EURO 2024: ජෝජියාව සහ තුර්කිය (එෆ් කොටස)

ජෝජියාව

 ලක්සම්බර්ග් හා ග්‍රීසිය ට එරෙහිව ජයග්‍රහණ වාර්තා කරමින් ජෝජියාව එදා මෙදා තුර ප්‍රථම වතාවට ප්‍රධාන පාපන්දු තරගාවලියකට පිවිස සිටින්නේ විස්මිත අයුරින්.

නේෂන්ස් ලීග් තරගාවලියේ ‘ඩී’ ලීගයේ සිට මෑත වසරවලදී ‘බී’ ලීගයට ජෝජියාව උසස්ව සිටින්නේ එරට ජාතික පාපන්දු කණ්ඩායම වෙනුවෙන් කළ වැඩි ආයෝජනයේ ප්‍රතිඵලයක් ලෙසින්.

ජර්මනියේ පැවැත්වෙන ‘යුරෝ’ තරගාවලියේ පිළිමළුන් පිටුදැකීමේ වටයට පිවිසීම ජෝජියාව ට ඉතාමත් අසීරු දෙයක්. නමුත් ජෝජියාව ට අවසානයේ යුරෝපයේ සුපිරි පාපන්දු කණ්ඩායම් අතර සිටීමට හැකි වීම පිළිබඳව ඔවුන්ගේ ක්‍රීඩා ලෝලීන් තුළ තිබෙන්නේ ලොකු සතුටක්.


අවධානය යොමු කළ යුතු ක්‍රීඩකයා - හවීචා ක්වාරට්ස්හයිල්යා (Khvicha Kvaratskhelia)

ඉතාලියේ Napoli ක්‍රීඩා සමාජ තරුව වන හවීචා ක්වාරට්ස්හයිල්යාගෙන් එහා වෙනත් අතක් බැලීම කළ නොහැකි දෙයක්. මේ 23 හැවිරිදි ක්‍රීඩකයා රට වෙනුවෙන් ක්‍රීඩා කළ තරග 29දී ගෝල් 15ක් ලබා ගෙන සිටින්නේ යුරෝපය හරහා ගෞරවනීය ලීග් තරගාවලියන්හි ක්‍රීඩා කරන ජෝජියානු නව ක්‍රීඩක පරම්පරාවකට මූලිකත්වය දෙමින්.

මේ ඉදිරි පෙළ ක්‍රීඩකයා සුදුසුකම් ලබා ගැනීමේ තරගාවලියේදී ලබා ගත් ගෝල් හතර විසින් ඔහුගේ රට ජර්මන් තරගාවලියේ සිටිනු ඇති බවට තහවුරු කර තිබෙන අතර ක්වාරට්ස්හයිල්යාගේ ක්‍රීඩාවේ තත්ත්වය මත ජෝජියාව ට මේ තරග බිමේදී මතක හිටින අවස්ථාවන් නිර්මාණය වීමට ඉඩ තිබෙනවා.


කළමනාකරු - විලී සැන්යොල් (Willy Sagnol)

ප්‍රංශයේ අවුරුදු 21න් පහළ සහ Bordeaux කණ්ඩායම්වල කළමනාකරු ලෙස කළ සේවය මිට අට වසරකට පමණ පෙර අවසන් වීමෙන් පසුව තම කළමනාකාරිත්ව දිවියට නව ජීවයක් දීම පිළිබඳව මේ හිටපු ප්‍රංශ පසුපෙල ක්‍රීඩකයාට විශාල ප්‍රශංසාවක් හිමිවීමේ අයිතියක් තිබෙනවා.

2021 වසරේදී ජෝජියාවේ පාපන්දු පුහුණුකරු තනතුර බාර ගත් දා සිට ඔහු තමා යටතේ ක්‍රීඩා කෙරුනු තරග 33න් 16ක් දිනා ගෙන තිබෙනවා. ජෝජියාව නමැති නැගෙනහිර යුරෝපීය රට ඔවුන්ගේ මංගල ‘යුරෝ’ තරගාවලියට රැගෙන යාම පිළිබඳව මේ Bayern Munich කණ්ඩායමේ ජනප්‍රිය ක්‍රීඩකයාව ඒ රට කිසිදා අමතක කරන්නේ නැහැ.

