්‍රධාන ප්‍රශ්ණ යයි.

Damma Disanayakeඇතැමුන් ගෝලීයකරණය අවසාන වේ ය යන ශෝකයෙන් පසුවෙති. ඇතැමුන් ඒ පිළිබඳව සිටින්නේ සතුටිනි. ඇතැමුන් කොරෝනා නිසා ධනපතික්‍රමය අවසන් වේය යන බියෙන් පසුවෙති. ඇතැම්මු ඉන්නේ එසේ වනවා නම්  ඒ ගැන සතුටිනි. ඒ අයගේ යෝජනාව වන්නේ මේ මොහොත ධනපතික්‍රමයේ අවසානය සඳහා අවස්ථාවක් කරගනිමු යන්නය.

තවත් බොහෝ වෘත්තීය සහ පටිපාටිමය උගතුන් හෝ පටිපාටිමය බුද්ධිමතුන් ඔය කිසිවක් නොහිතා පාඩුවේ තම තමන්ගේ රැකියා කරගෙන ජීවත් වෙති.

මට දැනෙන විදියට ගෝලීයකරණයේ ඉරණම ගැන අවධානය යොමු කරන අයට වඩා ධනපතික්‍රමයේ ඉරණම ගැන කතා කරන අය එක් අතකින් ප්‍රගතිශීලී ය. මන්ද ඔවුන් නියම ප්‍රශ්නය වටේ කැරකෙන නිසා ය. මේ මොහොතේ ඇති සහ අර්බුදයට යමින් තියෙන ගෝලීයකරණය යනු ධනපතික්‍රමයේ මුලෝපාය ය. එය ධනපතික්‍රමය නොවේ.

ඒ නිසා ඒ මුලෝපයට වඩා ක්‍රමය ගැන අවධානය යොමු කිරීම වඩාත් දේශපාලනිකය, වඩාත් ප්‍රගතිශීලීය. එවිට ඇත්ත හෝ මුලික ප්‍රශ්නය එළියට ගත හැකිය.

 

කාලාන්තරයක් පුරාවට සැඟවූ කාරණයක් !

බලවතුන් සහ උගතුන් සාමාන්‍ය ජනයාට කාලාන්තරයක් පුරාවට සැඟවූ කාරණයක් ඇත. ඒ ගෝලීයකරණය නැමති මෙහෙයුම් ක්‍රියාදාමයට යටින් ඇති ධනපති ක්‍රමය ය. එය කළේ ගෝලීයකරණය හුදු අලංකාරිකයක් සහ වැළක්විය නොහැකි අනිවාර්ය ස්වභාවික ක්‍රියාවලියක් බවට පත් කරමිනි.

ඒ නිසා එය කාගෙකාගේත් සුරතල් අරමුණු සාධනය සඳහා වූ අනිවාර්ය මාර්ගයක් බවට පත්විය. එසේම එය විප්ලවාදීන් ද, වාමාංශිකයින් ද , දක්ෂිණාංශිකයින්ද, මාධ්‍යස්තවාදීන් ද ප්‍රශ්න නොකර පිළිපදින, බාරගන්න, ඊට අනුවර්තනය වෙමින් දෛනික ජීවිතය ගලප්පා ගන්න සොබාදහමක්, කැඩපතක් බවට පත්විය. ඇත්තටම පත්වුණා නොව පත් කළේ ය. ඒ පත්කිරීම ඇතුළේ ධනපතික්‍රමයේ අඬුබඬු දිගහැර ගැනීම කිසිදු බාධාවකින් තොරව සිදුවුණේ ය.

Capitalism 1

ලෝක ගෝලයේ අන්තිම හුදකළා මිනිසා පවා ධනපතික්‍රමයේ දැත්තක් බවට පත්කර ගැනීමේ ‘මැක්නමාරා මෙහෙයුම’ සාර්ථක වුණේ ඒ ලෙසිනි. එසේ වූයේ ගෝලීයකරණය පිළිපදින්නන්ගේ සහ අතරමැදියන්ගේ ප්‍රශ්නයක් නැති ආශිර්වාද කිරීම් මාධ්‍යයේ ය.

