කඩිනම් ජනාධිපතිවරණයක් පැවැත්වීමේ අදහස අත්හැරීමට ආණ්ඩු පක්ෂය තීරණය කර ඇතැයි
'දේශය' ජාතික පුවත්පත වාර්තා කරයි.
ඉහළ පෙළේ ඉතා විශ්වාස කටයුතු ආරංචි මාර්ග උපුටා දක්වමින් එම පුවත්පත පවසන්නේ, කඩිනම් ජනාධිපතිවරණ අදහස අත්හැරීමෙන් පසු ලබන වසරේ (2024) අගෝස්තු මාසයෙන් පසුව ජනාධිපතිවරණය කැඳවීමට සැලසුම් කර ඇති බවයි.
එහෙත් ඊට පෙර ජනාධිපතිවරණ මෙහෙයුම් ආරම්භ කොට මූලික සංවිධාන කටයුතු කිරීමට ජනාධිපති රනිල් වික්‍රමසිංහ ගේ පාර්ශ්වය තීරණය කර ඇතැයි ද 'දේශය' වැඩිදුරටත් කියා සිටියි.
දැනට වාර්තා වන තොරතුරු අනුව ඉදිරි ජනාධිපතිවරණයට විවිධ පක්ෂ සහ සංවිධාන යටතේ තරග කරන බවට ප්‍රචාරය වන නම් ගණනාවක් ඇත. රනිල් වික්‍රමසිංහ ජනාධිපතිවරයා ස්වාධින අපේක්ෂකයකු ලෙස ජනාධිපතිවරණයට ඉදිරිපත් වීමට සැලසුම් කර තිබේ.
මේ හැර විපක්ෂයේ සජිත් ප්‍රේමදාස, අනුර දිසානායක ද අපේක්ෂක ලැයිස්තුවේ ඉහළින්ම සිටින අතර ව්‍යාපාරිකයන් වන ධම්මික පෙරේරා, දිලිත් ජයවීර, ජනක රත්නායක යන අය ගැන ද විවිධ දේශපාලන පර්ෂදවල සාකච්ඡා කෙරෙමින් පවතී.
එසේම, පාඨලී චම්පික, සරත් ෆොන්සේකා ද ගජේන්ද්‍රන් පොන්නම්බලම් ද ඉදිරි ජනාධිපතිවරණයට ඉදිරිපත්වීමේ සුදානමින් සිටින බව වාර්තාවේ.
ඒ අතර පක්ෂ මාරු ගණනාවක් ගැනද අදහස් පළවෙමින් ඇති අතර සුළු පක්ෂ ගණනාවක් සජිත් ප්‍රේමදාස සමඟ ද තවත් සුළු පක්ෂ ගණනාවක් රනිල් වික්‍රමසිංහ ගේ සහායටද ඉදිරිපත් වනු ඇත. කුමාර වෙල්ගම, රවුෆ් හකීම් සහ ජීවන් තොණ්ඩමන් යන පක්ෂ නායකයන් රනිල් වික්‍රමසිංහ ට සහාය පළ කරනු ඇතැයි සඳහන්ය. පලනි දිගම්බරන්, මනෝ ගනේෂන්, මහාචාර්ය ජී.එල්. පීරිස් ඇතුළු පිරිසක් සජබ සමඟ එක්වී ජනාධිපතිවරණ ව්‍යාපාරයට පිවිසෙනු ඇතැයි දැනගන්නට ඇත.
මේ අතර සමගි ජන බලවේගය ගනු ලැබූ විශේෂ තීරණයකට අනුව එහි ජාතික ලැයිස්තු අපේක්ෂකයන් බහුතරයක් ඉදිරි මහ මැතිවරණයකදී තරග කර මන්ත්‍රී ධූර ලබාගත යුතු යැයි යෝජනා වී තිබේ. කෙසේ නමුත් පොහොට්ටුව නිර්මාතෘ බැසිල් රාජපක්ෂගේ අදහස වන්නේ ලබන වසර මුලදී හෝ කල් දමා ඇති පළාත් සභා ඡන්දය පැවැත්විය යුතු බවටය.
කෙසේ වෙතත් දෙමළ ජාතික සන්ධානය ජනාධිපතිවරණය සම්බන්ධ තීරණය මෙතෙක් ප්‍රකාශ කර නැත.
