ජර්මනිය
ලෝක කුසලාන පාපන්දු තරගාවලියේ මූලික වටයෙන් ම පිට පිට ඉවත් වීමට සිදුවීම හා Euro 2020 තරගාවලියේදී එංගලන්තය වෙතින් පරාජය ලැබ අවසන් කණ්ඩායම් 16 වටයෙන් ඉවතට විසිවීමට සිදුවීම නිසා මෙවර තරගාවලියේ සත්කාරක රට ට පසුගිය වසර සම්බන්ධයෙන් තිබෙන්නේ අමිහිරි අත්දැකීමක්.
එතැන් සිට ඔවුන්ට ජාත්‍යන්තර මිත්‍ර තරගමාලාවක මෙවැනිම අසාර්ථකත්වයකට මුහුණ දීමට සිදුවුනේ 2022 ලෝක කුසලානයෙන් පසුව සහභාගි වූ තරග අටෙන් පහක් ම පරාජය වූ බැවින්. Euro 2024 සත්කාරක රට ලෙස ඔවුන් ඉබේට ම එම තරගාවලියට සුදුසුකම් ලැබීම ජර්මනියට අත්වූ වාසියක්.
ජර්මනිය මේ පරාජයන් ලැබුවේ ජපානය, කොලොම්බියාව, පෝලන්තය, ඔස්ට්‍රියාව හා තුර්කිය වෙතින්. මෙහි ප්‍රතිඵලයක් ලෙසින් හැන්සි ෆ්ලික් ඉවත්ව යාම සහ හුලිඅන් නගලස්මන් කළමනාකරු ලෙස පත් කිරීම සිදුවුනා.
‘යුරෝ 2024’ තරගාවලිය පැවැත්වෙන මේ ගිම්හානය තමන් ලජ්ජාවට පමුණුවන එකක් වේවිදෝ යන බියක් ජර්මනියේ පාපන්දු ක්‍රීඩා ලෝලීන් තුළ හටගෙන තිබුනා.
නමුත්, පසුගිය සතියේ ප්‍රංශය හා නෙදර්ලන්තයට එරෙහිව වාර්තා කළ ජයග්‍රහණයන් නිසා ජර්මන් ක්‍රීඩා ලෝලීන්ගේ බලාපොරොත්තු නැවත ඉහළ නැග තිබෙනවා. ඊටත්, ලොව ප්‍රධාන පාපන්දු තරගාවලියකදී ජර්මනිය අවතක්සේරු කිරීම කොහෙත්ම නොකළ යුතු දෙයක්.
අවධානය යොමු කළ යුතු ක්‍රීඩකයා - ටෝනී ක්‍රෝස් (Toni Kroos)
සමහර විට, සාමාන්‍යයෙන් ඔබේ ‘අවධානය යොමු කළ යුතු’ ක්‍රීඩකයා නොවුනත්, ජාතික කණ්ඩායමෙන් පිටව සිටි තෙවසරක කාලය නිමා කරමින් ටෝනී ක්‍රෝස්ගේ ජාත්‍යන්තර සමුගැනීමේ වෙනස සිදුවීම දැනටමත් ජර්මන් කණ්ඩායමට ප්‍රබල පරිවර්තනයක බලපෑමක් ඇති කර තිබෙනවා.
පහත් මට්ටමක තිබුනු මැද පෙල ස්ථාවර කිරීමට මේ ක්‍රීඩකයා උපකාරී වූවා පමණක් නොව ප්‍රංශය ට එරෙහි තරගයේ සිය ආගමනයේ තත්පර හතක් ඇතුළත ගෝලයක් වාර්තා කිරීම පිණිස ද ඔහු සහාය වුනා. මේ වික්‍රමය නිසා ටෝනී ක්‍රෝස් ‘ඇදහිය නොහැකි’ සහ ‘අසාමාන්‍ය ක්‍රීඩකයෙක්’ ලෙස කළමනාකරු/පුහුණුකරු විසින් හඳුන්වා තිබෙනවා.