 ලෝකයේත් මේ රටෙත් පටිපාටිමය උගතුන්, බුද්ධිමතුන් සහ ලුම්පන් න්‍යායකරුවන් බොහෝ විට කළේ ‘ජාතික ගෝත්‍රවාදයට’ එරෙහිව ගෝලීය දැනුම සහ ‘ලිබරල් වෙළඳපොළ මනුස්සකම’ වෙනුවෙන් පෙනී සිටීමය, කටයුතු කිරීම ය. ධනපති සහ වෙළඳපොළ ප්‍රතිමාන/ඇගයුම් අවධාරණය කරමින් ඒවාට ගැලපෙන ලෙස එනම් ‘ගෝලීයකරණයට’ ගැලපෙන ලෙසට ආර්ථිකය, අධ්‍යාපනය, සෞඛ්‍ය, ප්‍රවාහනය, සහ ජීවනෝපායක්‍රම පමණක් නොව අධ්‍යාත්මක ව්‍යාපාර පවා උසිගැන්වීම ය.

''ගෝලීයකරණය නමැති මාධ්‍යයයේ බලවත්කම විසින් ධනපතික්‍රමය නම් වූ ඇත්ත සැඟවී ගියේ ය. සඟවනු ලැබීය''

ඒ නිසා වෙළඳපොළ විසින් කැඳවිය හැකි සහ උසිගැන්විය හැකි දෘෂ්ටිවාදී ආර්ථික, සමාජ, සංස්කෘතික, අධ්‍යාත්මයක සහ දේශපාලන කුක්කන් සහිත ලෝක සහ ජාතික මහපොලොවක ධනපතික්‍රමය දිගහැරුණේ සහ ගැඹුරට කා වැදුණේ ගෝලීයකරණය නමැති මධ්‍යයේ අනුහසිනි.

ඒ මාධ්‍යයයේ බලවත්කම විසින් ධනපතික්‍රමය නම් වූ ඇත්ත සැඟවී ගියේ ය, සඟවනු ලැබීය. ඒ ඇත්ත තුළ පැතිමාන දෙකක් ඇත.

එක, ගෝලීයකරණයෙන් වැසුණු ධනපතික්‍රමයේ බලවත්කම සහ දුෂ්ටකමය.

දෙක, ගෝලීයකරණයෙන් වැසුණු ධනපතික්‍රමයේ දුර්වලකම, සීමිතකම සහ අශීලචාරකමය.

කොරෝනා නිසා වුණේ ඒ පැති දෙකම හෙළිදරව් වීමය. මෙවැනි පසුබිමක, ධනපතික්‍රමය මිය යයි ද? ගෝලීයකරණය නවතී ද? නව විකල්ප බිහිවෙයි ද? යනු අප කාගේත් වැඩි අවධානයකට ලක්විය යුතු මාතෘකා ය.

එනම් සිදුවන්නේ කුමක්ද සිදුවිය යුත්තේ කුමක්ද යන්න කෙරෙහි අපගේ අවධානය යොමු විය යුතුය. මන්ද පෘථිවියේ ඉරණම ඒ මත රැදී ඇති නිසාය.

 

කොරෝනා නිසා ධනවාදය මිය යන්නේ නැත.

Capitalism

කොරෝනා නිසා ධනවාදය මිය යන්නේ නැත. හිතන්න, ආර්ථිකය, දේශපාලන ස්ථාවරතාව, සහ සමාජ පිළිවෙළ බිඳ දැමූ, එමෙන්ම මිලියන ගණනින් ජනයා ඝාතනය කළ ලෝක යුද්ධ දෙකක්, තෘෂ්නි යුද්ධය සහිත කඳවුරුවාදය, අන්තවාදී සන්නද්ධ භීෂණ, ස්පාඤ්ඤ උණ, ආන්ත්‍රීක්ස් වයිරසය, සාස් වයිරසය, එච්වන් එන්වන්, ඉබෝලා, ගෝලීය මුල්‍ය අර්බුදය, පමණක් නොව ධනපතික්‍රමය ට එරෙහිව වූ අති දැවැන්ත සමාජ-දේශපාලන විරෝධතා සහ ව්‍යාපාර  නිසා ධනවාදය මිය ගියේ නැත. පරාජය බාරගෙන පැත්තකට වුණේ ද නැත.

යම් තරමකට හෝ සිදුවුණේ දේශසීමා වැසීම, සැපයුම් දාම අබලදුබල වීම, කොටස් වෙළඳපොළ කඩාවැටීම, දත්ත ඇහිඳීම අඩපණ වීම, ආනයන අපනයන සීමා පැනවීම, අමුද්‍රව්‍ය හිගයක් ඇතිවීම, සංචාරක තහනම, ජාතික ආරක්ෂනවාදයකට යාම, සහ රටවල් අතර ඇත්තේ මිත්‍රකම් නොව සම්බන්ධතා පමණක් ය යන්න හෙළිදරව් වීම වැනි දේවල්ය.

