පළාත් පාලන මැතිවරණය කල්දැමීමට එරෙහිව ජාතික ජන බලවේගය විසින් හෙට (08) රාජගිරිය මැතිවරණ කාර්යාලය
ඉදිරිපිට සංවිධානය කරනු ලබන විරෝධතාවට අදාළව මාර්ග කිහිපයක උද්ඝෝෂණය කිරීම පමණක් වලක්වාලමින් කොළඹ ප්‍රධාන මහේස්ත්‍රාත් අධිකරණය අද (07) එම පක්ෂයේ නායක අනුර කුමාර දිසානායක ඇතුළු 26 දෙනකුට එරෙහිව නියෝගයක් නිකුත් කළේය.
අධිකරණය විසින් අපරාධ නඩු විධාන සංග්‍රහ පනතේ 106 (01) වගන්තිය ප්‍රකාරව මෙම නියෝගය නිකුත් කරනු ලැබ ඇත්තේ, ජාතික ජන බලවේගයේ නායක අනුර කුමාර දිසානායක, එම පක්ෂයේ සාමාජිකයන් වන විජිත හේරත්, ලාල් කාන්ත, ටිල්වින් සිල්වා, සුනිල් හදුන්නෙත්ති, වසන්ත සමරසිංහ ඇතුළු 26 දෙනකුට එරෙහිවය.
ශ්‍රී ජයවර්ධනපුර කෝට්ටේ මාර්ගය, කොටා පාර, නාවල පාර ඔස්සේ සරණ පාර සහ මැතිවරණ කාර්යාලයේ ප්‍රවේශ මාර්ගයන් හි උද්ඝෝෂණය කිරීම තහනම් කරමින් මෙම අධිකරණය මෙම නියෝගය නිකුත් කර ඇත.
වගඋත්තරකරුවන් ලෙස නම්කර ඇති පාර්ශ්වයන් සිදුකිරීමට නියමිත උද්ඝෝෂණය හේතුවෙන් අ. පො. ස. සාමාන්‍ය පෙළ විභාගය පැවැත්වෙන පාසල් සදහා අවහිරයක් මෙන්ම මහජන පීඩාවක් සිදුවන බවට සදහන් කරමින් වැලිකඩ පොලීසිය මෙම ඉල්ලීම අධිකරණයෙන් ඉල්ලා තිබිණී.
“ජන මතයට ඉඩ දෙනු! පළාත් පාලන මැතිවරණය වහා පවත්වනු!,”
මාස තුනක් කල් දැමූ පළාත් පාලන මැතිවරණය පවත්වා ගැනීමට බල කරමින් ජාතික ජන බලවේගයේ අපේක්ෂකයන් විශාල ප්‍රමාණයක් හෙට (08) මැතිවරණ කොමිෂන් සභාව ඉදිරිපිට උද්ඝෝෂණයක් පැවැත්වීමට කටයුතු සූදානම් කර ඇත.
“ජන මතයට ඉඩ දෙනු! පළාත් පාලන මැතිවරණය වහා පවත්වනු!,” මැයෙන් පවත්වන මෙම උද්ඝෝෂණය ඉදිරියේදී උද්ඝෝෂණ මාලාවක් දක්වා දියත් කිරීමට සූදානම් බව එම පක්ෂය පවසයි.
ඒ අනුව, 8 වන දා පස්වරු 3.00 ට රාජගිරිය මැතිවරණ කොමිෂන් සභාව ඉදිරිපිටදී මෙම උද්ඝෝෂණය පැවැත්වීමට සැලසුම්කර තිබිණ.
එමෙන් ම, මෙම මැතිවරණයට ඉදිරිපත් වූ රාජ්‍ය සේවයේ ඇතැම් අපේක්ෂකයන්ට මාස පහකට ආසන්න කාලයක් තිස්සේ සිය වැටුප් ලැබී නැති බව වාර්තා වන අතර මෙම උද්ඝෝෂණය සංවිධානය කර ඇත්තේ ඊට ද එරෙහිවය.
