විපක්ෂනායකවරයා ප්‍රශ්න ඇසීමේදී ස්ථාවර නියෝග අවභාවිත කරන හෙයින් ඔහු සම්බන්ධයෙන්
තීරණයක් ගන්නැයි අගමැති දිනේෂ් ගුණවර්ධන කතානායකවරයාගෙන් පාර්ලිමේන්තුවේදී අද (01) ඉල්ලීමක් කළේය.
ගිනි ගැනීමක් වැනි හදිසි අවස්ථාවක් ගැන විපක්ෂ නායකවරයාට හදිසි ප්‍රශ්න ඇසිය හැකි වුවත් පාර්ලිමේන්තුව තුළ හිතුවක්කාරී ලෙස කටයුතු කිරීමට කිසිවෙකුටත් ඉඩ නොදෙන ලෙස ඔහු කතානායකවරයාගෙන් ඉල්ලා සිටියේය.
පාර්ලිමේන්තුව විහිළුවට ලක් නොකරන ලෙසත් නාඩගමක් නොකරන ලෙසත් පාර්ලිමේන්තුව රැස්වන සෑම දිනකම උදෑසන නාඩගමක් මෙන් පෙනෙන හෙයින් දේවාලයේ නැටුමක් මෙන් මේ සභාව ක්‍රියාත්මක කළ නොහැකි බවද ඔහු සඳහන් කළේය.
කතානායකවරයා මේ ගැන එක් නියෝගයක් ලබා දිය යුතු බවත් එය හෙට සිට හෝ ක්‍රියාත්මක කරවිය යුතු බවත් අග්‍රාමාත්‍යවරයා පැවසීය
ජනපතිට විපක්ෂ නායක සජිත්ගෙන් ප්‍රශ්න වැලක්..
ප්‍රජාතන්ත්‍රවාදය අහිමි කරමින් වත්මන් රජය පළාත් පාලන ඡන්ද විමසීම කල් දමා ඇති බවත් එය 2025 වසර දක්වා කල් දමන බව ජනාධිපතිවරයා පසුගිය දා පාර්ලිමේන්තුවේ ප්‍රකාශ කළත් ආණ්ඩුක්‍රම ව්‍යවස්ථාව අනුව ජනාධිපතිවරයාට එවැනි බලතලයක් නොමැති බවත් විපක්ෂ නායක සජිත් ප්‍රේමදාස අද (1) පාර්ලිමේන්තුවේදී පැවසීය.
විපක්ෂ නායකවරයා මේ බව කියා සිටියේ අද (1) පාර්ලිමේන්තුවේ දී ස්ථාවර නියෝග 27 (2) යටතේ ප්‍රශ්න කරමිනි.
සීමා නිර්ණය කමිටු පත් කිරීම, මුදල් නොමැති බව පැවසීම, මැතිවරණය නොපවත්වන ලෙස අධිකරණය හමුවට යාම, මැ.කො. ස නිලධාරීන්ව ජනාධිපතිවරයා කැඳවීම, රාජ්‍ය පරිපාලන ලේකම් හරහා ඇපකර බාර ගැනීම නතර කිරීම, කැබිනට් තීන්දු ගැනීම, මැතිවරණ වියදම් නියාමනය සම්බන්ධ පාර්ලිමේන්තුවට කෙටුම්පත් ඉදිරිපත් කිරිම, මැතිවරණ පැවැතියහොත් රාජ්‍ය සේවක වැටුප් ගෙවීමට නොහැකි බව පැවසීම, කොමිසමේ නියෝජිතයන්ට ඉවත් වීම සහ ඉල්ලා අස්වන ලෙස බල කිරීම වැනි විවිධ උපක්‍රම අනුගමනය කරමින් මැතිවරණය කල් දැමීමට උත්සාහ කළ බවත් විපක්ෂ නායකවරයා පැවසීය.
එසේම මැතිවරණයට ඉදිරිපත් වූ රාජ්‍ය සේවකයන් වැටුප් සම්බන්ධ බරපතල ගැටලුවලට මුහුණ දෙන බවත් අදටත් ඔවුන්ට විසදුම් නොමැති බවත් එසේම ඔවුන්ට රාජකාරී සිදු කරන ආයතන වෙත යාමට පවා ඉඩ නොදී ඇති බවත් විපක්ෂ නායකවරයා මෙහි දී අනාවරණය කළේය.
තවද බාල පොහොර ගෙන්වීමට, ගජමිතුරන්ට කෝටි ගණන් බදු සහන ලබා දීමට රජයට මුදල් ඇත්නම් මැතිවරණය තියන්න මුදල් නොමැත්තේ ඇයි ද කියා ප්‍රශ්න කර සිටින බවත් පැවසූ විපක්ෂ නායකවරයා කියා සිටියේ පළාත් පාලන ආයතන ස්ථාපිත වී නොමැති මොහොතක රාජ්‍ය පාර්ශ්වයට සම්බන්ධ පළාත් පාලන මන්ත්‍රීවරුන් ඒ ඒ පලාත් පාලන ආයතනවලට වෙන් ව ඇති මුදල් පරිහරණය කරන්න ක්‍රමවේද සකස් කර ඇති බවත් මෙවැනි කූඨ උපක්‍රම වැළැක්විය යුතු බවත් පැවසීය.