මහලොකු මිත්‍රසබඳතා තිබුණා යැයි කලක සිට උදම් ඇනූ රටවලට, කොවිඩ් 19 යත් සමඟ මුහුණු ආවරණයක් වත් බෙහෙත් පෙත්තක් වත් නොදී ඒවා තම රටේ භාවිතයට පමණක් තබාගෙන දොර අගුලු දමාගත් සුපිරි රටවල් සිහියට ගෙන හිතන්න.

මිතුරනි, ධනවාදය සම්බන්ධතා මිස මිත්‍රකම් නඩත්තු නොකරයි. එය මිත්‍රකම් අහසට හෝ සයිබර් අවකාශයට වීසිකොට සම්බන්ධතා පමණක් මහ පොළොවේ ඉතුරු කරගෙන ඇත.  

''මිතුරනි, ධනවාදය සම්බන්ධතා මිස මිත්‍රකම් නඩත්තු නොකරයි. එය මිත්‍රකම් අහසට හෝ සයිබර් අවකාශයට වීසිකොට සම්බන්ධතා පමණක් මහ පොළොවේ ඉතුරු කරගෙන ඇත. ''

ටික කලකට ගෝලීයකරණය අබලදුබල වීම නම් අනිවාර්යය

ධනවාදය මිය නොගියත් එහි සහායක බලඇණිය වූ ගෝලීයකරණය අබලදුබල වීම නම් අනිවාර්යය. එහෙත් ඒ ටික කලකටය. මුල දී ගෝලීයකරණය යැපුණේ ජාතික ආර්ථික මතය. නමුත් පසුව ජාතික ආර්ථික යැපුණේ ගෝලීයකරණය මතය. මේ නිසා ජාතික සීමා නැතහොත් හැව ඇතුළේ හැදුණේ දෙමුහුන් ජනයා ය, දෙමුහුන් වැඩ සහ ක්‍රමය.

මේ තත්ත්වය පරිධියේ රටවල්වලට පමණක් නොව කේන්ද්‍රයේ රටවලටත් අදාලය. පරිභෝජනය ට අදාළ අමුද්‍රව්‍ය  අවශ්‍යතාවලින් සියයට හැත්තෑදෙකක් ම සඳහා යුරෝපීය සංගමය, ඉන්දියාව සහ චීනය වැනි විදේශ මත තම රට යැපෙන බව බොහෝ (ට්‍රම්ප්වාදී) ඇමරිකානුවන් දැනගත්තේ මේ මෑතක දී ය. ප්‍රතිජීවක ඖෂධ සඳහා මෙම යැපීම සියයට 97 ක් තරම් ඉහළ අගයක් ගනී. ඒ උදාහරණය ප්‍රමාණවත් යැයි සිතමි.

මේ ඉහත කී දෙමුහුන් ජනයා, එනම් ‘ඔළුවෙන් ස්වදේශික උදරයෙන් ගෝලීය’ ජනයාගේ බියට හේතු වී ඇත්තේ, ගෝලීයකරණය අබලදුබල වී කඩාකප්පල් වී උදරයෙන් පරිකල්පනය කරන බොරු ෂෝක් පර්භෝජනවාදය අතුරුදහන් වේය යන්නය. මන්ද තීරණාත්මක ලෙස ඔවුන්ගේ  උදර විසින් ඔළු යටත්විජිත බවට පත්කොට ඇති නිසා ය.

 

ධනවාදය නව උපායමාර්ග සොයා ගනු ඇත.

එය එසේ වුවත් යම් කිසි කාලයකට ගෝලීයකරණය අබලදුබල වීම නම් අනිවාර්යය.  මේ අබලදුබල වීම ඇතුළේ ධනවාදය නව උපායමාර්ග සොයා ගනු ඇත. එක, එහි දී පසු බැසීම් සහ නැවත ඉදිරියට යෑම් සිදුවනු ඇත. ගැටලුව වන්නේ ඒ තත්ත්වය මටසිළුටු එකක් නොවීමය.

විශේෂයෙන්ම මූලික පියවරක් විධියට එය ජාතික සීමාවට පසු බසිනු ඇත. එසේ කරණුයේ සයිබර් අවකාශය භාවිතා කරමින් ගෝලීය ධනවාදය ට අවශ්‍ය සම්බන්ධතා නඩත්තු කරමිනි.

