කොරෝනා වෛරස් අවදානම හමුවේ රටේ ජනතාවට සහන සැලසීමේදී වතු කරයේ ජීවත්වන ජනතාව කොන් කර තිබෙන බවට හිටපු අමාත්‍යවරයෙක් ආණ්ඩුවට චෝදනා කරයි.
ආණ්ඩුව වතු කරය ආශ්‍රිත කර්මාන්ත ගැන කතා කළද එම කර්මාන්ත වල නිරත වු ජනතාව සම්බන්ධයෙන් අවධානය යොමු කර නොමැති බවයි හිටපු අමාත්‍ය මනෝ ගනේෂන් පවසන්නේ.
ඔහු එම චෝදනාව එල්ල කළේ දේශපාලන පක්ෂ නියෝජිතයන් සමාජ මාධ්‍ය ඔස්සේ අප්‍රේල් 9 බ්‍රහස්පතින්දා පැවැත්වූ සජීවි දේශපාලන සංවාදයකට සහභාගී වෙමිනි.
වෙරිටේ රිසර්ච් පර්යේෂණ ආයතනය සහ Manthri.lk වෙබ් අඩවිය ඒකාබද්ධව එම සාකච්ඡාව සංවිධානය කර තිබුනි.
පක්ෂ නායකයන් සමග ආණ්ඩුවේ බලධාරීන් පසුගියදා පැවැත්වු සාකච්ඡාවකදී තමන් වතුකරයේ ජනතාවගේ ප්‍රශ්න පෙන්වා දුන්නද එයට නිසි ප්‍රතිචාරයක් නොලැබුන බව පවසන හිටපු අමාත්‍යවරයා එහිදී අවධාරණය කළේ, වතුකරයේ ජනතාවට සහන සැලසීම සදහා වෙනම කමිටුවක් පත් කරන ලෙසට තමන් කළ යෝජනාවටද නිසි පිළිගැනීමක් නොලැබුන බවයි.
කදුකරය ආශ්‍රිතව පමණක් නොව දිවයිනේ සෙසු ප්‍රදේශවල ජීවත් වන වතු ආශ්‍රිත ජනතාවත් මේ මොහොතේ මුහුණ දී සිටින ගැටළුකාරී තත්වය පෙන්වා දෙන හිටපු අමාත්‍ය මනෝ ගනේෂන් එහිදී චෝදනා කළේ, වසර 100 ට අධික කාලයක් තිස්සේ මෙරටට විශාල සේවාවක් සිදු කළ වතුකරයේ ජනතාව සම්බන්ධයෙන් ආණ්ඩුවේ මැදිහත් වීම ප්‍රමාණවත් නොවන බවයි.
සංදර්ශන වලට යන්නේ නෑ
සියලු දෙනා එකතු වී කෝරෝනා වෛරසය රටෙන් අතුගා දැමිය යුතු බව පෙන්වා දෙන හිටපු අමාත්‍ය මනෝ ගනේෂන්, වෛරසය අතුගා දමන මුවාවෙන් රටේ ප්‍රජාතන්ත්‍රවාදය අතුගා දැමීමට ඉඩ දිය නොහැකි බව අවධාරණය කර සිටියි.
මෙවැනි මොහොතක විපක්ෂය විසින් ඉදිරිපත් කරනු ලබන යෝජනා සම්බන්ධයෙන්ද ආණ්ඩුව නිසි අවධානයක් යොමු කළ යුතු බව පෙන්වා දෙන හිටපු අමාත්‍යවරයා එහිදී වැඩි දුරටත් සඳහන් කළේ, සංදර්ශනයක් ලෙස පමණක් එවැනි සාකච්ඡා සදහා ආරාධනා කරන්නේ නම් නැවත එවැනි සාකච්ඡා සදහා සහභාගී වීම සම්බන්ධයෙන් නැවතත් සිතා බැලිය යුතු බවයි.
රට මුහුණ දී සිටින ව්‍යවසන කාරී තත්වයේදී ජනතාව බේරා ගැනීම සදහා ආණ්ඩුවත්, සෞඛ්‍ය අංශයේ කාර්ය මණ්ඩලය මෙන්ම හමුදාව සහ පොලීසිය විසින් සිදු කරන සේවාවද දමිළ ප්‍රගතිශීලි සන්ධානයේ නායක හිටපු අමාත්‍ය මනෝ ගනේෂන්ගේ ඇගයීමට ලක් විය.
සියලු දෙනා එකතු වී කෝරෝනා වෛරසය රටෙන් අතුගා දැමිය යුතු බව පෙන්වා දෙන හිටපු අමාත්‍යවරයා එහිදී තව දුරටත් සදහන් කළේ වෛරසය අතුගා දමන මුවාවෙන් රටේ ප්‍රජාතන්ත්‍රවාදය අතුගා දැමීමට ඉඩ දිය නොහැකි බවයි.
කොරෝනා වෛරස් තත්වය පදනම් කරගෙන රටේ ප්‍රජාතන්ත්‍රවාදය අහිමි කිරීමට උත්සාහ නොකරන ලෙසද ඔහු බලධාරීන්ගෙන් ඉල්ලා සිටියේය.
