රාජපක්ෂ පාලනයේ අනුග්‍රහයෙන් ගෝටාගෝගම අරගලයට එරෙහි ප්‍රහාරයේ වර්ෂ පුර්ණයත් සමගම
පොහොට්ටුවේ ප්‍රබල නියෝජිතයෙක් අරගලයේ ක්‍රියාකාරිකයකුට එල්ල කළ මැර ප්‍රහාරය, අරගලයට දායක වූ සියලුම දෙනා ඉලක්ක කරගත් ප්‍රහාර මාලාවක ආරම්භය බවට විපක්ෂ නායකයා අනතුරු අඟවයි.
"මේ පියත් නිකේෂලට එල්ල උනේ ඔය පළවෙනි ප්‍රහාරය. මේක මේ මුළු අරගලයටම එල් කරන ප්‍රහාර මාලාවක එක පියවරක්."
පොහොට්ටුවේ කඩුවෙල හිටපු නියෝජ්‍ය නගරාධිපති චන්දික අබේරත්න අරගලයේ ක්‍රියාකාරික පියත් නිකේෂලට මැයි 10 වැනිදා එල්ල කළ මැර ප්‍රහාරය සම්බන්ධයෙන් මැයි 11 වැනිදා පාර්ලිමේන්තුවේ දී ප්‍රශ්න කළ විපක්ෂ නායක සජිත් ප්‍රේමදාස පවසන්නේ අරගලයට සම්බන්ධ වු සියළු දෙනා මැර තර්ජනවලට ලක්විමේ අනතුරක් පවතින බවයි.
"මේ ජන අරගලයට සම්බන්ධවුන සියළුම දෙනා අද මැර ප්‍රහාරවලට, මිනීමරු තර්ජනවලට ලක් වීමේ තත්වයට පත්වෙලා තිබෙනවා."
අරගලයෙන් පලවා හරින ලද ජනාධිපති ගෝඨාභය රාජපක්ෂ සමග පසුබැස ගිය ඔහුගේ අනුගාමික බලවේග රනිල් වික්‍රමසිංහ ජනාධිපති වීමෙන් අනතුරුව නැවත හිස ඔසවමින් සිටිනු දිස්වේ.
වර්තමාන ජනාධිපතිවරයා බලයට පත්වීමටද මග පෑදු අරගලයට සම්බන්ධ වු සාමකාමී අරගලකරුවන්ගේ ජීවිත ආරක්ෂාව වෙනුවෙන් කටයුතු කරන්නැයි කතානායකවරයාගෙන් සහ අගමැති ප්‍රමුඛ ආණ්ඩුවේ බලධාරීන්ගෙන් ඉල්ලා සිටි විපක්ෂ නායකයා තව දුරටත් අනාවරණය කලේ ප්‍රහාරයට ලක්වීමේ අනතුරට මුහුණ පා සිටින පිරිසකගේ නම් ලැයිස්තුවක් සමාජ මාධ්‍ය තුළ සංසරණය වන බවයි.
" සමාජ මාධ්‍ය වල යනවා, නම් ලැයිස්තුවක් තියනවාලු. ඒ අයට බලාගෙන ඉන්නලු. ඊලගට මැර ප්‍රහාරයට ලක් වෙන පුද්ගලයා ඔබලු."
පහරදීමේ සිද්ධියේ දෙදෙනාටම ඇප
පහර කෑමක ලක්ව කොළඹ ජාතික රෝහලේ ප්‍රතිකාර ලබමින් සිටින සමාජ ක්‍රියාකාරී පියත් නිකේෂල හා පහරදීමේ සිද්ධිය සම්බන්ධයෙන් කඩුවෙල හිටපු නියෝජ්‍ය නගරාධිපති චන්දික අබේරත්න ද පොලීසිය විසින් අත්අඩංගුවට ගනු ලැබිය.
ඒ දෙපාර්ශවය විසින්ම සිදු කළ පැමිණිලි වලට අනුව බවයි පොලීසිය පවසන්නේ.
කෙසේවුවද අත්අඩංගුවට පත් සමාජ ක්‍රියාකාරි පියත් නිකේෂල සහ කඩුවෙල මහනගර සභාවේ හිටපු නියෝජ්‍ය නගරාධිපති චන්දික අබේරත්න අද(11) පස්වරුවේ ඇප මත මුදා හැරිණ.
ඒ , මහේස්ත්‍රාත්වරයා අද ඔවුන් දෙදෙනා ප්‍රතිකාර ලබන කොළඹ ජාතික රෝහලට සහ මුල්ලේරියාව මුලික රෝහල වෙත පැමිණ පරීක්ෂා කිරීමෙන් අනතුරුවයි.