මිත්‍රකම් නැති වුනත් බලවත් රටවල් තම ධනපති සබඳතා ඒ හරහා නඩත්තු කරනු ඇත. සමහර විට ඒ සබඳතා ‘මිත්‍රකම්’ ලෙස ඒ බලවතුන් ම ප්‍රකාශයට පත් කරනු ඇත්තේ එය සියල්ලෝම දන්නා බොරුවක් බව දැනගෙනම ය. එසේම පරිධියේ රටවලට ද ඒ ‘මිත්‍රකමේ’ හස්තය දිගු කරනු ඇත.

 Capitalism 2

 

නව ආකාරයක යටත්විජිතකරණයක් !

තවත් ආකාරයක් වන්නේ ලෝක පරිමාණ මර්දනයක් සහිත නව ආකාරයක යටත්විජිතකරණයක් සිදුවීම ය. එය ආහාර ඇතුළු සම්පත් සහ අමුද්‍රව්‍ය සඳහාත් කඩා වැටුණු වෙළඳපොළවල් යළි අත්පත්කරගැනීම සහ ස්ථාපිත කරගැනීමත් සඳහාත් වූ බිහිසුණු ක්‍රියාමාර්ගයක් වීමට ඉඩ ඇත.

බලගතු රටවල ජාතික සීමා ඇතුළේ පිළිසකර වන ධනවාදය එලියට පනිනු ඇත්තේ කූඩු කොට සිටි වෘක රෑනක් එළියට පනින ආකාරයෙනි. මන්ද මේ රටවල් සතු බහුජන සංහාරක අවිආයුධවලට කොරෝනා සෑදී නැත, එය අප තේරුම් ගත යුතුය.

කොරෝනා නිසා ජාතිකවාදය නඩත්තු කරන පරිධියේ රටවල්වලින් ඇසෙන හඬක් වන්නේ ජාතික ආර්ථිකයක් පිලිබඳ අදහස ය. මේ කියන්නේ මිනිසා සහ සොබාදහම කේන්ද්රීය නව සංවර්ධනවාදයක් හෝ නව සංවර්ධන ආකෘතියක් ගැන නොව පැරණි ධනවාදය නැගිටින තුරු ජාතික ආර්ථිකයක් ගැනය.

''කොරෝනා නිසා ජාතිකවාදය නඩත්තු කරන පරිධියේ රටවල්වලින් ඇසෙන හඬක් වන්නේ ජාතික ආර්ථිකයක් පිලිබඳ අදහස ය. මේ කියන්නේ මිනිසා සහ සොබාදහම කේන්ද්රීය නව සංවර්ධනවාදයක් හෝ නව සංවර්ධන ආකෘතියක් ගැන නොව පැරණි ධනවාදය නැගිටින තුරු ජාතික ආර්ථිකයක් ගැනය.''

 

''බෝතලේ අලුත් වුනාට පරණ වයින් ම ය.''

එහි අන්තර්ගතය සහ දැක්ම පරණ එකමය. නමුත් නම ‘ජාතික ආර්ථිකය’ යන්නය. බෝතලේ අලුත් වුනාට පරණ වයින් ම ය. ඒ අනුව මේ රටවල් නඩත්තු කරන ධනේශ්වර නව ජාතිකවාදය වනාහි අර බලවත් රටවල් නඩත්තු කරන ජාතිකවාදයේ පොඩි සහ දුර්වලම එකය.

බලගතු රටවල් දිනෙක කරන පරිද්දෙන්, මේ පොඩි ජාතිකවාදයට ලෝක පරිමාන සම්පත් කොල්ලකෑමක් හෝ යටත්විජිතකරණයක් හෝ දැවැන්ත මාරාන්තික පීඩනයක් හෝ භාහිරව ඇතිකළ නොහැක. හැබැයි ඔවුන් ඒ ක්‍රම/මධ්‍යයය ආකෘතිකව තම රටවල් ඇතුළේ අභ්යාස කරනු ඇත.

ඒ අනුව ‘ජාතික ආර්ථිකවාදයේ’ නාමයෙන් බහු ජනයා මත අති දැවැන්ත පීඩනයක් එල්ල කිරීමට මේ පොඩි රටවල සහචර ධනපති කණ්ඩායම් අනිවාර්යයෙන්ම ක්‍රියා කරනු ඇත. ඒ නිසා පරිධියේ රටවල පීඩනය සහ මර්දනය ජාතික සීමා තුළ අතිශයින්ම දැඩි වනු ඇත.

