ගමේ ආර්ථිකය පුබුදුවන්න 'උරුමය' විශාල ජවයක් - (ආචාර්ය ආර්.එච්.එස්. සමරතුංග) 

"උරුමය" වැඩසටහන යටතේ පවුල් ලක්ෂ විස්සකට ඉඩකඩම් හා ගොවි බිම් අයිතිය සින්නක්කරව ලබාදීම තමන්ගේ කියා බිම් අඟලකට හෝ

හිමිකමක් නොතිබූ සැබෑ ශ්‍රී ලාංකික ගොවි ජනතාවගේත්, දූපුතුනගේත් නූතන විප්ලවයේ ආරම්භයක් ලෙස හැඳින්විය හැකි බව ජනාධිපති ආර්ථික කටයුතු ජ්‍යෙෂ්ඨ උපදේශක ආචාර්ය ආර්.එච්.එස්. සමරතුංග ප්‍රකාශ කළේය.

සිංහල රජ දවස පටන් මුලු රටේම ඉඩම් වල හිමිකම රජු සතු වුන අතර, රජු තමන්ට සේවා සපයන රාජකාරි ස්වභාවය සහ කුල ධූරාවලිය අනුව විවිධ සන්නස් මගින් ජනතාවට ඉඩම් පවරා දී තිබුණි.

බ්‍රිතාන්‍යයන් මෙරටට පැමිණ වැවිලි ආර්ථිකයක් ගොඩ නැගිම සඳහා ඔවුන්ට සහ විදේශ ආයෝජකයින්ට අවශ්‍ය ඉඩම් සොයා ගැනීමට උපාය මාර්ගයක් ලෙස මුඩු බිම් ආඥා පනත ඉදිරිපත් කරමින් ජනතාවගේ ඉඩම්වල  අයිතිය උදුරා ගන්නා ලදී.

එම නිසා අපේ රටේ බහුතර ගොවි ජනතාව කබලෙන් ලිපට වැටිණි. වැවිලි ආර්ථිකයට අවශ්‍ය සරුසාර ඉඩම් අත්පත් කර ගැනීම නිසා ආර්ථිකයේ කොදු නාරටිය බදු උඩරට ජනතාව දැඩිව පීඩාවට ලක් විය.

මෙම සියලු අපල උපද්‍රවයන්ගෙන් ලාංකික ගොවි ජනතාව සහ දූපුතුන් මුදාලීම සඳහා ජනාධිපති රනිල් වික්‍රමසිංහ විසින් වසර 2023 නොවැම්බර් 13 වනදා ඉදිරිපත් කළ 78වන අයවැය මගින් ඓතිහාසික තීරණයක් යෝජනාවක් රට හමුවට ඉදිරිපත් කළේය. ඒ 1897දී සම්මතවූ ලංකා මුඩු බිම් ආඥා පනතින් ඉඩම් අහිමිවූවන්ට නැවත වතාවක් සින්නක්කර ඉඩම් ඔප්පු ලබාදීමට යෝජනා කිරීමය.

ඒ අනුව එම මධ්‍යකාලීන අයවැය යෝජනාව ක්‍රියාත්මක කිරීම සඳහා මේ වසරට පමණක් රුපියල් බිලියන දෙකක් නැතිනම් කෝටි දෙසීයක් වෙන් කළේය. එහි සමාරම්භය සනිටුහන් කරමින් ඉකුත්දා දඹුල්ලේදී උරුමය වැඩසටහන ක්‍රියාවට නැංවීය. එය කාලෝචිත, ශ්‍රී ලාංකේය ගොවි ජනතාවගේ ජීවනෝපාය සරි කරන නුදුරේදීම ආර්ථික වර්ධන වේගයේ සැබෑ කොටස් කරුවන් බවට ගොවි ජනතාව පත්වන ක්‍රියාවකට මුල පිරීමකි.

මේ එම වැඩසටහන සම්බන්ධයෙන් ජනාධිපති ආර්ථික කටයුතු ජ්‍යෙෂ්ඨ උපදේශක ආචාර්ය ආර්.එච්.එස්. සමරතුංග අප සමග දැක්වූ අදහස් සමුදායයි.

