දස දහස් සංඛ්‍යාත අතුරුදහන් කරනු ලැබුවන් සොයාදීම සම්බන්ධයෙන් රජය සතු වගකීම ජාත්‍යන්තර රතු කුරුස සංවිධානය විසින් ආණ්ඩුවට අවධාරණය කර තිබේ.

උතුරු නැගෙනහිර බලහත්කාරයෙන් අතුරුදහන් කරනු ලැබූවන්ගේ ඉරණම හෙළිකර වගකිවයුත්තන් නීතිය හමුවට පමුණුවන ලෙස බලකරමින් දෙමළ අම්මාවරුන් ගෙනයන ලංකාවේ දීර්ඝතම අරගලයට අදට දින 2304 කි.

ICRC meets President

එයින් තුන් දිනකට පෙර කොළඹදී ජනාධිපති රනිල් වික්‍රමසිංහ මුණගැසුණු ජාත්‍යන්තර රතු කුරුස සංවිධානයේ ඉහල පෙලේ දූත මණ්ඩලයක් ශ්‍රී ලංකාවේ සියලු ප්‍රජාවන්ට අයත් අතුරුදහන් වුවන් පිළිබඳ සාකච්ඡා කර තිබේ.  

දෙමළ අම්මාවරුන්ගේ අරගලයට දින 2300ක් පිරෙන දා ඔවුන් ශ්‍රී ලංකාවේ විදේශ අමාත්‍යවරයා හමුවේ මතුකර ඇත්තේ ස්වකීය සමීපතමයන්ට සිදුවුයේ කුමක්දැයි නොදැන පීඩාවට පත්ව සිටින ඥාතීන්ගේ දුක්ඛිත තත්වයයි.

 

'' අතුරුදහන් තම සමීපතමයන්ගේ ඉරණම සහ ඔවුන් කොහේදැයි අතුරුදහන් වුවන්ගේ සියලුම ඥාතීන්ට පිළිතුරු සැපයීමේ ක්‍රියා දාමය ආරම්භ කිරීමේ වැදගත්කම ආසියා ශාන්තිකර කලාපයේ අධ්‍යක්ෂිකා ක්‍රිස්ටීන් සිපෝයා අවධාරණය කළාය,''  යි ඒ හමුවෙන් පසු ශ්‍රී ලංකාවේ ජාත්‍යන්තර රතු කුරුස කමිටුවේ ප්‍රධානී සෙවරීන් චපාස් සමාජ මාධ්‍ය ඔස්සේ හෙළි කළාය.

 

හමුවෙන් දෙදිනකට පසු රතු කුරුසයට ප්‍රතිචාර දක්වන අමාත්‍යවරයා පාලම් බැඳීමක් ගැන කවි බසින් දොඩා තිබුනත් දශක ගණනාවක් තිස්සේ අතුරුදහන් දස දහස් සංඛ්‍යාත ශ්‍රී ලාංකිකයන් සොයා දීමට ගන්නා පියවරක් දක්වා තිබුනේ නැත.

 

'' එය මහත් දුෂ්කර, දීර්ඝ හා වෙහෙසකර ගමනක් වුවත්, ප්‍රජාවන් අතර පාලම් බැඳීම, අතීතය සම්බන්ධයෙන් පියවර ගැනීම සහ සකල ශ්‍රී ලාංකිකයන් ගෞරවයෙන්, අභිමානයෙන් හා ආරක්ෂාවෙන් යුතුව ජීවත්වන අනාගතයක් දෙස බලාපොරොත්තු දල්වා සිටිමු,''  යි විදේශ අමාත්‍ය අලි සබ්රි රතු කුරුස සංවිධානයට ට්විටර් මගින් පවසා තිබුණි.


රතු කුරුස දූත මණ්ඩලය හමුවේ අමාත්‍යවරයා කී දේ කුමක්දැයි හෙළි කොට තිබුනේ නැත.

අතුරුදහන් කරනු ලැබුවන් සොයා දීම ඇතුළු මානව හිමිකම් රැකදීම සඳහා ගතයුතු පියවර යෝජනා කරමින් එක්සත් ජාතීන්ගේ මානව හිමිකම් මණ්ඩලය විසින් සම්මත කරගත් ‘ශ්‍රී ලංකාවේ සංහිඳියාව, වගවීම සහ මානව හිමිකම් ප්‍රවර්ධනය කිරීම’ යෝජනාවට විදේශ අමාත්‍ය අලි සබ්රි ජිනීවා සමුළුවේදී දැඩි ලෙස විරෝධය පල කළේය.
 

JW


worky sin

Follow Us

Image
Image
Image
Image
Image
Image