තුර්කිය

 ‘යුරෝ 2020’ තරගාවලියේ ‘කළු අශ්වයන්’ ලෙසින් බොහෝ දෙනා විසින් සලකනු ලැබූ තුර්කිය ට ඒ තරගාවලිය විනාශකාරී අවසානයක් ගෙන දුන්නේ මූලික තරග තුනෙන් ම ඔවුන් පරාජය වූ බැවින්.
 
එහෙත්, ඒ ලැබූ පළපුරුද්දෙන් ශක්තිමත්ව සිටින තුර්කිය එම කලකිරවන මෙහෙයුමෙන් පළි ගැනීමට මේ වතාවේදී අපේක්ෂා කරනු ඇත්තේ සුදුසුකම් ලැබීමේ ඔවුන්ගේ තරග කොටසේ ක්‍රොඒෂියාව හා වේල්සය අභිබවා ඉහළට පිවිසීමට සමත් වීමෙන් පසුව.

කෙසේ වෙතත්, තම රටෙන් පිටතදී ක්‍රොඒෂියාව හා ජර්මනිය ට එරෙහිව ලබා ගත් ජයග්‍රහණ ද ඇතුළත් ආකර්ෂණීය ක්‍රීඩාවකින් පසුව, තුර්කිය නැවතත් මහ පොළවට පතිත කරවනු ලැබුවේ හංගේරියාව සහ ඔස්ට්‍රියාව විසින් මෑතකදී ඔවුන් පිට පිට පරාජය කරමින්.


අවධානය යොමු කළ යුතු ක්‍රීඩකයා - හකාන් චල්හනෝලු (Hakan Calhanoglu)

නායක හකාන් චල්හනෝලු තුර්කියේ වීරයෙක්. ජර්මනියේ ඉපදුනත් තමාගේ පවුල පැවත එන රට වෙනුවෙන් ක්‍රිඩා කිරීම තෝරා ගත් මේ 30 හැවිරිදි ක්‍රීඩකයා 2021 වසරේදී ඉතාලියේ AC Milan ක්‍රීඩා සමාජයේ සිට ඔවුන්ගේ පරම ප්‍රතිවාදීන් වන Inter Milan කණ්ඩායමට එක්වීමෙන් පසුව නව ජීවයක් ලබා ගෙන සිටිනවා.

ආක්‍රමණික මැදපෙල ක්‍රීඩකයෙකු ලෙස කළින් රංගනයක යෙදුනු චල්හනෝලු දැන් තවත් පසුපසින් ක්‍රීඩා කරන්නේ රට වෙනුවෙන් තරග 84ක ක්‍රීඩා වාර්තාවක් ඇතිව. ඔහුගේ පළපුරුද්ද හා ක්‍රීඩා තත්ත්වය වින්චෙන්සෝ මොන්ටෙල්ලාගේ කණ්ඩායමට තීරණාත්මකයි.


කළමනාකරු - වින්චෙන්සෝ මොන්ටෙල්ලා (Vincenzo Montella)

49 හැවිරිදි මේ ඉතාලි ජාතිකයා උද්යෝගිමත් විවේචන උපයා ගෙන සිටින්නේ මහාද්වීපය හරහා පසුගිය දශකයේ කළ සේවය නිසා.

තුර්කියේ සුපර් ලීග් කණ්ඩායමක් වන Adana Demirspor සමග දෙවසරක සිත් බඳනාසුලු සේවයකින් පසුව මොහුට තුර්කියේ පාපන්දු කණ්ඩායමේ කළමනාකාරිත්වය දැරීමේ අවස්ථාව හිමි වූ අතර මෑතකදී කලකිරවන තරග සතියක් උදා වීමට පෙර මේ පුහුණුකරුවා තුර්කි ජාතික කණ්ඩායමට ඔහුගෙන් ලොකු බලපෑමක් ඇති වී තිබෙන බවට ප්‍රදර්ශනය කරමින් සිටියා.

(වර්නන් ගුණසේකර)
ජ්‍යෙෂ්ඨ මාධ්‍යවේදී
This email address is being protected from spambots. You need JavaScript enabled to view it.

සබැඳි පුවත් :