දාහත් වසකට පෙර දකුණේ දී වෙඩි තබා මරා දැමූ දෙමළ ජාතික පාර්ලිමේන්තු මන්ත්‍රීවරයකු
උතුරේදී අනුස්මරණය කර තිබේ.
මහින්ද රාජපක්‍ෂ ජනාධිපති ලෙස කටයුතු කළ පළමු ධූර කාලසීමාවේ, 2006 නොවැම්බර් 10 වැනිදා ඝාතනය කෙරුණු දෙමළ ජාතික සන්ධානයේ පාර්ලිමේන්තු මන්ත්‍රී නඩරාජා රවිරාජ්ගේ 17 වැනි අනුස්මරණය චාවකච්චේරි පිහිටි ඔහුගේ පිළිරුව අභියස නොවැම්බර් 10 වැනි සිකුරාදා පැවැති බවයි පළාත් බද වාර්තාකරුවන් පවසන්නේ.
ඉලංගෙයි තමිල් අරසු කච්චි (ITAK), සංවිධානත්වයෙන් පැවැති අනුස්මරණය සදහා හිටපු පාර්ලිමේන්තු මන්ත්‍රී මාවෙයි සේනාධිරාජා ඇතුළු එම පක්ෂයේ ප්‍රාදේශිය ජනතා නියෝජිතයන් එක්ව සිටි බව ඔවුහු වැඩි දුරටත් පවසති.
2006 නොවැම්බරයේ රවිරාජ් මන්ත්‍රීවරයා කොළඹදී මරා දැමීමට චෝදනා ලැබූ නාවික හමුදා බුද්ධි අංශ නිලධාරි දැලිවලගෙදර ගාමිනි සෙනෙවිරත්න සහ බුද්ධි අංශ නිලධාරි කන්කානම්ගේ ප්‍රදීප් චාමින්ද කොළඹ හුණුපිටියේ පිහිටි ආරක්‍ෂිත නිවහනක සිට ක්‍රියාත්මක වූ බව නඩුවේදී හෙළිදරව් විය.
විශේෂ ජුරියක තීරණය මත මහාධිකරණය මගින් චුදිත නාවික හමුදා නිලධාරින් තිදෙනා නිදහස් කෙරුනේ ගෝඨාභය රාජපක්‍ෂ ජනාධිපති ධුරයට පත් වීමෙන් අනතුරවය.
යුද්ධය පැවති සමයේ පිඩාවට පත් යාපනයේ දෙමළ ජනයා මුහුණ දුන් කටුකත්වය මෙන්ම රාජ්‍ය හමුදා විසින් උතුරේ මුදා හරිනු ලැබූ මානව විරෝධී අපරාධකාරිත්වය ගැන සිංහල බසින් දකුණට සන්නිවේදනය කළ රවිරාජ් ඒ ගැන පාර්ලිමේන්තුව තුල නිරන්තරයෙන් අරගල කළේය.
දෙමළ ජනයාගේ අයිතීන් වෙනුවෙන් පෙනී සිටී දකුණේ යුද විරෝධී බලවේග සමඟ සමීපව කටයුතු කිරීම ඔහු මරා දැමීමට හේතු වූ බවට සැකකෙරේ.