කළමනාකරු - හුලිඅන් නගල්ස්මන් (Julian Nagelsmann)
පසුගිය වසරේදී Bayern Munich ක්‍රීඩා සමාජය විසින් නගල්ස්මන් තනතුරෙන් පහ කිරීම ජර්මනියේ සිටින වැඩියෙන් ම උසස් මට්ටමේ පුහුණුකරුවකු ලැබූ ප්‍රධාන පසුබෑමක් බවට සැකයක් නැහැ.
තරග හයකින් ලබා ගත් ජයග්‍රහණ තුනක් සමග ඔහුට ජාතික කණ්ඩායම භාරව ඔප්පු කළ යුතු තවත් බොහෝ දේවල් තිබෙනවා. එහෙත් පසුගිය සතියේ ජර්මන් කණ්ඩායමෙන් දක්නට ලැබුනු ක්‍රීඩාව හඟවන්නේ මේ 36 හැවිරිදි පුද්ගලයා ඔහුගේ අදහස් කණ්ඩායම තුළට කාවද්දමින් සිටින බව.
ස්කොට්ලන්තය
මීට පෙර ‘යුරෝ’ තරගාවලියේ වසර 14ක හිඩැසක් අත්විඳීමෙන් පසුව ස්කොට්ලන්තය පිට පිට ඔවුන්ගේ දෙවැනි ‘යුරෝ’ තරගාවලිය කරා මෙහෙයවීම පිළිබඳව පුහුණුකරු ස්ටීව් ක්ලාක් ට හිමි වන්නේ අතිමහත් ප්‍රශංසාවක්.
ඔහු, තවත් තරග දෙකක් ඉතිරිව තිබියදී ම ජර්මනියේ පැවැත්වෙන තරගාවලියේ ස්ථානයක් තහවුරු කර ගැනීමට පෙර ස්පාඤ්ඤය ට එරෙහි ජයග්‍රහණයක් ද ඇතුළුව අමතක නොවන සුදුසුකම් ලැබීමේ මෙහෙයුමක් අධීක්ෂණය කළා.
තරග අටකින් එක පරාජයක් පමණක් සහිතව, ක්ලාක් ඉතාමත් සිත් බඳනාසුලු තරුණ කණ්ඩායමක් නිර්මාණය කර තිබෙනවා. කෙසේ වෙතත්, එංගලන්තය, ප්‍රංශය හා නෙදර්ලන්තය හමුවේ අත්විඳින්නට සිදුවූ දැවැන්ත පරාජයන් හා උතුරු අයර්ලන්තයෙන් ලැබූ විස්මිත පරාජය නිසා ස්කොට්ලන්ත අපේක්ෂාවන්ට හානි සිදුවී තිබෙන්නේ ඔවුන් මෑතකදී ක්‍රීඩා කළ තරග හතෙන් එකක් හෝ ජය ගෙන නැති නිසා.
අවධානය යොමු කළ යුතු ක්‍රීඩකයා - ස්කොට් මැක්ටෝමිනේ (Scott McTominay)
27 හැවිරිදි මේ ක්‍රීඩකයා දැන් ගෙවන්නේ ක්‍රීඩා සමාජ මට්ටමේ ඔහුගේ අතිශය පලදායී අවධිය යි. ජර්මන් තරග බිමේදී ස්කොට්ලන්තය ඔවුන්ගේ නම සළකුණු කිරීමට නම්, මැක්ටෝමිනේගේ හපන්කම් උපරිමයෙන් ප්‍රදර්ශනය විය යුතු ම වනවා.
ස්ටීව් ක්ලාක් පිටියේ ක්‍රීඩාව විශාල වශයෙන් දියුණු කර තිබෙනවා පමණක් නොව, මුළු ස්කොට්ලන්තය ම දැන් එක්සත්ව ඔවුන්ගේ කණ්ඩායම පිටුපස ස්ථාවරව සිටිනවා. ජර්මනියේදී මේ ගිම්හානයේ ස්කොට්ලන්ත ක්‍රීඩාවේ ශක්තිමත් සාධකයක් බවට ඔප්පු වීමට ඉඩ තිබෙන්නේ මේ එකමුතුකම යි.
සටහන :
(වර්නන් ගුණසේකර)ජ්‍යෙෂ්ඨ මාධ්‍යවේදී
