ජනතා විරෝධය නිසා ත්‍රිකුණාමලයේ විහාරස්ථානයක සංවර්ධන කටයුතු තාවකාලිකව නැවැත්වීමට පියවර ගෙන ඇති රාජ්‍ය නිලධාරීන් ඇතුළු

පුද්ගලයන්ට එරෙහිව හිටපු අමාත්‍යවරයකු විසින් ප්‍රසිද්ධියේ සිදු කළ මරණිය තර්ජනය දෙමළ ජනතා නියෝජිතයන් විසින් දැඩි ලෙස හෙළා දැක තිබේ.

ත්‍රිකුණාමලය පිහිටි බොරළුකන්ද රජමහා විහාරස්ථානයේ සංවර්ධන කටයුතු නැවැත්වීම සම්බන්ධයෙන් කෝපයෙන් යුතුව හිටපු අමාත්‍ය මර්වින් සිල්වා පසුගියදා සදහන් කර තිබුනේ පන්සල් වලට හා බෞද්ධ භික්ෂුන්ට අත තබන අයගේ හිස කැලණියට රැගෙන එන බවයි.

"මේ රැස්වීම් වලින් පස්සේ මම එනවා උතුරු නැගෙනහිරට. උඹලා පන්සල් වලට අත තියන්න ආවොත් උඹලා සංඝරත්නයට අත තියන්න ආවොත් මම නිකං ආපහු එන්නෑ කැලණියට. උඹලගේ ඔළුවත් අරන් තමයි මං අතින් එල්ලන් එන්නේ කැලණියට. මේක මං වෙනස් කරන් නෑ."

 

පෙරියකුලම්, ඉලුප්පකුලම්, ත්‍රිකුණාමලය පිහිටි බොරළුකන්ද රජමහා විහාරස්ථානයේ විහාරාධිපති හිමියන් වෙත ලිපියක් යොමු කරමින් ජුලි 9 වැනිදා ප්‍රාදේශිය ලේකම් පී. ධනේෂ්වරන් දැනුම් දී තිබුනේ බොරළුකන්ද රජමහා විහාරස්ථාන භුමියෙහි සංවර්ධන කටයුතු, අවට ජනතාවගේ දැඩි විරෝධතාවය හේතුවෙන් තාවකාලිකව නතර කරන ලෙස ත්‍රිකුණාමලය දිස්ත්‍රික් පාර්ලිමේන්තු මන්ත්‍රී ආර්. සම්බන්ධන් සහ නැගෙනහිර පළාත් ආණ්ඩුකාවරයාගේ දුරකථන ඇමතුමෙන් ලද වාචික උපදෙස් පරිදි එළිපෙහෙළි කිරීම්, ඉදි කිරිම් කටයුතු තාවකාලිකව නතර කරන ලෙස ශාසනාලයෙන් යුතුව ඉල්ලා සිටින බවයි.

 

ශ්‍රී ලංකාව බෞද්ධ රටක් බව පැවසු හිටපු අමාත්‍ය මර්වින් සිල්වා අවධාරණය කරන්නේ කතෝලික, ඉස්ලාම්, හින්දු ඕනෑම අයකුට තමන්ගේ ආගම ඇදහීමේ අයිතිය පවතින බවයි.

මේ වන විට දේශපාලන පක්ෂවලට අවශ්‍ය වී ඇත්තේ ජාතිවාදය වැපිරවීමට උවත් තමන්ට ජාතිවාදය වැපිරවීමට අවශ්‍ය නොමැති බව පැවසු ඔහු රටේ සියළු ජාතීන්ගෙන් ඉල්ලා තිබුනේ රටේ සිටින සොරුන් සහ කොමිස්කරයන් එළවීමට අත්වැල් බැදගන්නා ලෙසයි.

හිටපු අමාත්‍යවරයා සිදු කළ මරණිය තර්ජන සහිත ප්‍රකාශය දෙමළ ජනතා නියෝජිතයන් කිහිප දෙනකුම මාධ්‍ය නිවේදන නිකුත් කරමින් හෙළා දැක තිබුනි.

 

දෙමළ ප්‍රගතිශීලි පෙරමුණේ නායක, පාර්ලිමේන්තු මන්ත්‍රී මනෝ ගනේෂන් සදහන් කරන්නේ රට තුළ වාර්ගික හා ආගමික ගැටුම් ඇති කරවන මර්වින් සිල්වා හිටපු අමාත්‍යවරයාගේ ප්‍රකාශය සම්බන්ධයෙන් නීතිමය පියවර ගැනීමට රජයේ මන්ත්‍රීවරුන් බල කළ යුතු බවයි.

 

" ඔහුගේ අදහස් බරපතලයි. මේක රට තුළ වාර්ගික හා ආගමික ගැටුම් ඇති කරනවා. ඒ නිසා මර්වින් සිල්වාට එරෙහිව නීතිය යුතුකම ඉටු කළ යුතුයි. ආණ්ඩුවේ සිටින දෙමළ සහ මුස්ලිම් දේශපාලනඥයන් මේ ගැන ඔවුන්ගේ නායකයන් වන රාජපක්ෂට සහ ජනාධිපති රනිල් වික්‍රමසිංහට පැමිණිලි කළ යුතුයි."

මර්වින් සිල්වා ප්‍රචණ්ඩ ලෙස හැසිරී ගැලවී යාමේ අතීතයක් තිබු අයකු බව උතුරු පළාත් සභා හිටපු මන්ත්‍රිනී ආනන්දි ශෂිදරන් සිහිපත් කර දෙන්නීය.

