ජනාධිපති රනිල් වික්‍රමසිංහ සහ ඉරාන ඉස්ලාමීය ජනරජයේ ජනාධිපති ආචාර්ය ඊබ්‍රහිම් රයිසිගේ සහභාගිත්වයෙන් උමා ඔය බහුකාර්ය සංවර්ධන යෝජනා ක්‍රමය අද (අප්‍රේල් 24) විවෘත කෙරිණි.
එමගින් මෙගාවොට් 120 ක ජල විදුලි බලයක් නිෂ්පාදනය කෙරෙන අතර බදුල්ල සහ මොණරාගල දිස්ත්‍රික්කවල කුඹුරු අක්කර 15000කට යල මහ දෙකන්නයේම වගාවන් සඳහා ජලය සපයනු ලැබේ.
එමෙන්ම බදුල්ල, මොණරාගල සහ බණ්ඩාරවෙල ප්‍රදේශවලට පානීය ජලය ලබා දීම ද සිදු වේ.මේ ව්‍යාපෘතිය නිසා පිරිසකට ප්‍රතිලාභ ලැබෙන අතරේ ඉඩම් සහ දේපළ අහිමි වූ එතැම්හු අදටත් පීඩා විදිති.
මෙම ව්‍යාපෘතිය නිසා ඉඩම් හා දේපල අහිමිවූවන්ට වන්දි සහ විකල්ප ඉඩම් ලබා දීමට රජය පියවර ගෙන තිබුණ ද අදටත් නොවිසඳුණු ගැටලු රැසක් තිබේ.
උමා ඔය බහුකාර්ය සංවර්ධන ව්‍යාපෘතිය සාර්ථක කර ගැනීම සඳහා ඉරානය විසින් ලබාදුන් තාක්ෂණික සහයෝගය වෙනුවෙන් සිය ස්තූතිය පිරිනමන බවත්, ඉරානයේ සහාය නොමැතිව ශ්‍රී ලංකාවට උමා ඔයෙහි ජලය කිරිඳි ඔයට ගෙනයාමට නොහැකි වනු ඇති බවත් අද (24) පැවති උමා ඔය බහුකාර්ය සංවර්ධන ව්‍යාපෘතිය විවෘත කිරීමේ උත්සවය අමතමින් ජනාධිපති රනිල් වික්‍රමසිංහ පැවසීය.
ගෝලීය දකුණේ රටවල් සිය අනන්‍යතාව සහ ස්වාධීනත්වය තහවුරු කිරීමට ඇති කැමැත්ත සිහිපත් කළ ජනාධිපතිවරයා ඒ වෙනුවෙන් ගෝලීය දකුණේ රටවල් එක්ව නැගී සිටිය යුතු බව ද අවධාරණය කළේය
(උපුටා ගැනීම් - BBC සිංහල සේවය)
