යුක්රේනයේ පවතින යුද්ධයෙන් මිය ගිය පළමු ඔලිම්පික් ක්‍රීඩකයා බවට බර ඉසිලීමේ ක්‍රීඩකයෙක් පත්ව සිටිනවා.
Oleksandr Pielieshenko
රුසියානුවන්ගෙන් යුක්රේනය ආරක්ෂා කරමින් සිටියදී ඉරිදා රට වෙනුවෙන් දිවි පිදූ Oleksandr Pielieshenko බර ඉසිලීමේ ක්‍රීඩකයා 2016 රියෝ ඔලිම්පික් ක්‍රීඩා උළෙලේ කිලෝග්‍රෑම් 85 ලයිට්-හෙවිවේට් අංශයේ සිවු වැනි ස්ථානයට පත්වුනා. මීට අමතරව ඔහු යුරෝපීය ශූරතාව දෙවතාවක් දිනා ගැනීමට ද සමත් වුනා.
යුද්ධයේ නිරතව සිටියදී Pielieshenko මරුමුවට පත්වූ බව යුක්රේනයේ ජාතික ඔලිම්පික් කමිටුව නිවේදනය කළා.
යුද්ධයේ නිරතව සිටියදී Pielieshenko මරුමුවට පත්වූ බව යුක්රේනයේ ජාතික ඔලිම්පික් කමිටුව නිවේදනය කළා.
රුසියානුවන් යුක්රේනය ආක්‍රමණය කළ පළමු දිනයේ පටන් යුද හමුදාවට බැඳී සිටි මේ 30 හැවිරිදි බර ඉසිලීමේ ක්‍රීඩකයා දෙවතාවක් ම යුරෝපීය ශූරයා බවට පත්ව සිටියා. කෙසේ වෙතත්, 2018 වසරේදී තහනම් ශරීර උත්තේජන පරීක්ෂණයකින් අසමත් වීමෙන් තරග තහනමකට ලක්වූ බැවින් ඔහු ඉන්පසු තරග බිමට පිවිසියේ නැහැ.
වෘත්තීය ක්‍රීඩාවන්ට සම්බන්ධ යුක්රේනුවන් 450 දෙනෙකු පමණ මේ වන විට යුද්ධයෙන් මිය ගොස් සිටින බව වාර්තා වනවා.
“මේ පුද්ගලයන් සිටිය යුත්තේ අපේ රටේ ක්‍රීඩාව නගා සිටුවමින් ඔවුන්ගේ සාමාන්‍ය ජීවිත ගත කරමින්. නමුත් දැන් සිදුවී තිබෙන්නේ ඔවුන්ව මරා දැමීමයි” තවත් යුක්රේන් ඔලිම්පික් ක්‍රීඩකයෙකු වන Vladyslav Heraskevych පවසනවා.
“මේ පුද්ගලයන් සිටිය යුත්තේ අපේ රටේ ක්‍රීඩාව නගා සිටුවමින් ඔවුන්ගේ සාමාන්‍ය ජීවිත ගත කරමින්. නමුත් දැන් සිදුවී තිබෙන්නේ ඔවුන්ව මරා දැමීමයි”
“ඒ අතරතුර යුද්ධයට සහාය දක්වන රුසියානු ක්‍රීඩකයන් දැන් ජාත්‍යන්තර ක්‍රීඩාවල තරග කරනවා. ඒක එහෙම වෙන්නේ කොහොමද කියා මට තේරුම් ගන්න බැහැ. මේක නම් මහ පිස්සුවක්” ඔහු කියනවා.
යුක්රේනයේ විරෝධතාව මධ්‍යයේ සමහර රුසියානුවන්ට ‘මධ්‍යස්ථ’ ක්‍රීඩකයන් ලෙස මේ වසරේ පැරිස් ඔලිම්පික් උළෙලේ තරග කිරීම සඳහා අවසර දීමට ජාත්‍යන්තර ඔලිම්පික් කමිටුව (IOC) ගත් තීරණය සම්බන්ධයෙන් මතුව තිබෙන ප්‍රශ්න Pielieshenkoගේ මරණයෙන් පසුව වැඩි වීමට ඉඩ තිබෙනවා.
රුසියානු ක්‍රීඩකයන් 54 දෙනෙක් දක්වා පිරිසක් පැරිස් ඔලිම්පික් උළෙලට සුදුසුකම් ලබනු ඇතැයි IOCය අපේක්ෂා කරනවා. කෙසේ වෙතත්, යුක්රේනයේ සිදුකර ගෙන යන යුද්ධයට ප්‍රසිද්ධියේ සහයෝගය දක්වන රුසියානුවන් හෝ එහි හමුදාවන්ට සම්බන්ධකමක් තිබෙන රුසියානුවන්ට ඔලිම්පික් සහභාගිත්වය තහනම් කර තිබෙනවා.
පැරිසියට යන රුසියානු ක්‍රීඩකයන්ට ඔලිම්පික් සමාරම්භක උත්සවයට සහභාගි වීමටත්, ඔවුන්ගේ රටේ ධජය හෝ ජාතික ගීය භාවිතා කිරීමටත්, පාපන්දු හා බාස්කට්බෝල් වැනි කණ්ඩායම් ක්‍රීඩාවලට සහභාගි වීමටත් අවසර ලැබෙන්නේ නැහැ. බෙලරුසියාවේ ක්‍රීඩකයන්ටත් මේ බාධක ම පනවා තිබෙනවා.
හිටපු අමෙරිකා විවෘත ටෙනිස් ශූරයා වන Daniil Medvedev
රුසියානු කණ්ඩායම ජූඩෝ ක්‍රීඩකයන් 10-12ක්, මල්ලවපොර ක්‍රීඩකයන් කිහිප දෙනෙක් සහ හිටපු අමෙරිකා විවෘත ටෙනිස් ශූරයා වන Daniil Medvedev ඇතුළු ලොව ඉහළ ම පෙලේ ටෙනිස් ක්‍රීඩකයන් කිහිප දෙනෙකුගෙන් සමන්විත වනු ඇතැයි අපේක්ෂා කෙරෙනවා. අවම වශයෙන් පාපැදි තරගකරුවන් තිදෙනෙකු හා කරණම ගැසීමේ ක්‍රීඩකයෙකු ද රුසියානු කණ්ඩායමට ඇතුළත් වීමට ඉඩ තිබෙනවා.
රුසියාව 2021 ටෝකියෝ ඔලිම්පික් උළෙලට ක්‍රීඩක ක්‍රීඩිකාවන් 335 දෙනෙක් සහභාගි කරවමින් රන් පදක්කම් 20ක් සමග පදක්කම් 71ක් දිනා ගත්තා. එම ක්‍රීඩා උළෙලේදී සහ 2018 හා 2022 ශීත සෘතු ඔලිම්පික් උළෙලවලදී ඔවුන් ජාතික ලාංජනය නොමැතිව තරග කළේ රුසියානු රාජ්‍ය අනුග්‍රහයෙන් සිදු කෙරුනු අපකීර්තිමත් තහනම් ශරීර උත්තේජන භාවිතය ලෝකයට අනාවරණය වීම නිසාවෙන්.
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