පිළිතුර-
ඔව් ඉඩම් හිමිකම කියන එක පිළිබඳව අපට කතා කරනවානම් පෙර රජදවස දක්වා යා යුතු වෙනවා. එදා සිංහල රජ දවස මුලු රටේම ඉඩම් වල හිමිකම තිබුනේ රජු සතුවයි. රජු තමන්ට හිමි ඉඩම් තමන්ට සේවා කරන රාජකාරි ස්වභාවය අනුව ජනතාවට බෙදා දුන්නා. ඒවා බෙදා දුන්නේ සන්නස් පත්‍රයක් මගින්. පෞද්ගලිකව ඉඩමක් භුක්ති විඳීමට හිමකම් තිබුණේ රදලයන්ට සහ ආගමික ස්ථාන වලට පමණයි. සාමාන්‍ය ජනතාවට ඉන්න හිටින්න ඉඩමක් ලැබුණත් ඒ වෙනුවෙන් විශාල මහන්සියක් වෙන්න සිදුව තිබුණා. මේ යුගයේ පුද්ගලයින්ට ඉඩම බැඳ තිබුණත් ඔවුන්ට ඉඩම්වල හිමිකම තිබුණේ නැහැ. මේ තත්ත්වය තව දුරටත් සංකීර්ණ වන්නේ යටත් විජිත පාලන යුගයේදී. වැවැලි ආර්ථිකයක් බිහි කිරීමේ අරමුණින් විශේෂයෙන් වතු වගාව සඳහා බ්‍රිතාන්‍ය පාලකයින්ට ඉඩම් අවශ්‍ය වුණා. මේ ඉඩම් ලබා ගැනීම සඳහා ඔවුන් ලංකා මුඩු බිම් පනත 1897දී ගෙනැත් සම්මත කර ගත්තා. රට පුරාම ගැමි ඉඩම් බ්‍රිතාන්‍ය රජයට පවරා ගත්තා. 

ප්‍රශ්නය - 
බ්‍රිතාන්‍යයන් අපේ මුතුන් මිත්තන්ගේ ඉඩම් පවරා ගැනීමේන් පසු සිදුවූයේ කුමක්ද?

පිළිතුර- 
හොඳ ප්‍රශ්නයක් ඇහුව්වේ. 1935දී ඉඩම් සංවර්ධන ආඥා පනත මගින් ගොවීන්ට බලපත්‍ර ක්‍රම මගින් එම ඉඩම් කොටස් වශයෙන් ලබාදීමක් සිදු කිරීමට පියවර ගත්තා. පළමු රාජ්‍ය මන්ත්‍රණ සභාවේ කෘෂිකර්ම ඇමැතිවරයා වුයේ ඩී.එස්. සේනානායක මැතිතුමායි. එතුමා ගොවි ජනපද හරහා ඉඩම් හිමිකම ලබාදීමට පියවර ගත්තා. හැබැයි අවුරුදු සීයකට ආසන්න කාලයක් ගෙවී ගියත් මේ ගොවි ඉඩම් වල ඒවා හිමි ගොවි ජනතාවට ලබා දී නැහැ. මට මෙතනදී සාහිත්‍ය කතාවක් මතක් වෙනවා. 

ප්‍රශ්නය - 
මොකක්ද ඒ සාහිත්‍ය කතාව?

පිළිතුර-

ඔබ දන්නවා නේද විශ්ව කීර්ති නාට්‍යවේදියෙකු වන බර්ටෝල් බ්‍රෙස්ට්ගේ හුණු වටයේ කතාව. එහි සඳහන් වෙනවා “ගොවි දන මනාවූ, ලැබිය යුතු සේම ගම් බිම්“ මේ අනුසාරයෙන් අපටත් හිතන්නට වුණා. ඒ අනුව ජනාධිපතිතුමා බ්‍රිතාන්‍ය සමයේ පාරම්පරික ඉඩකඩම් අහිමිවූ ගොවි ජනතාවට ඒවා යළිත් ලබාදීමට, ගොවිබිම් වල පූර්ණ ඉඩම් පෞද්ගලික අයිතිය ලබාදීමට අයවැයෙන් යෝජනා කළා. එයයි මා මුලින් කීවේ මාදුටු අයවැයේ  හොඳම යෝජනාවක් ලෙස උරුමය වැඩසටහන නම් කළ හැකි බව. 

ප්‍රශ්නය -
ගොවි පුතුන් මුහුණදුන් ප්‍රශ්නය කුමක්ද?

පිළිතුර-
තමන්ට කියා ඉඩමක සින්නක්කර හිමිකමක් නැත්නම් ඕනෑම පුද්ගලයෙක් පවුලක් දැඩි පීඩාවකයි සිටින්නේ. විශාල ලෙස සමාජ අසාධාරණයකට ලක්වීමට සිදුවෙනවා. සින්නක්කර ඔප්පුවක් නැතිව බැංකුවකින් හෝ මූල්‍ය ආයතනයකින් ණය මුදලක් ගැනීමට ඇපයක්වත් තැබීමට ඔවුන්ට කිසිවක් නැහැ. ඉර පායනවා බහිනවා බලමින් හූල්ලමින් ඉදිරි අනාගතය පිළිබඳව දැඩි අවිනිශ්චිත තාවයකින් ගොවි ජනතාව පෙළෙමින් සිටියා. මෙම ඓතිහාසික අභාග්‍ය සම්පන්න සංසිද්ධියෙන් අපේ ගොවි ජනතාව බේරා ගැනීමට ජනාධිපතිතුමා මෙවර අයවැයෙන් කළ යෝජනාව ඓතිහාසික තීන්දුවක් ලෙස හැඳින්විය හැක්කේ ඒ නිසයි.

ප්‍රශ්නය- 
බලපත්‍ර ක්‍රමයට ඉඩම් බෙදා දීමට කොපමණ ඉඩම් ප්‍රමාණයක් තනි ගොවි පවුලකට ලැබුණාද?