 

සුබසාධන රාජ්‍ය ආකෘතියේ දැවැන්ත කඩාවැටීමක්!

වර්ධනය වන ආර්ථික අර්බුදය නිසා ලෝක පරිමානවත් ජාතිකවත් සුබසාධන රාජ්‍ය ආකෘතියේ දැවැන්ත කඩාවැටීමක් අනිවාර්ය ය. සියළුම රටවල්වල සුබසාධන ක්‍රම අර්බුදයට යනු ඇත.  ස්වයංක්‍රීයකරණයට වැඩිවැඩියෙන් යොමුවීම්, රෝබෝකරණය, රැකියාවලින් නෙරපා දැමීම්, වැටුප් අඩුකිරීම්, වැටුප් ප්‍රමාද කිරීම්, සහනාධාර කප්පාදුව සහ නොදී සිටීම්, අධික බදු අයකිරීම් සහ කුලීගාස්තු වැඩිකිරීම් හරහා මහජන මුදල් පැහැර ගැනීම් සහ රාජ්‍යය මගින් ලබාදෙන සේවා වෙළඳපොළකරණය වැනි ක්‍රියාමාර්ග එකී රටවල නව උපායමාර්ග වනු ඇත.  ඒ නිසා ඇතිවන මහජන පීඩනය සහ අසරණභාවය අති බරපතළ එකකි.

එයටම අනුබද්ධ ක්‍රියාවලිය වන්නේ එකී ආණ්ඩු තීරණවලට එරෙහිව මේ රටවල ඇතිවන මහජන උද්ඝෝෂණ ය. ඒවාට නායකත්වය දීමට තරම් විධිමත් සමාජ-දේශපාලන ව්‍යාපාර නොතිබුනොත් ඒ උද්ඝෝෂණ සහ කැරළි කෝලාහල සමාජ ආර්ථික දේශපාලන ව්‍යාකුලතාවක් මිස ස්ථාවරභාවයක් නිර්මාණය නොකරයි.

 

'ජාතික ආර්ථිකවාදයේ’ නාමයෙන් සිදුවිය හැකි මර්ධනයන් ..

national economicism

ආණ්ඩු මේවාට මුහුණ දෙන්නේ අති දැවැන්ත සහ සාහසික මර්දන ක්‍රියාමාර්ග දියත් කරමිනි. මේ රටවල ජනතා ව්‍යාපාර සහ උද්ඝෝෂන දරුණු සහ අමානුෂික ලෙස මර්දනය කිරීමට කටයුතු කරන ආණ්ඩු නිසා සියලු ආකාරයේ පොදුජන අයිතීන් සහ නන්වැදෑරුම් නිදහස බරපතළ ලෙස හෝ මුළුමනින්ම උල්ලංඝනය වීමට නියමිතය. එය සිදුවනු ඇත්තෙත් ‘ජාතික ආර්ථිකවාදයේ’ නාමයෙන් විය හැකිය.

ලිබරල් ප්‍රජාතන්ත්‍රවාදය, නිදහස, පෞද්ගලික දේපොළ අයිතිය, යහ ආණ්ඩුකරණ මුලධර්ම උඩු හුළඟ විසින් ඈතට වීසි කරනු ඇත. පරිධියේ රටවල එකී තත්ත්වයට සහ පීඩනයට උඩින් බලගතු රටවල ගෝලීය කොල්ලකාරී පීඩනය සහ මර්දනය ද ඔවුන්ගේ ජාතික සීමාවලින් පිටට වර්ධනය වනු ඇත.

එවිට ඇතුලෙනුත් ගිනි, පිටතිනුත් ගිනි ය. ඉතින්, ධනවාදය මිය යන්නේ නැත. එය තිබෙනවාටත් වඩා තීව්ර බිහිසුණු රුපකායක් ගෝලීයවත් ජාතිකවත් ගනී. ධනවාදය සහ එහි ගෝලීයකරණ අවතාරයේ නියම හෝ නව අනුවාදය, ස්වරූපය එවිට කාටත් වැටහෙනු ඇත යන්න පමණක් දැනට ලියා තබමි. පරෙස්සමින් ඉන්නගමන් හිතන්න.

(කොළඹ සරසවියේ ජ්‍යෙෂ්ඨ කථිකාචාර්ය, ධම්ම දිසානායක - 2020 -05-23)            

[ජායාරුප හා පෙළ අවධානය අපෙන් – සංස්කාරක]

 Apekshakaya

subscribeYT

Cyber Window

නවතම පුවත්