"ශ්‍රී ලංකා දේශපාලනයේ ආන්දෝලනාත්මක දේශපාලනඥයෙක් තමයි මර්වින් සිල්වා. මාධ්‍ය ආයතනයකට ඇතුල් වෙලා පහරදීම, රජයේ සේවකයෙකු ගසක බැදලා පහරදීම, මුන්නේෂ්වරම් කෝවිලට ඇතුල් වෙලා පුජාව නතර කිරීම, මේවැනි කලහකාරී ක්‍රියා කාරකම් ලැයිස්තු ගත කරන්න පුළුවන්. මර්වින්ගේ මේ අදහස් එයාගේ අදහස් ප්‍රකාශ කිරීමේ නිදහස කියලා සාධාරණිකරණය කරන්න බෑ. එය ජාතීන් අතර ගැටුම් ඇති කරන ප්‍රකාශයක්."

ආචාර්ය මර්වින් සිල්වාගේ ප්‍රකාශය උතුරු පළාත් සභාවේ හිටපු මන්ත්‍රී සබා කුගදාස් හෙලා දැක ඇත්තේ හිටපු අමාත්‍යවරයා මානසික රෝගියකුදැයි ප්‍රශ්න කරමිනි.

" හිටපු අමාත්‍ය මර්වින් සිල්වා නිදන්ගත මානසික රෝගියෙක්ද? එසේත් නැතිනම් සිංහල ජනතාව තමන් ගැන ආඩම්බර වේ යැයි සිතා අශිෂ්ට, අශීලාචාර වචන කියනවාද ?"

මහින්ද රාජපක්‍ෂ ජනාධිපතිධූර සමයේ , 2006 අගෝස්තු 14 වැනිදා ශ්‍රී ලංකා ගුවන් හමුදාව විසින් මුලතිව්, වල්ලිපුනම්හි සෙන්චෝලේ ළමා නිවාසයට එල්ල කළ ගුවන් ප්‍රහාර වලින්  ඝාතනය වු පාසැල් දැරිවියන් පනහකට වැඩි පිරිසක් 17 වැනි වතාවටත් අනුස්මරණය කරමින් ඉඩෙක්කට්ටු හංදිය ආසන්නයේ ළමා නිවාසය පිහිටා තිබු ස්ථානයේ පැවැති අනුස්මරණයට එක්වෙමින් 2023 අගෝස්තු 14 දා  උතුරු පළාත් සභා හිටපු මන්ත්‍රී තුරෙයිරාසා රවිහරන් පවසා තිබුනේ මර්වින් සිල්වා දෙමළ ජනයාගේ වීර ඉතිහාසය දැන ගත යුතු බවයි.

" මර්වින් සිල්වා දෙමළ ජනතාවගේ ඔළු කැලණියට ගෙන යාම ගැන අදහස් දැක්වීම විහිළුවක්. ඔක්කොටම කලින් මර්වින් සිල්වා, සරත් වීරසේකර වගේ අය දෙමළාගේ වීර ඉතිහාසය මොකක්ද කියලා දැනගන්න ඔන."

 

යාපනය පුස්තකාලය ඉදිරිපිට පැවැත්වු සෙන්චෝලේ අනුස්මරණයට එක් වෙමින් දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාජා ගජේන්ද්‍රන් පවසා තිබුනේ දෙමළ ජනයාගේ දේශයේ නීති විරෝධි ලෙස සිදු කරන බෞද්ධකරණය වැලක්වීමට ‘ඔලු හරි දීමට’ සුදානම් බවයි.

 

"අපි කිසිම තැනක බුද්ධාගමට බාධාවක් හෝ හානියක් කරලා නැහැ. නමුත් අපේ ජනතාවගේ ඉඩම් ආක්‍රමණය කර අපේ දේශය සිංහල කිරීමේ අරමුණින් නීතිවිරෝධී ලෙස අපේ භූමියේ ස්ථාපිත කිරීමට උත්සාහ කරන කිසිදු බෞද්ධකරණයකට අපි ඉඩ තබන්නේ නැහැ. අපි ඒකට ප්‍රජාතන්ත්‍රවාදීව විරුද්ධ වෙනවා. ඒ තත්වයේදී ඔයා වගේ ජාතිවාදීන් අපේ ඔළු කපන්න හැදුවොත් අපි ඔළු දීලා හරි අපි අපේ පැවැත්ම රකිනවා."                                

තෙන්කයිලෙයි ආදීනම් ආශ්‍රමයේ සභාපති ද වන එක්සත් දෙමළ ව්‍යුහයේ සංවිධායක සිවතිරු අගතියර් අදිකාලර් හිමියන් මාධ්‍ය නිවේදනයක් නිකුත් කරමින් ආචාර්ය මර්වින් සිල්වාගේ ප්‍රකාශය හෙළා දැක ඇත්තේ ඔහුට එරෙහිව නීතිය ක්‍රියාත්මක කරන ලෙස රජයෙන් ඉල්ලමිනි.

" දෙමළ ජනතාවගේ ඔළු කැලණියට ගේනවා යැයි ප්‍රසිද්ධියේ පවසන දේශපාලනඥයන් අත්අඩංගුවට ගෙන නීතිය ක්‍රියාත්මක කිරීමට රජය වහා පියවර ගත යුතු අතර දෙමළ පූජනීය ස්ථාන ගැන දුෂ්ඨ  ප්‍රකාශ කරන අයට එරෙහිව පියවර ගත යුතුය."

මර්වින් සිල්වාගේ මිනීමරු ප්‍රකාශය සම්බන්ධයෙන් ආණ්ඩුවේ කිසිවකු හෝ පොලිසිය හෝ කිසිත් කළ කී බවක් දැනගන්නට නැත.


 

 

JW


worky sin

Follow Us

Image
Image
Image
Image
Image
Image

නවතම පුවත්