පිළිතුර-
මෙම වැඩසටහන ක්‍රියාත්මක කිරීමේදී මුලින් දීමනා පත්‍රයක් මගින් වියළි කලාපයේ ගොවි ජනතාවට ඉඩම් අක්කර පහළොවක හිමිකමක් ලබා දුන්නා. එය ගොඩින් අක්කර පහයි. මඩින් අක්කර දහයයි. පසු කාලීනව එය මහවැලි ව්‍යාපාරය කාලයේ අක්කර දෙක හමාරක් දක්වා අඩු වුණා. එය ගොවි ජනතාවට ප්‍රමාණවත් ඉඩම් ලැබීමකුත් නොවෙයි. 

ප්‍රශ්නය -
වත්මන් ජනාධිපතිතුමා මෙම ප්‍රශ්නය විසඳීමට ඉදිරිපත් වීමට පෙර ඒ සම්බන්ධයෙන් අවශ්‍ය පියවර ගෙන තිබෙනවාද?

පිළිතුර-
ඔව්. එතුමා වසර 2001/2004 කාලයේ අපේ රටේ අගමැතිවරයායි. එම කාලයේ මෙම ප්‍රශ්නය විසඳීමට පියවර ගත්තා. නමුත් නීතිමය ප්‍රශ්නයක් නිසා එය මඟහැරුණා. ඒ සමඟම 2004 ආණ්ඩුව පෙරළුණා. වැඩපිළිවෙල කඩාකප්පල් වුණා.

ප්‍රශ්නය - නැවත එය ආරම්භ වන්නේ කෙසේ ද ?

පිළිතුර -

ජනාධිපතිතුමා නැවත වරක් 2022 වසරේ ජූනි 9 දා අපේ රටේ ජනාධිපතිවරයා බවට පත්වුණා. එතුමා ගොවි ජනතාවගේ ප්‍රශ්නය පිළිබඳව අවබෝධයක් තිබුණු නිසා අතීතියේ මතුවූ නීතිමය ප්‍රශ්නය ඇතුළු අනෙකුත් ප්‍රශ්නවලට විසඳුම් ලබාදෙමින් ගොවි ජනතාවට නැවත තමන්ගේ ඉඩම්වල අයිතිය ලබාදීමේ වැඩපිළිවෙල කඩිනම් කිරීමට පියවර ගත්තා. ඒ වෙනුවෙන් සාකච්ඡා වට ගණනාවක් පැවැත්වූවා. ඒ අනුව සැබෑ සින්නක්කර ඔප්පු ගොවි පුතුන්ට ලබාදීමට තීන්දුවක් ගත්තා. එය ‍ඵෙතිහාසික තීන්දුවක්. ඒ වගේම විප්ලපකාරී ක්‍රියාදාමයක මුලපිරීමක්. 

ප්‍රශ්නය - ඉඩම් හිමිකම සින්නක්කරව ලැබුණහොත් ඉන් සිදුවන සමාජ, ආර්ථික සංවර්ධන ප්‍රතිලාභ මොනවා ද ?

පිළිතුර -

ඇත්ත වශයෙන්ම කියනවා නම් යම් පුද්ගලයෙකුට තමන්ටම කියා ඉඩමක අයිතිය සින්නක්කරව තිබෙනවා නම් ගොවිතැනක්, කුඩාවට කර්මාන්තයක්, ව්‍යාපාරයක්, ආරම්භ කිරීමට සිතට එනවා. ඒ අනුව කටයුතු කරන්න පෙළඹෙනවා. අපි සිතමු ඔය ඉඩම් ලබන පවුල් ලක්ෂ 20 න් පවුල් ලක්ෂ 5 ක පිරිසක් කුඩාවට සුළු හා මධ්‍ය පරිමාණ ව්‍යාපාරයක්, වී මෝලක්, තේ කඩයක්, රෙදිපිලි නිෂ්පාදනය කරන වැඩපිළිවෙලක් පටන් ගත්තා කියා. එයින් ආර්ථිකයට යම් ධනාත්මක බලපෑමක් එක්ක වෙනවා. කිසිවක් නොකර සිටිනවාට වඩා යම් ආර්ථික ප්‍රගමනයකට පුංචි හෝ උදව්වක්, තල්ලුවක් ඉන් ලැබෙනවා. ඒ සමඟ තමයි ගමේ ආර්ථිකය පිබිදෙන්නේ. ඒ ආකාරයට ගම්මට්ටමින් ආර්ථිකය පිඹිදීමට තනි පුද්ගලයෙක්, පවුලක්, සමාජයක් ගොඩනැංවීමට උදව් කරන විශාල ජවයක් සපයන වැඩපිළිවෙලක් ලෙස උරුමය වැඩසටහන හදුන්වන්න පුළුවන්. මෙය ආරම්භ කිරීම කාලෝචිත යෝජනාවක්, වැඩපිළිවෙලක් ලෙස නම් කරන්න පුළුවන්.