වනජීවි අමාත්‍යංශයට අයත් ආනවිලුන්දාව අභයභුමියේ ඉඩම් අක්කර 244 කට වඩා වැඩි ප්‍රමාණයක් ඉස්සන් වගා කිරීම සඳහා
2019 වර්ෂයේ අගෝස්තු 27 වන දින විට ලබා දී ඇති බව විගණකාධිපතිවරයා නිකුත් කර ඇති වාර්තාවකින් හෙළි වේ.
රැම්සා තෙත් බිම් පිළිබඳව විගණකාධිපතිවරයා 2020 ජනවාරි 13 වන දිනය සහිතව නිකුත් කර තිබූ විගණන වාර්තාවේ මෙම කරුණු ඇතුළත් කර ඇති අතර ඉස්සන් ගොවිපල 26 කට හා පොකුණු 54 ක් සඳහා වාර්ෂික බලපත්‍ර නිකුත් කර ඇති බවත් වාර්තාවේ සඳහන් වේ.
ආරච්චිකට්ටුව ප්‍රදේශීය ලේකම් කොට්ඨාසයේ ආනවිලුන්දාව, බත්තුළු ඔය, සෙංගල්ඔය සහ සුරුවිල යන ග්‍රාම නිලධාරී වසම්වල ඇති අභයභුමියේ ඉඩම් මෙසේ බදු දී ඇති බවත් වසරක සහ වසර 30 ක යන කාලසීමාවන් සඳහා මෙම බදුදීම් කර ඇති බවත් එහි සදහන් වේ.
මේ පිළිබඳ කළ විමසීමකදී වනජීවි දෙපාර්තමේන්තුවේ ප්‍රචාරක නිලධාරීනි හසිනි සරත්චන්ද්‍ර පැවසුවේ මෙම ඉඩම් බදු දී ඇති බවක් තමන් නොදන්නා බවත් සිද්ධිය වූ ස්ථානයේ සංවර්ධනය කරමින් සිටි පිරිස සම්බන්ධයෙන් තම දෙපාර්තමේන්තුව නිතීමය පියවර ගෙන ඇති බවත් මේ සම්බන්ධයෙන් නඩුවක් අධිකරණයේ විභාගවන බවත්ය.■
(anidda.lk - රේඛා නිලුක්ෂි හේරත්)
