ලොව පුරා කම්කරුවන් වෙනුවෙන් වෙන් වූ ජාත්‍යන්තර මැයි දිනය හෙටට (01) යෙදී තිබේ.
ඒ වෙනුවෙන් මෙරට දේශපාලන පක්ෂ සහ වෘත්තීය සමිති රැසක් හෙට සිය මැයි රැලි පැවැත්වීමට මේ වන විටත් කටයුතු රැසක් සුදානම් කර අවසන්ය.
# ශ්‍රී ලංකා පොදුජන පෙරමුණ සිය මැයි රැලිය හෙට පස්වරුවේ පැවැත්වීමට සුදානම් කර ඇත්තේ බොරැල්ල කැම්බල් පිටියේදීය. එහි ප්‍රධානත්වය පක්ෂ නායක හිටපු ජනාධිපති මහින්ද රාජපක්ෂ විසින් දැරීමට නියමිතය.
# " වැඩබිමේ අරගලය මව්බිමේ ජයග්‍රහණය වෙනුවෙන් " යන තේමාව යටතේ සමගි ජන බලවේගයේ මැයි දින පෙළපාලිය හෙට පස්වරුවේ මාළිගාවත්ත පී.ඩි. සිරිසේන ක්‍රීඩාංගණය අසලින් ආරම්භවීමට නියමිතය. අනතුරුව එම පක්ෂයේ මැයි රැලිය පැවැත්වීමට සංවිධානය සුදානම් කර ඇත්තේ ඊ.ඒ. ගුණසිංහ ක්‍රීඩාංගණයේදිය.
# ජාතික ජනබලවේගය මෙවර සිය මැයි රැලිය සංවිධානය කර ඇත්තේ කොළඹ විහාර මහාදේවි උද්‍යානය ඉදිරිපිටදිය.
# එක්සත් ජාතික පක්ෂයේ මැයි රැලිය හෙට පස්වරුවේ පැවැත්වීමට නියමිතව ඇත්තේ සුගතදාස ගෘහස්ත ක්‍රීඩාංගණයේදීය. ඒ සඳහා පක්ෂයේ ඉදිරිපෙළ දේශපාලන නායකයින් රැසක් සහභාගි වීමට නියමිත බව වාර්තා වේ.
# පෙරටුගාමි සමාජවාදී පක්ෂය හෙට පස්වරුවේ දෙල්කඳ හන්දියෙන් සිය මැයි පෙළපාලිය ආරම්භ කිරීමට සැලසුම් කර ඇති අතර පසුව නුගේගොඩ ආනන්ද සමරකොන් එළිමහන් රංග පීඨයේදි සිය මැයි රැලිය පැවැත්වීමට කටයුතු සුදානම් කර තිබේ.
# උත්තර ලංකා සභාගයේ මැයි රැලිය හෙට පස්වරුවේ පැවැත්වීමට සැලසුම් කර ඇත්තේ හයිඩ් පාක් පිටියේදිය.
මේ අතර ප්‍රධාන දේශපාලන පක්ෂ 02ක් සිය මැයි දින සැමරුම් කොළඹින් පිට පැවැත්වීමට කටයුතු කර තිබේ.
# ඒ අනුව ශ්‍රී ලංකා නිදහස් පක්ෂය මෙවර සිය මැයි දින සැමරුම මහනුවර මධ්‍යම වෙළෙඳපොළ ඉදිරිපිට හෙට පැවැත්වීමට සැලසුම් කර ඇත.
# නිදහස ජනතා සන්ධානය සිය මැයි දින සැමරුම මහනුවර සහස් උයන ඉදිරිපිට හෙට පැවැත්වීමට සැපසුම් කර තිබේ.
මැයිදා කොළඹ ආරක්ෂාවට පොලීසියේ 3500ක්
ලෝක කම්කරු දිනය සමරමින් කොළඹ නගරයේ හෙට (01) දිනයේ පැවැත්වෙන මැයි රැළි හා පොළපාලි වල ආරක්ෂාව හා රථවාහන හැසිරවීමේ රාජකාරි වෙනුවෙන් පොලිස් නිලධාරීන් 3500 ට ආසන්න පිරිසක් ක්ෂෙත්‍ර රාජකාරි සදහා යොදවා ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිඥ නිහාල් තල්දූව පවසයි.
මෙවර කොළඹ නගරය, නුගේගොඩ, මහනුවර සහ හැටන් යන ප්‍රදේශ වල අවදානය යොමුවන ප්‍රධාන රැළි හා පෙළපාලි පැවැත්වෙන බවද පොලිස් මාධ්‍ය ප්‍රකාශකවරයා කියා සිටියේය.
මෙම පෙළපාලි මාර්ගයේ ගමන් කරන ආකාරය සම්බන්ධයෙන් එහි සංවිධායකවරුන් කල්තියා පොලිසිය දැනුවත් කර ඇති බවත්, මෙම පෙළපාලි මාර්ගයේ ගමන් ගන්නා රථවාහන වලට බාධා නොවන අයුරිය් එක් මංතිරුවක් ඔස්සේ ගමන් කරන බවට සංවිධායකවරුන් පොලිසියට දැනුවත් කර ඇති බවද පොලිස් මාධ්‍ය ප්‍රකාශකවරයා කියා සිටියේය.
එකඟ වු ආකාරයෙන් කටයුතු කර, ලබා දී තිබු වේලාවන් වලට පෙළපාලි ආරම්භ කර පොලිසියට සහය ලබා දෙන ලෙසට සියලු සංවිධායවරුන්ගෙන් ඉල්ලා සිටින බවද පොලිස් මාධ්‍ය ප්‍රකාශකවරයා වැඩිදුරටත් පැවසීය.
