මේ දිනවල ඉන්දියාවේ පැවැත්වෙන ජගත් ක්රිකට් කවුන්සලයේ 2023 ලෝක කුසලාන
ක්රිකට් තරගාවලියේදී නව වාර්තා එක පිට එක බිහිවෙමින් තිබෙනවා. අලුත් ම වාර්තාව ඔස්ට්රේලියාවේ ග්ලෙන් මැක්ස්වල්ගෙන්.
නෙදර්ලන්තය ට එරෙහිව අද (25) පැවති තරගයේදී මැක්ස්වල් ලෝක කුසලාන ජාත්යන්තර එක්දින ක්රිකට් තරග ඉතිහාසයේ වේගවත්ම ශතකය වාර්තා කළේ පන්දු 40කට පමණක් මුහුණ දෙමින්. ඔහුගේ මේ ශතකය දැන් සමස්ත ජාත්යන්තර එක්දින ක්රිකට් තරග බිමේ සිවුවැනියට වේගවත්ම ශතකය බවට ද පත්ව තිබෙනවා.
මීට පෙර තිබූ වේගවත්ම ශතක වාර්තාව පන්දු 9කින් මැක්ස්වල් බිඳ දැමුවේ අරුන් ජෙට්ලි ක්රීඩාංගණයේ අද පැවති තරගයේදී අංක 6 පිතිකරු ලෙස කඩුල්ලට පිවිසෙමින්.
දකුණු අප්රිකාවේ එයිඩන් මාක්රම් ශ්රී ලංකාව ට එරෙහිව පන්දු 49කින් ශතකයක් ලබා ගත්තේත් මේ ක්රීඩා පිටියේදී ම යි. එහෙත් ඒ වාර්තාව රැඳී තිබුනේ දින 18ක් පමණ යි.
මැක්ස්වල් ශතකයක් ලබා ගනු ඇතැයි කිසිම කෙනෙක් නොසිතුවේ ඔහු පන්දුවට පහර දීම සඳහා පිටියට පිවිසියේ 40 වැනි ඔ්වරයේදී නිසාවෙන්. අවසානයේ ඔහු පන්දු 44කට මුහුණ දී ලකුණු 106කට දැවී යන විට ඔහුගේ අගනා ඉනිමට හතරේ පහර 9ක් සහ හයේ පහර 8ක් ඇතුළත්ව තිබුනා.
පන්දු 27කට පමණක් මුහුණ දෙමින් සිය අර්ධ ශතකයට පිවිසි මැක්ස්වල් ඉන්පසුව ශතකයේ ඉතිරි ලකුණු ප්රමාණය රැස් කළේ පන්දු 13කින් පමණක් වීම ද විශේෂත්වයක්.
2015 ලෝක කුසලාන තරගාවලියේදී ශ්රී ලංකාව ට එරෙහිව පන්දු 52කින් ශතකයක් වාර්තා කිරීම නිසා ග්ලෙන් මැක්ස්වල් කළින් ම වේගවත්ම ලෝක කුසලාන ශතක ලැයිස්තුවට ඇතුළත්ව සිටියා.
සටහන :
(වර්නන් ගුණසේකර)
ජ්යෙෂ්ඨ මාධ්යවේදී