යුද හමුදාවේ ඉහල නිලධාරීන්ගේ අනවශ්‍ය වියදම් අඩු කිරීම මගින් ආරක්ෂක වියදම් කප්පාදු කිරීමට යෝජනා කළ තමන්ට පහර දෙන බවට ආරක්ෂක ලේකම් සහ හමුදාපති තර්ජනය කළේ යයි ආණ්ඩු පක්ෂයේ සිට
විපක්ෂයට එක්වූ මන්ත්‍රීවරයකු පාර්ලිමේන්තුවට පැමිණිලි කර තිබේ.
“කමිටුව ඇතුලේ. පාර්ලිමේන්තුව ඇතුලේ. හැසුරුනේ නිකං මෙහෙම. ඔනනං ගහන්නත්...මං ඇහුවා මේ අතින් පයින්ද කියලා. එහෙමත් පුළුවන් කිව්වා. පාර්ලිමේන්තුවේ. හැසිරීම මේ සතෙක්ද?, රස්තියාදු කාරයෙක්ද?, ලේකම්වරයෙක්ද?”
හිටපු නියෝජ්‍ය කතානායකවරයකු ද වන චන්දිම වීරක්කොඩි පාර්ලිමේන්තු මන්ත්‍රීවරයා වැඩි දුරටත් සදහන් කළේ, සන්නද්ධ හමුදාවල සාමාජිකයන් ලක්ෂයකට අඩු කිරීම සදහා වන යෝජනාව සම්බන්ධයෙන් පැවැති ජාතික ආරක්ෂාව පිළිබද ආංශික අධීක්ෂණ කාරක සභා රැස්වීමේ දී අදහස් දක්වමින් සාමාන්‍ය සෙබළුන්ගේ රැකියා කප්පාදු කරනවාට වඩා හමුදාවේ ඉහළ නිලධාරීන්ගේ අනවශ්‍ය වියදම් සීමා කිරීම තුලින් ආරක්ෂක වියදම් අඩු කිරීම කාලෝචිත යයි තමන් ප්‍රකාශ කළ බවයි.
එම අවස්ථාවේදී ජාතික ආරක්ෂාව පිළිබද අධීක්ෂණ කාරක සභාවේ සභාපතිවරයා විසින් තමන්ට අදහස් දැක්විමට ද අවස්ථාව ලබා නොදුන් බවටත් චෝදනා කළ මන්ත්‍රීවරයා වැඩි දුරටත් සදහන් කළේ ආරක්ෂක ලේකම්වරයා සහ හමුදාපතිවරයා විසින් දිගින් දිගටම තර්ජනය කළ බවයි. ජාතික ආරක්ෂාව පිළිබඳ ආංශික අධීක්ෂණ කාරක සභාවේ සභාපති ලෙස රියර් අද්මිරාල් (විශ්‍රාමික) පාර්ලිමේන්තු මන්ත්‍රී සරත් වීරසේකර කටයුතු කරයි.
ආරක්ෂක අමාත්‍යාංශයේ ලේකම් ලෙස (විශ්‍රාමික) ජෙනරල් ජී ඩී එච් කමල් ගුණරත්න කටයුතු කරන අතර වත්මන් යුද හමුදාපති ලුතිනන් ජෙනරල් විකුම් ලියනගේය.
චමල් රාජපක්ෂ, ජොන්ස්ටන් ප්‍රනාන්දු, නීතිඥ රවුෆ් හකීම්, චන්න ජයසුමන, චාල්ස් නිර්මලනාදන්, සම්පත් අතුකෝරල, යූ. කේ. සුමිත් උඩුකුඹුර, මේජර් ප්‍රදීප් උඳුගොඩ, සුදර්ශන දෙනිපිටිය, නිමල් පියතිස්ස යන පාර්ලිමේන්තු මන්ත්‍රීවරුද ජාතික ආරක්ෂාව පිළිබඳ ආංශික අධීක්ෂණ කාරක සභාව නියෝජනය කරති.
පාර්ලිමේන්තු වරප්‍රසාද අනුව පාර්ලිමේන්තු සභා ගර්භය තුල දී සිදු කරන ලද අදහස් දැක්වීමක් සම්බන්ධයෙන් කිසිදු බාහිර පුද්ගලයෙකුට ඒ සම්බන්ධයෙන් තර්ජනය කිරීමට හැකියාවක් නොපවතින බව සදහන් කරන චන්දිම වීරක්කොඩි මන්ත්‍රීවරයා, ඔක්තෝබර් 6 වැනිදා පාර්ලිමේන්තුවේදී වැඩි දුරටත් ඉල්ලා සිටියේ පාර්ලිමේන්තු මන්ත්‍රීවරයකු ලෙසත් ජාතික ආරක්ෂාව පිළිබද ආංශික අධීක්ෂණ කාරක සභාවේ සාමාජිකයෙකු ලෙසත් කාරක සභාවේ දී අදහස් දැක්වීමත් පාර්ලිමේන්තු පරිශ්‍රය තුලදීම බාහිර පුද්ගලයන්ගේ තර්ජන වලට ලක්වීමත් සිය මන්ත්‍රී වරප්‍රසාද කඩවීමක් සිදු වන බැවින් මේ පිළිබදව සොයා බලා නිසි පියවර කඩිනමින් ගන්නා ලෙසයි.
“ මේ පිළිබදව කඩිනමින් පාර්ලිමේන්තු වරප්‍රසාද කමිටුවට ගෙනල්ලා, මේක ශ්‍රේෂ්ඨාධිකරණයෙන් දඩුවම් ලැබිය හැකි වරදක් අපේ රටේ නීතියට අනුව. අපේ ආරක්ෂාව පිළිබද වගකීම පාර්ලිමේන්තුව ගන්න. හැබැයි මැරුවත් මිනිස්සු වෙනුවෙන් කතා කරන එක ඔය හෙන්චයියලට බැරිය කියන එකත් පැහැදිලිව කියන්න ඔන.“
“ රජයේ නිලධාරියෙක් නෙමෙයි ඔය පුද්ගලයා දේශපාලඥයෙක්ගේ හෙන්චයියෙක් හින්දා තමයි ඔය තනතුරට ආවේ,“ යි චන්දිම වීරක්කොඩි මන්ත්‍රීවරයා වැඩි දුරටත් චෝදනා කළේය.
